កម្ពុជានឹងបង្កើតមជ្ឈមណ្ឌលពាណិជ្ជកម្មឯកជនកម្ពុជានៅ​កូរ៉េខាងត្បូងដើម្បីបង្កើនការដោះដូរពាណិជ្ជកម្ម និងវិនិយោគ

ក្រសួងពាណិជ្ជកម្មបានកំពុងចុះពិនិត្យទីតាំងដើម្បីបង្កើតមជ្ឈមណ្ឌលពាណិជ្ជកម្មឯកជនកម្ពុជានៅទីក្រុងសេអ៊ូល នៃសាធារណរដ្ឋកូរ៉េដើម្បីដាក់តាំងបង្ហាញផ្សព្វផ្សាយផលិតផលខ្មែរ និងព័ត៌មានអំពីវិស័យពាណិជ្ជកម្ម វិនិយោគ ទេសចរណ៍ និងវប្បធម៌របស់កម្ពុជា ជូនធុរជន និងវិនិយោគិនកូរ៉េ ស្របពេលដែលប្រទេសទាំងពីរបានកំពុងអនុវត្តន៍នូវកចិ្ចព្រមព្រៀងពាណិជ្ជកម្មសេរី។

លោក ស៊ាង ថៃ រដ្ឋលេខាធិការក្រសួងពាណិជ្ជកម្ម បានដឹកនាំគណៈប្រតិភូក្រសួងពាណិជ្ជកម្ម ចុះត្រួតពិនិត្យទីតាំងជាក់ស្តែងកាលពីថ្ងៃទី៣១ ខែកក្កដា នៃការបង្កើតមជ្ឈមណ្ឌលពាណិជ្ជកម្មឯកជននេះ ដើម្បីដាក់តាំងបង្ហាញផ្សព្វផ្សាយផលិតផលខ្មែរ និងព័ត៌មានអំពីវិស័យពាណិជ្ជកម្ម វិនិយោគ ទេសចរណ៍ និងវប្បធម៌របស់កម្ពុជា ​។

ក្នុងដំណើរពិនិត្យទីតាំងនោះ លោកក៏បានជួបពិភាក្សាការងារជាមួយ លោក លន សាបឿន ភារធារី និងទីប្រឹក្សាស្ថានទូត នៃព្រះរាជាណាចក្រកម្ពុជា ប្រចាំសាធារណរដ្ឋកូរ៉េ ដើម្បីពិភាក្សាពីអំពីគោលបំណងនៃបង្កើតមជ្ឈមណ្ឌលពាណិជ្ជកម្មខាងលើ។

លោកភារធារី បានគាំទ្រក្នុងការបង្កើតមជ្ឈមណ្ឌលពាណិជ្ជកម្មឯកជនកម្ពុជានៅទីក្រុងសេអ៊ូល ដែលនឹងជំរុញធុរជន វិនិយោគិនកូរ៉េ ទៅធ្វើធុរកិច្ច និងបណ្តាក់ទុននៅកម្ពុជា ក៏ដូចជាជំរុញកំណើនពាណិជ្ជកម្មទ្វេភាគី រវាងព្រះរាជាណាចក្រកម្ពុជា និងសាធារណរដ្ឋកូរ៉េ ឱ្យមានការកើនឡើងជាបន្តបន្ទាប់នាពេលអនាគតខាងមុខ។

ប្រទេសទាំងពីរបានអនុវត្តន៍នូវកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ (CKFTA) ដែលបានចូលជាធរមានក្នុងឆ្នាំ ២០២២ សំដៅធ្វើយ៉ាងលើកកម្ពស់ការដោះដូរពាណិជ្ជកម្ម និងវិនិយោគឱ្យកាន់តែច្រើន។

យោងតាមអគ្គនាយកដ្ឋានគយ និងរដ្ឋាករ (GDCE) ​ ពាណិជ្ជកម្មទ្វេភាគីរវាងកម្ពុជា និងកូរ៉េខាងត្បូង បានសម្រេចបានជាង ៤៣៨ លានដុល្លារក្នុងឆមាសទី១ ឆ្នាំ ២០២៥ ​កើនឡើង ១០ ភាគរយបើធៀបនឹងរយៈពេលដូចគ្នាកាលពីឆ្នាំមុន​​ កើនឡើងពីជាង ៣៩៦ លានដុល្លារ ​។ ក្នុងនោះការនាំចេញរបស់កម្ពុជាទៅកាន់កូរ៉េខាងត្បូងបាន​ធ្លាក់ចុះបន្តិចជាង២ ភាគរយ​ ដែលមានទឹកប្រាក់ជិត១៥២ លានដុល្លារ និង ការ​នាំ​ចេញ​របស់​កូរ៉េ​ខាង​ត្បូង​មក​កម្ពុជា​បាន​កើន​ឡើងជិត១៩​ភាគ​រយ មានទឹកប្រាក់​២៨៦​លាន​ដុល្លារ៕