សេដ្ឋកិច្ច

ARDB អំពាវនាវដល់ឈ្មួញ បន្តប្រមូលទិញដំឡូមី និងពោតពីកសិករ

បានផុស

២០ វិនាទី មុន

នៅ

ថ្ងៃចន្ទ ១៤ កក្កដា ២០២៥

ដោយ

លោក កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្ម (ARDB) បានអំពាវនាវជាថ្មីឱ្យឈ្មួញ ប្រមូលទិញដំឡូងមី និងពោតក្រហមពីកសិករ ខណៈធនាគារ ARDB នឹងបន្តគាំទ្រផ្នែកឥណទាន ដើម្បីដោះស្រាយបញ្ហាចំពោះមុខរបស់ប្រជាកសិករ និងលើកកម្ពស់សេដ្ឋកិច្ចជនបទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កៅ ថាច ប្រតិភូរាជរដ្ឋាភិបាលទទួកបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម បានអំពាវនាវក្នុងពេលចុះពិនិត្យមើលទីលានហាល និងឃ្លាំងស្តុកទុកដំឡូងមីក្រៀម ស្ថិតខេត្តឧត្តរមានជ័យ និងខេត្តបន្ទាយមានជ័យ នៅរសៀលថ្ងៃទី ១៣ ខែកក្កដា ឆ្នាំ ២០២៥។ លោកថា ប្រជាកសិករនៅខេត្តជាប់ព្រំដែនកម្ពុជា-ថៃ ជួបបញ្ហាប្រឈមរឿងទីផ្សារដំឡូងមី និងពោតក្រហម។

ជាមួយគ្នានោះដែរ លោក កៅ ថាច បានណែនាំឲ្យម្ចាស់ឃ្លាំង និងក្រុមអ្នកប្រមូលទិញត្រូវសហការជាមួយក្រុមហង្ស ហាវេស ដែលជាអ្នកនាំចេញធំ និងធនាគារ ARDB លើផ្នែកឥណទាន ដែលមានអត្រាការប្រាក់អនុគ្រោះផងដែរ។

លោក អិល ឈិញ ប្រធានសមាគមកសិករដំឡូងមីខ្មែរបានឱ្យដឹងថា ការបិទព្រំដែនរបស់ភាគីថៃបច្ចុប្បន្នមិនទាន់មានផលប៉ះពាល់ទៅលើវិស័យដំឡូងមីនៅកម្ពុជានោះទេ ដោយសារមិនមែនជារដូវប្រមូលផលច្រើន ប៉ុន្តែបើការបិទអូសបន្លាយដល់ដំណាច់ឆ្នាំ នឹងមានផលប៉ះពាលខ្លាំង។

លោកបានបន្ថែមថា៖ «រាល់ថ្ងៃយើងមិនបារម្ភទេ ព្រោះវាមិនមែនជាខែប្រមូលផលពេញលេញ តែបើការបិទនេះ វាអូសបន្លាយទៅដល់ខែ១១ ខែ១ ឬខែ២ បានយើងបារម្ភ»។

ដំឡូងមីត្រូវបានដាំដុះនាដើមរដូវចាប់ពីខែមីនា និងប្រមូលផលជាបន្តបន្ទាប់ចាប់ពីខែកក្កដា ជារៀងរាល់ឆ្នាំ។ ដោយឡែក ពោតក្រហមត្រូវបានដាំដុះចាប់ពីខែមេសា ជាបន្តបន្ទាប់ និងប្រមូលផលចាប់ពីខែកក្កដា។

យោងតាមរបាយការណ៍របស់អគ្គនាយកដ្ឋានកសិកម្ម នៅក្នុងឆមាសទី១ ឆ្នាំ ២០២៥ កម្ពុជាសម្រេចបានការនាំចេញដំឡូងមីស្រស់ចំនួន ១,៥ លានតោន ធ្លាក់ចុះ ៥,៤៩% និងចំណិតដំឡូងមីក្រៀមសម្រេចបានការនាំចេញចំនួន ១,២៩ លានតោន កើនឡើង ៥៧,៧៧%។

ក្នុងមួយឆ្នាំៗ ដំឡូងមីកម្ពុជា ត្រូវបានផលិតដោយកសិករលើផ្ទៃដីដាំដុះប្រមាណជាង ៨៤ ម៉ឺនហិកតា ផ្តល់ទិន្នផលស្រស់ប្រមាណ ១៥ លានតោន ជាមួយផលសេដ្ឋកិច្ចប្រមាណណ ១,២៥៥ លានដុល្លារ គិតត្រឹមឆ្នាំ២០២៤, ពោតក្រហមប្រមាណជាង ២៨ ម៉ឺនហិកតាផ្តល់ទិន្នផលស្រស់ប្រមាណ ១ លានតោន ផ្តល់ផលសេដ្ឋកិច្ចប្រមាណជាង ២០០ លានដុល្លារ៕