សហគ្រាសក្នុងស្រុកមួយ ទិញកសិផលពីកសិករផលិតគ្រឿងទេសដាក់លក់លើទីផ្សារ កំពុងទទួលបានការគាំទ្រ

សហគ្រាស រីងហ្គាខេម ដែលគ្រប់គ្រងដោយសហគ្រិនក្នុងស្រុកមួយ បានជួយទិញកសិផលពីប្រជាសិករនៅតាមបណ្ដាខេត្តមួយចំនួនមកផលិតចេញជាគ្រឿងទេសដាក់លក់លើទីផ្សារ និងកំពុងទទួលបានការគាំទ្រពីសំណាក់ប្រជាជនខ្មែរ។

ស្ថិតក្នុងវ័យ ៤០ឆ្នាំ អ្នកស្រី ស ស្រីហួច ជាម្ចាស់សហគ្រាស រីងហ្គាខេម ប្រាប់ កម្ពុជាថ្មី ថា សហគ្រាសរបស់អ្នកស្រីតែងតែបានជួយទិញបន្លែ ផ្លែឈើ និងដំណាំផ្សេងៗទៀតពីប្រជាកសិករតាមបណ្ដាខេត្តមួយចំនួន ​ដើម្បីយកមកផលិតចេញជាគ្រឿងទេស​ដាក់លក់លើទីផ្សារដែលជាតម្រូវការប្រចាំថ្ងៃ។

អ្នកស្រី បន្តថា កសិផលដែលទិញពីកសិករទាំងអស់នោះមានដូចជា៖ ស្លឹកគ្រៃ ស្លឹកក្រូចសើច រមៀត រំដេង ​និងស្លឹកម្រុំ ដែលសុទ្ធសឹងជាកសិផលរបស់ប្រជាកសិករ ដែលស្ថិតនៅខេត្តមួយចំនួនរួមមាន៖ ពោធិ៍សាត់ បាត់ដំបង កំពង់ចាម​ ព្រៃវែង កណ្ដាល និងខេត្តកំពត ដែលកសិផលខ្លះ កសិករមិនអាចរកទីផ្សារបានដោយខ្លួនឯង ទើបអ្នកស្រី បានជួយសម្រួលទិញពីកសិករទាំងនោះ បានមួយចំនួនផងដែរ។

ម្ចាស់សហគ្រាសរូបនេះ បានបញ្ជាក់ដែរថា «ផលិតផលដែលសហគ្រាសរបស់អ្នកស្រីផលិតបាននោះ គឺបច្ចុប្បន្នមានឈ្មោះថា ពពែមាសគ្រឿងទេសសំងួត គឺជាម្សៅគ្រឿងទេសដ៏ចំណាន ដែលត្រូវបានបង្កើតឡើងដើម្បីជួយសម្រួល មេចុងភៅអាជីពតាមភោជនីយដ្ឋាន អាហារដ្ឋាន និងស្រ្តីមេផ្ទះ ព្រោះវាងាយដោយមិនចំណាយពេលវេលាយូរ សន្សំសំចៃបានមួយកម្រិត និងអាចចម្អិនអាហារបានឆ្ងាញ់គ្រប់ពេល ដូចគ្រឿងដែលបានបុកស្រស់អីចឹងដែរ»។

អ្នកស្រី ស ស្រីហួច បានឱ្យដឹងទៀតថា ទាក់ទងនឹងទីផ្សារវិញ គ្រឿងទេសរបស់អ្នកស្រី បច្ចុប្បន្នក៏មានដាក់លក់នៅលើទីផ្សារទំនើបផ្សេងៗ ក្នុងរាជធានីភ្នំពេញ។ ហើយអ្វីដែលជាជំហានបន្ទាប់នោះ អ្នកស្រី​ ក៏មានផែនការក្នុងបង្កើនការផលិតបន្ថែមទៀត ដើម្បីធ្វើយ៉ាងណាអាចឱ្យផលិតផលមួយនេះ អាចចែកចាយទៅកាន់ផ្សារផ្សេងៗទៀត ក្នុងប្រទេសកម្ពុជា។

ក្រៅពីការផលិតគ្រឿងទេស សម្រាប់ការងារផ្ទះបាយ សហគ្រាសរបស់អ្នកស្រី ស ស្រីហួច ក៏មានផលិតផលដែលផលិតចេញពីបន្លែ ផ្លែឈើជាច្រើនមុខទៀតដូចជា៖ ម្សៅផ្លែចេក ម្សៅមើមខ្ញី ម្សៅមើមពន្លៃ និងតែស្លឹកគ្រៃ ដែលចម្រាញ់ចេញពីបន្លែ ផ្លែឈើ របស់ប្រជាកសិករពិតៗផងដែរ។

សហគ្រាស រីងហ្គាខេម ជាសហគ្រាសខ្នាតតូចមួយ ដែលបានបង្កើតឡើងមកតាំងពីឆ្នាំ២០១៦មកម្ល៉េះ។ បច្ចុប្បន្នសហគ្រាសមួយនេះ មានទីតាំងស្ថិតនៅខណ្ឌកំបូល រាជធានីភ្នំពេញ៕

អត្ថបទ ៖ សួស សិត