ផ្សារហ៊ុនថៃធ្លាក់ចុះជិត២% ម្សិលមិញ ជុំវិញព្យុះនយោបាយ​ ​

ផ្សារភាគហ៊ុនថៃ បា​នបញ្ចប់ការជួញដូរនៅ ១ ០៩៤,៥៨ ពិន្ទុ ដោយធ្លាក់ចុះប្រមាណ ១,៧១ ភាគរយ ​ជាមួយ​នឹង​តម្លៃជួញដូរ ៣៦,០៤ ប៊ីលាន​បាត ​ខណៈវិនិយោគិនបរទេសលក់ភាគហ៊ុនចេញសុទ្ធប្រមាណ ១,១៣ ប៊ីលាន​បាត ជុំវិញភាពតានតឹងនយោបាយ​។ នេះបើតាមការចុះផ្សាយរបស់កាសែត The Nation។

ការធ្លាក់ចុះជិត ២ ភាគរយនៃផ្សារភាគហ៊ុនថៃនេះ កើតឡើងចំពេលដែលថៃប្រឈមមុខនឹង​ព្យុះនយោបាយក្នុងស្រុក ដែលកាន់តែតានតឹងខ្លាំង ក្រោយបែកធ្លាយសារសន្ទនាទូរស័ព្ទរវាងនាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាត្រ និង សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា ជុំវិញ​បញ្ហា​ព្រំដែនរវាងប្រទេសទាំង២។

​ការបែកធ្លាយសារសម្លេងនោះ ​បាន​ជួញជំរុញឱ្យ​គណបក្ស​ Bhumjaithai​ ​​របស់​ លោក Anutin Charnvirakul ​ដែល​កំពុង​ដឹកនាំ​​​កាន់​កាប់​ក្រសួងមហាផ្ទៃ​​ថៃ ​​ប្រកាស​ដកខ្លួន​ចេញ​ពីរដ្ឋាភិបាល​ចម្រុះ​ដឹកនាំ​ដោយ​គណបក្ស​ភឿថៃរបស់​លោកស្រី ផែថងថាន កាលពីល្ងាច​ថ្ងៃ​ពុធ​​។ ក្រោមព្យុះនយោបាយចុងក្រោយ លោកស្រី ផែថងថាន កំពុងរងសម្ពាធឱ្យ​រំលាយសភាផង និងចុះចេញពីដំណែងផង។

អ្នកជំនាញផ្សារភាគហ៊ុនថៃ បាន​លើកឡើងថា អស្ថិរភាពនយោបាយក្នុងស្រុក ដែលរួមទាំងហានិភ័យនៃការរុះរើគណៈរដ្ឋមន្រ្តី បូករួមនឹង​បញ្ហា​ព្រំដែនជាមួយ​កម្ពុជា គឺជាកត្តាជំរុញឱ្យវិនិយោគិនលក់ភាគហ៊ុនរបស់ខ្លួន​ បង្កជាការធ្លាក់ចុះនៃទីផ្សារ។

អ្នកជំនាញថៃបាន​លើកឡើងថា អស្ថិរភាពនយោបាយ ជាទូទៅតែងតែធ្វើឱ្យ​ទំនុកចិត្តវិនិយោគិន ជាពិសេសវិនិយោគិនបរទេស ធ្លាក់ចុះ ដែលធ្វើឱ្យ​ពួកគេលក់ភាគហ៊ុន ក្រោមក្ដីបារម្ភពីហានិភ័យទីផ្សារ។