ឥទ្ធិពលអាក្រក់ ៥ យ៉ាង របស់ព័ត៌មានក្លែងក្លាយ ដែលគួរស្វែងយល់

ការផ្សព្វផ្សាយនិងចែករំលែកព័ត៌មាន ត្រូវការពិនិត្យពិច្ច័យឱ្យបានច្បាស់ជាមុនសិន ព្រោះវាអាចមានផលប៉ះពាល់ជាច្រើនដល់ខ្លួនអ្នក និងសង្គមទាំងមូល។ សូមប្រុងប្រយ័ត្នឱ្យបានខ្ពស់ជាមួយព័ត៌មានក្លែងក្លាយ ដោយសារបច្ចុប្បន្នមានព័ត៌មានជាច្រើនបានផ្សព្វផ្សាយយ៉ាងអាណាធិបតេយ្យ ខ្វះភាពត្រឹមត្រូវនិងលម្អិត។ តើអ្នកដឹងទេថា ព័ត៌មានក្លែងក្លាយបានជះឥទ្ធិពលអាក្រក់យ៉ាងណាខ្លះ?

១. បង្កចលាចលសង្គម

ព័ត៌មានមិនពិតដែលគ្មានប្រភពច្បាស់លាស់មួយចំនួន អាចបង្កើតចលាចលដល់សង្គម។ ក្នុងវិបត្តិកូវីដ-១៩នេះ ប្រជាជនខ្មែរតែងតាមដានព័ត៌មានដែលពាក់ព័ន្ធ និងឆាប់ជឿ ដូច្នេះព័ត៌មានក្លែងក្លាយទាំងនោះ អាចបង្ករភាពរញ៉េរញ៉ៃក្នុងសង្គម បើវាត្រូវបានចែកចាយច្រើន។

២. បង្កើតក្តីព្រួយបារម្ភដល់មហាជន

ពាក់ព័ន្ធជាមួយផ្លូវចិត្តពិតជាសំខាន់ណាស់ កាលណាបើព័ត៌មានក្លែងក្លាយត្រូវបានជ្រាបចូលទៅក្នុងបណ្តាញផ្សព្វផ្សាយ វាអាចប៉ះពាល់ដល់អារម្មណ៍របស់សាធារណជន។

៣. ប៉ះពាល់ផ្លូវចិត្តផ្ទាល់ខ្លួន

លោកជំទាវ ឱ វណ្ណឌីន បានមានប្រសាសន៍ថា បើកាលណាអ្នកអានព័ត៌មានប្រឌិត ព័ត៌មានធ្វើឱ្យរន្ធត់ច្រើនពេក ក្នុងរយៈពេល ២ម៉ោងនិង ២សប្តាហ៍ជាប់គ្នា នោះមនុស្សអាចជួបនឹងវិបត្តិផ្លូវចិត្ត។

៤. គម្រាមកំហែងសន្តិសុខជាតិ

កាលណាព័ត៌មានត្រូវបានបំប៉ោងដោយគ្មានភាពជាក់លាក់ និងការពិត ជាពិសេសចេញពីប្រភពមិនច្បាស់លាស់ នោះវាអាចប៉ះពាល់ដល់សន្តិសុខសង្គម និងប្រទេសជាតិទាំងមូល។

៥. បង្អាក់ការអភិវឌ្ឍប្រទេស

នេះជាចំណុចសំខាន់បំផុត ព្រោះប្រជាជនមានសិទ្ធគ្រប់គ្រាន់ក្នុងការទទួលបានព័ត៌មានពិតដើម្បីពង្រីកចំណេះដឹង និងជួយអភិវឌ្ឍប្រទេសជាតិ។ ករណីព័ត៌មានក្លែងក្លាយបញ្ជ្រាបច្រើនលើសលប់ វាគឺជាឧបសគ្គដ៏ធំក្នុងការបង្អាក់ប្រទេសពីការអភិវឌ្ឍ៕

អត្ថបទ៖ Jacqueli

ចុចអាន៖ យុវតីដែលជាស្ថាបនិកផេក Switching-ចម្លាស់ ប្រាប់គន្លឹះងាយៗកត់សម្គាល់ព័ត៌មានក្លែងក្លាយ

ចុចអាន៖ ឈឺក្បាល​នឹង​ទទួល​ព័ត៌មាន​ក្លែងក្លាយ​ពី​កូវីដ នេះ​វិធី​ងាយៗ​មិន​ឲ្យ​ស្ត្រេស​ខ្លាំង