សេដ្ឋកិច្ច

កម្ពុជារកចំណូលបានជិត ៤ ពាន់លានដុល្លារ ពីការនាំចេញទៅកាន់ប្រទេសសមាជិក ASEAN ត្រឹមរយៈពេល៨ខែ

បានផុស

៩ ខែ មុន

នៅ

ថ្ងៃអង្គារ ១៦ កញ្ញា ២០២៥

ដោយ

កម្ពុជារកប្រាក់ចំណូលបានប្រមាណ ៣,៩៨ ពាន់លានដុល្លារ ពីការនាំចេញទំនិញទៅបណ្ដាប្រទេសជាសមាជិក ASEAN ក្នុងរយៈពេល ៨ ខែ ឆ្នាំ ២០២៥ កើនឡើង ១៦,១៨ ភាគរយ បើធៀបនឹងរយៈពេលដូចគ្នាឆ្នាំ២០២៤ ដែលមានទឹកប្រាក់ ៣,៤២ ពាន់លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដោះដូរទំនិញរបស់កម្ពុជាជាមួយបណ្តាប្រទេសសមាជិក ASEAN មានទឹកប្រាក់សរុប ១០,៩៦ ពាន់លានដុល្លារ ក្នុងរយៈពេល៨ខែ ឆ្នាំ២០២៥ កើន ៤,៥ ភាគរយ បើប្រៀបធៀបនឹងរយៈពេលដូចគ្នានៃឆ្នាំមុន។ នេះបើតាមរបាយការណ៍របស់ក្រសួងពាណិជ្ជកម្មចេញផ្សាយកាលពីថ្ងៃច័ន្ទ។

យោងតាមរបាយការណ៍របស់ក្រសួងពាណិជ្ជកម្ម គិតចាប់ពីខែមករាដល់ខែសីហាឆ្នាំ២០២៥ កម្ពុជាបាននាំចេញទំនិញ មានតម្លៃ ៣,៩៨ ពាន់លានដុល្លារ ទៅកាន់បណ្ដាប្រទេសជាសមាជិក ASEAN រួមមាន ប្រទេសឥណ្ឌូនេស៊ី ម៉ាឡេស៊ី ហ្វីលីពីន សឹង្ហបុរី ថៃ ប៊្រុយនេ វៀតណាម ឡាវ និងប្រទេសភូមា។

ជាមួយគ្នានេះដែរ ការនាំចូលប្រទេសជាសមាជិកមានទឹកប្រាក់ប្រមាណ ៦,៩៨ ពាន់លានដុល្លារ ធ្លាក់ចុះ ១,១៦ ភាគរយ ធៀបនឹងរយៈពេលដូចគ្នាឆ្នាំ២០២៤ដែលមានទឹកប្រាក់ចំនួន ៧ ពាន់លានដុល្លារ។

លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម មានប្រសាសន៍ថា ការកើនឡើងនៃការដោះដូរទំនិញរបស់កម្ពុជាជាមួយប្រទេសសមាជិកអាស៊ានឆ្លុះបញ្ជាំងពីការងើបឡើងវិញនៃតម្រូវការក្នុង ក្នុងតំបន់ និងពិភពលោក។

កម្ពុជាបាននាំចេញកសិផល សម្លៀកបំពាក់ ស្បែកជើង កាបូប គ្រឿងអេឡិចត្រូនិក និងកង់ ទៅកាន់ប្រទេសអាស៊ាន ខណៈដែលការនាំចូលមានដូចជាចំណីអាហារ ភេសជ្ជៈ ឧបករណ៍អគ្គិសនី និងអេឡិចត្រូនិក សម្ភារសំណង់ គ្រឿងយន្តកសិកម្ម និងយានជំនិះ៕

អត្ថបទ៖ ឡេង ដេត