កំពូលស្រីស្អាតប្រុសសង្ហា ឆ្នាំនេះ បានទៅលើ BTS និង BLACKPINK ច្រើនជាងគេ

ថ្មីៗនេះ គេហទំព័រ Special Awards បានប្រកាសឈ្មោះកំពូលស្រីស្រស់ប្រុសសង្ហា ប្រចាំឆ្នាំ២០២២ បន្ទាប់ពីបើកការស្ទង់មតិរយៈពេល ២ខែកន្លងទៅ។ គួរឲ្យកត់សម្គាល់ តារាកូរ៉េច្រើនរូប រាប់តាំងពីតារាចម្រៀងហូតដល់តារាសម្ដែង បានជាប់ឈ្មោះនៅក្នុងបញ្ជីនេះច្រើនជាងគេ ជាពិសេសសមាជិក BTS និង BLACKPINK។

V (BTS)

តារាប្រុសរូបនេះ ត្រូវបានគេដាក់ឈ្មោះជាស្ដេចសម្រស់របស់ K-pop និងត្រូវបានសាធារណជនបោះឆ្នោតឱ្យជាប់ជាបុរសសង្ហាលេខ១ ប្រចាំឆ្នាំ ទាំងនៅលើតារាងក្នុងស្រុក និងអន្តរជាតិ។

Jungkook (BTS)

តារាពហុជំនាញរូបនេះ មានទម្រង់មុខសមសួនខ្លាំងជាមួយនឹង បបូរមាត់តូច កែវភ្នែកធំៗ ពិតជាធ្វើឲ្យអ្នកគាំទ្រសរសើរមិនដាច់ពីមាត់នោះទេ។ ដូច្នេះហើយ ទើបបានJungkook អាចជាប់ឆ្នោត ក្លាយជាប្រុសស្អាតលំដាប់ទី២ នាឆ្នាំ២០២២នេះ។

Jisoo (BLACKPINK)

បងស្រីធំរបស់ BLACKPINK រូបនេះ បានចូលក្នុងតារាងកំពូលទី៤ នៃបញ្ជីមនុស្សស្រីស្អាតបំផុតនៅលើពិភពលោក ក្នុងឆ្នាំ២០២២។ នាងត្រូវបានគេដាក់ឈ្មោះជាតារាស្រីម្នាក់ដែលមានសម្រស់ប្រៀបបាននឹងទេពធីតា ក្នុងជំនាន់របស់នាង។

Jennie (BLACKPINK)

Jennie ត្រូវ​បាន​អ្នក​លេង​អ៊ីនធឺណិត​ប្រដូច​ទៅ​នឹងធីតាសួគ៌ ព្រោះតែសម្រស់​ពីធម្មជាតិរបស់នាង កម្រមានតារាស្រីរូបណាមានដូចនាងណាស់។ នាងជាតារាស្រីគ្មានការកែកុន និងជាស្រីស្អាតទី៥ ក្នុងបញ្ជីបុរស-ស្ត្រីស្អាតបំផុត នាឆ្នាំនេះ។

Bright Vachirawit

តារាប្រុសរូបនេះ បានជាប់ចំណាត់ថ្នាក់ទី៧ ក្នុងបញ្ជីកំពូលស្រីស្រស់ប្រុសសង្ហា ឆ្នាំ២០២២។ លោកជាជនជាតិថៃ-អាមេរិក ដែលមានសម្រស់មិនអន់ជាងតារា K-pop ក្នុងបញ្ជីនេះនោះទេ។

Lisa (BLACKPINK)

Lisa ធ្លាប់កាន់តំណែងរាជិនីកំពូលសម្រស់ នៅលើតារាងសម្រស់ជាច្រើនមកហើយ នាពេលកន្លងទៅ។ ជាមួយនឹងកម្ពស់រហូតដល់ ១៦៧សង់ទីម៉ែត្រ បូករួមនឹងរាងស្លីមស្រឡូន សមាជិកក្រុម BLACKPINK រូបនេះ ត្រូវបានមហាជនដាក់នាមជានារីដ៏ស៊ិចស៊ី ដែលស្លៀកពាក់អ្វីក៏សមឥតទាស់។

Jimin (BTS)

Jimin ជាសមាជិកម្នាក់នៃក្រុម BTS ដែលជាប់ចំណាត់ថ្នាក់លេខ៩ ក្នុងបញ្ជី។ Jimin ត្រូវបានគេផ្តល់កិត្តិយសជាមនុស្សដែលមានសម្រស់ពីធម្មជាតិ ដោយមិនឆ្លងកាត់មុខកាំបិត នៅក្នុងវិស័យ K-pop ។ ដោយសារភ្នែកមូលធំ និងស្នាមញញឹមដ៏ស្រទន់ លោកបានក្លាយជាបុរសសិចស៊ី និងទាក់ទាញបំផុត។

Win Metawin

តារាថៃរូបនេះ ក៏មិនអន់ជាងតារាកូរ៉េប៉ុន្មានដែរ ខណៈឆ្នាំ២០២២ លោកបានឈរនៅចំណាត់ថ្នាក់ទី ១០ នៃបញ្ជីកំពូលស្រីស្រស់ប្រុសសង្ហា។ Win ត្រូវអ្នកនិយមលេងអ៊ីនធឺណេត ពេញចិត្តពេញថ្លើម ហើយបោះឆ្នោតឱ្យយ៉ាងច្រើនសន្ធឹកសន្ធាប់។

Lee Min Ho

​តារា​សម្ដែង Lee Min Ho ​ទទួល​បាន​ចំណាត់​ថ្នាក់ទី ១៥ ​សម្រាប់ឆ្នាំនេះ។ ថ្វីត្បិតមិនជាប់លេខកំពូលលើគេពិតមែន ប៉ុន្តែលោកមិនធ្លាប់ធ្លាក់ពីតារាងកំពូលប្រុសសង្ហានោះទេ។

ក្រៅពីតារាប្រុសស្រីខាងលើ កំពូលសម្រស់របស់ពិភពលោកក្នុងឆ្នាំ ២០២២ ក៏មានវត្តមានតារាល្បីៗនៅអាស៊ីជាច្រើនទៀតដូចជា៖ J-hope​, Jin និង RM សមាជិក BTS, Hueningkai សមាជិក TXT, Cha Eun Woo, Jackson សមាជិក GOT7។ល៕

ប្រែសម្រួល៖ សន្យា

ចុចអាន៖ Dara អតីតសមាជិកក្រុម 2NE1 ជាប់ឈ្មោះជា «រាជិនីនៃម៉ូដ​សក់ប្លែកៗ»  

ចុចអាន៖ តារា ថៃ ៧ ដួង ជម្នះឧបសគ្គក្នុងវិស័យ K-Pop រហូតមានឈ្មោះល្បីល្បាញ ទូទាំងពិភពលោក