ចម្រៀងរួមគ្នាលើកដំបូង! នីសា និង សូលីកា នៅតែរក្សាបានតំណែងរាជិនីមនោសញ្ចេតនាក្នុងចិត្តអ្នកគាំទ្រ

រាជិនីមនោសញ្ចេតនា ២ដួង អ្នកនាង សុគន្ធ និសា និងអ្នកនាង ពេជ្រ សូលីកា ទើបតែបញ្ចេញចម្រៀងថ្មីរបស់ខ្លួនដែលជាការច្រៀងរួមគ្នាជាលើកដំបូង នៅរសៀលថ្ងៃទី០៣ ខែកញ្ញានេះ ក្នុងនាមជាតារាចម្រៀងឯករាជ្យ។ ខណៈតាមរយៈ ការចាប់គូចម្រៀងបទមនោសញ្ចេតនាលើកដំបូងនេះ តារាចម្រៀងស្រីល្បីឈ្មោះទាំងពីរដួង ធ្វើឱ្យមហាជនដែលជាអ្នកគាំទ្រ បង្ហាញការពេញចិត្ត និងកោតសរសើរ។

ជាច្រើនឆ្នាំលើវិថីសិល្បៈ តារាចម្រៀងស្រីល្បីឈ្មោះទាំងពីរដួង បានសាងប្រជាប្រិយភាពតាមរយៈបទចម្រៀងរាប់រយសិបបទទៅហើយ ខណៈបទចម្រៀងភាគច្រើន សុទ្ធសឹងទទួលបានការគាំទ្រខ្លាំង ពិសេសបទមនោសញ្ចេតនាតែម្តង។

ដូចនេះ ដើម្បីបន្តបំពេរអារម្មណ៍អ្នកគាំទ្រ ក៏ដូចជាផ្តល់ចំណីអារម្មណ៍ថ្មី តារាចម្រៀងស្រីទាំង២ដួង សម្រេចចេញចម្រៀងរួមគ្នាជាមួយនឹងបទចម្រៀងមនោសញ្ចេតនាចាក់ដោតអារម្មណ៍ គឺបទ “ពេលយើងបែកគ្នា” ដែលឆ្លុះបញ្ចាំងក្តីស្នេហ៍ដ៏ខកចិត្ត ជាមួយនឹងទឹកដមសំឡេងពីរោះរណ្តំ ធ្វើឱ្យអ្នកគាំទ្រ ទាំងពោលសរសើរ និងបង្ហាញអារម្មណ៍ចាក់ដោតតាមបទចម្រៀង។