ម្ចាស់ផលិតកម្ម LD ថា ឈប់បញ្ចាំងរឿងថៃជាដំណឹងល្អ ដ្បិតអីភាពយន្តថៃមួយ គ្រាន់តែមានតារាខ្មែរសម្តែង ក៏គេមិនគាំទ្រដែរ

ផលិតករភាពយន្តខ្មែរល្បីឈ្មោះលោក លៀក លីដា បានបង្ហាញនូវការគាំទ្រយ៉ាងពេញទំហឹង បន្ទាប់ពីសម្តេចតេជោ ហ៊ុន សែន បានជូនយោបល់ទៅរាជរដ្ឋាភិបាលពិចារណាបញ្ឈប់ការចាក់ផ្សាយខ្សែភាពយន្តរបស់ថៃ លើកញ្ចក់ទូរទស្សន៍នៅកម្ពុជាទាំងអស់។

ផលិតករខ្មែរលោក លៀក លីដា បានចាត់ទុកថានេះ គឺជាដំណឹងល្អសម្រាប់ផលិតករខ្មែរ និងសិល្បករខ្មែរទាំងអស់ព្រោះថៃ ពិតជាជ្រុលនិយមណាស់។ លោកលើកឡើងដែរថា “រឿងថៃមួយ ដែលយកតារាសម្ដែងខ្មែរកញ្ញា ញ៉ែម ស្រីពេជ្រ យកទៅសម្ដែងជាតួឯកដែលផលិតដោយផលិតករថៃ ក៏គេមិនគាំទ្រដែរ តែបើរឿងគេវិញចូលមកយើងតួសម្ដែងគេយើងគាំទ្រទាំងអស់”។ លោកបន្ថែមថា “នេះជារឿងដែលគេមិនគាំទ្រព្រោះមានតារាសម្តែងខ្មែរយើង”។

យ៉ាងណា ជុំវិញដំណឹងនៃការបញ្ឈប់ការចាក់ផ្សាយភាពយន្តថៃនេះ ក៏មានការបញ្ចេញមតិពីអ្នកប្រើប្រាស់បណ្តាញសង្គមហ្វេសប៊ុកដែរថាសង្ឃឹមថា ថ្នាក់ដឹកនាំលោក​ឧកញ៉ាធំៗ ងាកមកជួយឧបត្ថម្ភគាំទ្រការផលិតភាពយន្តខ្មែរ បិទរឿងគេក្នុងទូរទស្សន៍ ហើយក៏ត្រូវមានរឿងភាគខ្មែរយើងកាន់តែច្រើនដែរ។

បើតាមការជូនដំណឹងរបស់ក្រសួងព័ត៌មាន និងក្រសួងវប្បធម៌ ទៅកាន់ស្ថានីយ៍ទូរទស្សន៍ទាំងអស់នៅកម្ពុជា គឺត្រូវចូលរួមបញ្ឈប់ការចាក់ផ្សាយរឿងថៃគ្រប់ប្រភេទលើកញ្ចក់ទូរទស្សន៍របស់ខ្លួនជាកំហិត ចាប់ពីថ្ងៃនេះតទៅ។

ជាមួយគ្នានេះដែរ គេសង្កេតឃើញមានមហាជនរួមទាំងសិល្បករ-សិល្បការិនីខ្មែរជាច្រើន បានបង្ហាញការគាំទ្រចំពោះចំណាត់ការនៃការរបស់សម្តេចតេជោ ហ៊ុន សែន ជូនយោបល់បញ្ឈប់ការចាក់បញ្ចាំងខ្សែភាពយន្តថៃនៅកម្ពុជា៕ ចាន់រ៉ា