កម្ពុជាគួរមានយន្តការអ្វីខ្លះ ដើម្បីរក្សាតម្លៃគ្រាប់ស្វាយចន្ទីឱ្យមានស្ថិរភាព

តម្រូវការពិភពលោកសម្រាប់គ្រាប់ស្វាយចន្ទីឆៅកំពុងកើនឡើងជាលំដាប់ ដែលធ្វើឱ្យអាហ្វ្រិក​ខាងលិចក្លាយជាមជ្ឈ​មណ្ឌល​ប្រភពស្នូលដ៏សំខាន់ ដោយសារតែបរិមាណ និងគុណភាព​ផលិតខ្ពស់។ ទោះជាយ៉ាងណាក៏ដោយ ប្រភពដែលទទួលបានជោគជ័យ តម្រូវឱ្យ​មានការយល់​ដឹងស៊ីជម្រៅអំពីរដូវកាលប្រមូលផលក្នុងតំបន់ដែលមានឥទ្ធិពលដោយផ្ទាល់លើតម្លៃ គុណភាព និងប្រសិទ្ធភាពនៃខ្សែច្រវាក់ផ្គត់ផ្គង់។

កម្ពុជា ជាប្រទេសដាំស្វាយចន្ទីធំលេខពីរលើពិភពលោក ហើយក៏នឹងទទួលរងគ្រោះនូវតម្លៃ​គ្រាប់ឆៅប្រែប្រួលខ្លាំង ដ្បិត​កាប្រមូលផលស្វាយចន្ទី កម្ពុជាទន្ទឹមនឹងតំបន់​អាហ្វ្រិក​ខាងលិច ដែលមានបរិមាណ​ច្រើន ​និងតម្លៃទាប។

លោក អួន ស៊ីឡុត ប្រធានសមាគមស្វាយចន្ទីកម្ពុជា យល់ឃើញថា​ កម្ពុជាត្រូវមានយន្តការច្បាស់​លាស់ទើបរក្សាតម្លៃគ្រាប់ស្វាយចន្ទីឆៅឱ្យមានស្ថេរភាពជូនដល់កសិករ។ យន្តការគឺគាំ​ទ្រការ​បង្កើត​រោងចក្រកែច្នៃក្នុងស្រុកឲ្យបានច្រើនតាម​គោលនយោបាយជាតិស្ដីពីស្វាយចន្ទីដែលបានកំណត់ ២៥% រវាងឆ្នាំ ២០២២-២០២៧។

លោកបានបន្ថែមថា ការបង្កើតសួនឧស្សាហកម្មស្វាយចន្ទី របស់រាជរដ្ឋាភិបាល ជាចំណុចរបត់មួយ ដើម្បីគាំទ្រការកែច្នៃស្វាយចន្ទីក្នុងស្រុក។ លោកថា នៅពេលសួនកសិឧស្សាហកម្មស្វាយចន្ទីកើតឡើង ក្រុមហ៊ុនដែលបើករោងចក្រនៅតំបន់នេះអាចទទួលបាន ការអនុគ្រោះពន្ធ ព្រមទាំង មានហេដ្ឋារចនាសម្ព័ន្ធជាស្រេចដែលគាំទ្រដោយរដ្ឋ។

លោក អួន ស៊ីឡុត បានគូសបញ្ជាក់ថា​សួនកសិឧស្សាហកម្មស្វាយន្ទីនេះ អាចទាក់ទាញវិនិយោគបន្ថែម និងជួយជំរុញវិស័យកែច្នៃស្វាយចន្ទី បានយ៉ាងច្រើន បង្កើន​ប្រាក់ចំណូលសេដ្ឋកិច្ចជាតិ និងបង្កើតការងារ ព្រមទាំងផ្តល់តម្លៃបន្ថែមដល់កសិករ។

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា រាជរដ្ឋាភិបាលកំពុងអភិវឌ្ឍហេដ្ឋារចនាសម្ព័ន្ធ សួនឧស្សាហកម្មស្វាយចន្ទីនៅខេត្តកំពង់ធំ ដើម្បីជំរុញការ​អភិវឌ្ឍន៍វិស័យ​ស្វាយចន្ទីកម្ពុជា។

លោក ឃឹម ហ្វីណង់ បន្ថែមថា៖ «បច្ចុប្បន្នអ្វីៗ នៅល្អប្រសើរទាំងអស់ រាល់ទនិន្ន័យ​ដែលយើង​មាន មិនថាទិន្នផល តម្លៃ មិនថាគោលនយោបាយ និងការគាំទ្រពីរដ្ឋាភិបាល ទាំងសហគមន៍​កសិកម្មទំនើប ក៏ដូចជាការរៀបចំសួនឧស្សាហកម្មកែច្នៃ ដើម្បីតម្លៃបន្ថែម សុទ្ធតែជារឿងល្អ ខ្ញុំអត់មានឃើញសញ្ញាបារម្ភពាក់ព័ន្ធបញ្ហាតម្លៃចន្ទីទេ»។

