មុនក្លាយជារាជិនីសំឡេងផ្អែមប្រចាំប្រទេស មាស សុខសោភា ឈ្នះពានរង្វាន់អ្វីខ្លះ?

ម្ចាស់បទ “ដោះសារ” អ្នកនាង មាស សុខសោភា ទម្រាំក្លាយជារាជិនីសំឡេងផ្អែមប្រចាំប្រទេស តើវិស័យសិល្បៈអ្នកនាងយ៉ាងដូចម្ដេច ហើយតើអ្នកនាងធ្លាប់បានឈ្នះពានរង្វាន់អ្វីខ្លះ?

បើនិយាយពីតារាចម្រៀងសំឡេងផ្អែម លោកអ្នកប្រាកដជានឹកឃើញដល់អ្នកនាង មាស សុខសោភា មុនគេ ដែលប្រជាជនខ្មែរជាច្រើនទទួលស្គាល់នឹងបានដាក់រហស្សនាមឲ្យអ្នកនាងថា ជារាជិនីសំឡេង ដោយសារទេពកោសល្យ និងទឹកដមសំឡេងដ៏ក្រអួនក្រអៅចាក់ដល់បេះដូងអ្នកស្ដាប់គ្រប់ស្រទាប់វណ្ណៈ។

មាស សុខសោភា កើតនៅថ្ងៃទី ២៩ ខែមករា ឆ្នាំ ១៩៨៤ នៅខេត្តកំពង់ស្ពឺ អ្នកនាងមានបងប្អូនចំនួន ៣ នាក់ ហើយសោភាជាកូនទី ២ ក្នុងគ្រួសារ។ នៅឆ្នាំ ១៩៩០ ក្រោយផ្លាស់ប្ដូរទីលំនៅពីកំពង់ស្ពឺមកខេត្តកណ្ដាលមួយរយៈ ស្រាប់តែឪពុករបស់អ្នកនាងបានលាចាកលោក ធ្វើឲ្យគ្រួសារជួបវិបត្ដិសេដ្ឋកិច្ច ហើយបន្ទុកទាំងអស់ធ្លាក់មកលើ សោភា និងបងប្រុស។ ដោយសារជីវភាពកាន់តែលំបាក អ្នកនាង មាស សុខសោភា បានបញ្ចប់ការសិក្សានៅថ្នាក់ទី ១០ ដើម្បីដើរច្រៀងតាមការវិធី និងរោងការផ្សេងៗជាមួយបងប្រុស។ នៅ​ឆ្នាំ ២០០២ មាស សុខសោភា បានបន្ត​ការដើរ​ច្រៀង​តាម ភោជនីយដ្ឋាន និង​មជ្ឈមណ្ឌល​កម្សាន្ត​ក្នុង​ក្រុងភ្នំពេញ រហូតដល់​នាង​មានឱកាស​ច្រៀង​នៅផលិតកម្ម​ រស្មី​ស្ទឹង​សង្កែ ក្នុង​ឆ្នាំ ២០០៤​ ជាលើកដំបូង។

ដោយការខិតខំប្រឹងប្រែង បូករួមជាមួយទេពកោសល្យ និងអំណាយទានពីធម្មជាតិ អ្នកនាង មាស សុខសោភា ក៏បានប្រជាជនកម្ពុជាពេញចិត្តស្រលាញ់គាំទ្រខ្លាំង នឹងទទួលស្គាល់ពីសមត្ថភាពសំឡេងរហូតដាក់ហស្សនាមជារាជិនីសំឡេងផ្អែមប្រចាំប្រទេស។ លើសពីនេះ ហេតុផលមួយចំនួនបានជំរុញឲ្យអ្នកនាងបានទទួលសមិទ្ធផលជាច្រើនមានដូចជា៖ បទ “ដោះសារ” បាន​ក្លាយជា Hits album ដែលមាន​អ្នក​ចាក់​ស្ដាប់​ច្រើន​បំផុត​នៅក្នុង​ប្រទេស​កម្ពុជា ដែល​ក្លាយជា​បទ Hots Song នៅលើ​កញ្ចក់​ទូរទស្សន៍ (TV music show) ជាប់​ក្នុង​កំពូល​បទ​ចម្រៀង ក្នុង​ទូរទស្សន៍​ប៉ុស្តិ៍​លេខ​ ៩ Top1 Music Cambodia TV9 និង​បាន​ជាប់​ក្នុង Top1 Music Radio FM.97 ឆ្នាំ ២០០៨ ដោយ Apsara Radio FM 97 ផងដែរ។ នៅក្នុងឆ្នាំ ២០១២ និង ២០១៣ មាស សុខសោភោ បានឈ្នះពានរង្វាន់ ២ ឆ្នាំជាប់គ្នា គឺ The Female Singer Of The Year ក្នុងកម្មវិធីអាណាចក្រតារា និងនៅឆ្នាំ ២០១៧-២០១៨ សោភា ក៏បានឈ្នះពាន ២ ឆ្នាំជាប់គ្នាទៀត គឺ Best Female Song Of The Year ក្នុងកម្មវិធី NRG Music Awards។

គួររំលឹកថា បច្ចុប្បន្នអ្នកនាង មាស សុខសោភា បានជ្រកក្រោមផលិកម្ម រាម ដែលមានអ្នកនាងស្រីអូនជាម្ចាស់ផលិតកម្ម និងបានចេញបទចម្រៀងដូចជា ត្រលប់ ឆ្នេរអនុស្សារ ចងចាំ អារម្មណ៍ ចានស្រាក់ បុស្បាផ្កាបង និងមានបទចម្រៀងជាច្រើនទៀត៕

អត្ថបទ៖ ផានិត