លោក អាន តារា ប្រធានសហព័ន្ធស្វាយចន្ទីកម្ពុជា ប្រាប់កម្ពុជាថ្មីថា ទិន្នផល និងតម្លៃគ្រាប់​ស្វាយ​​​ចន្ទី មានភាពល្អប្រសើរនៅឆ្នាំនេះ ថ្វីបើមានការធ្លាក់ភ្លៀងច្រើន ដែលធ្វើឱ្យ​គុណ​ភាពចន្ទីធ្លាក់​ចុះ​បន្តិច ប៉ុន្តែតម្លៃទីផ្សារបានថេរល្អ ចន្ទីស្រស់​លក់បានតម្លៃជាង ៥ ពាន់រៀលក្នុងមួយគីឡូក្រាម និង​ចន្ទី​ស្ងួតជាង ៧ ពាន់រៀល ក្នុងមួយគីឡូក្រាម។

លោក តូច ប៊ុនហួរ រដ្ឋលេខាធិការក្រសួងកសិកម្ម មានប្រសាសន៍ថា នៅឆ្នាំនេះ គ្រាប់ស្វាយ​ចន្ទី​សើម នៅដើមរដូវប្រមូលផល មានតម្លៃរហូត ៦៥០០រៀល ក្នុងមួយគីឡូក្រាម និងមានតម្លៃចន្លោះ ៤៨០០-៥២០០ រៀល ក្នុងមួយគីឡូក្រាម ទៅតាមតំបន់ និង​គុណ​​ភាព​គ្រាប់ បើ​ប្រៀប​​​ធៀបរយៈពេល៥ឆ្នាំ ចាប់ឆ្នាំ២០២១-២០២៥ គឺតម្លៃគ្រាប់ស្វាយ​ចន្ទី​ឆ្នាំ​​២០២៥​នេះ មាន​តម្លៃ​ខ្ពស់​ជាងគេ ដោយសារមានទីផ្សារល្អ។

យោងតាមក្រសួងកសិកម្ម នៅឆមាសទី១ ឆ្នាំ ២០២៥ កម្ពុជានាំចេញគ្រាប់ស្វាយចន្ទីឆៅចំនួនជាង ៥៧ ម៉ឺន ៨ ពាន់តោន កើនឡើង ៥,៩៨% ធៀបនឹងរយៈពេលដូចគ្នា នៅឆ្នាំ ២០២៤។

នៅឆ្នាំ ២០២៤ កម្ពុជា​សម្រេច​​បានការ​ប្រមូលទិន្នផលគ្រាប់​ស្វាយ​ចន្ទី​ចំនួន ៨៥ ម៉ឺនតោន ក្នុង​នោះ​នាំចេញ​គ្រាប់ឆៅ​បាន​ចំនួន ៨១ ម៉ឺន ៥ ពាន់តោន កើន​ឡើង ២១% គិត​ជា​ទឹក​ប្រាក់​​ ១ ពាន់ ១៥០ លាន​ដុល្លារ កើន ២៦,១៥%។ ក្នុងនោះ​នាំចេញ​ទៅវៀត​ណាមចំនួន ៧៩ ម៉ឺន ៥ ពាន់​តោន។ នេះបើយោងតាមរបាយការណ៍សមាគមស្វាយចន្ទីកម្ពុជា។

យោងតាមក្រសួងកសិកម្ម កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា ក្នុងនោះ​ខេត្ត​ចំនួន ១០ របស់កម្ពុជា មានផ្ទៃដី​ដាំដុះ​ស្វាយ​​​​​ចន្ទីច្រើនជាងគេរួមាន ខេត្តកំពង់ធំទំហំ ១៤៧ ៧០៣ ហិកតា ខេត្តក្រចេះ ១០២ ៥២០ ហិកតា រតនគិរី ៩៧ ២៥៨ ហិកតា កំពង់ចាម ៤៦ ៥៨២ ហិកតា ស្ទឹងត្រែង ៤៤ ២៥០ ហិកតា ខេត្ត​ត្បូងឃ្មុំ ៣៦ ៤០៣ ហិកតា ខេត្តសៀមរាប ៣៥ ៩១៤ ហិកតា ខេត្តព្រះវិហារ ២៨ ៩៦៥ ហិកតា ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា៕

អត្ថបទ៖ ឡេង ដេត