ពូ ឃ្លាំង ចេញមុខអំពាវនាវ និងស្នើលុបបំបាត់ការលក់សាច់សុនក

តារាចម្រៀងរ៉េប ពូ ឃ្លាំង បានចេញមុខធ្វើការអំពាវនាវ និងស្នើឱ្យមានការបញ្ឈប់ការលក់ដូរ ឬបរិភោគសាច់សត្វសុនក (ឆ្កែ) ខណៈលោកមើលឃើញថា បច្ចុប្បន្នមានជនខិលខូចមួយចំនួនកំពុងតែលួចទាក់សត្វនេះជាបន្តបន្ទាប់។

ពូ ឃ្លាំង បានរៀបរាប់ក្នុងខ្លឹមសារស្នើថា៖ “តោះ ពួកយេីងនាំគ្នាបំផុសគំនិត និងរួមគំនិតសម្រាប់អ្នកដែលស្រឡាញ់សត្វសុនកទាំងអស់គ្នា ចូលរួមគ្នាបំផុសគំនិត ដោយការ Share ពាក្យថា សូមលុបបំបាត់ការលក់សាច់សុនក សូមដាក់ទោសជនណាដែលបានទាក់សុន”។

លោកបន្តទៀតថា៖ “ខ្ញុំចង់ឱ្យប្រទេសខ្មែរយេីងទាំងមូល យកគំរូដាក់វិធានការ វិន័យ និងច្បាប់យ៉ាងតឹងរឹងដូចខេត្តសៀមរាប តាមបទបញ្ជារបស់ បង ឯកឧត្តម ទៀ សីហា  អំពីរឿងសត្វសុនកខាងលេីនេះ និងមានការហាមឃាត់ទៅលេីការលក់សាច់សុនក ដែលខុសច្បាប់ ជាមួយការដាក់ទោសទៅដល់អ្នកដែលដេីរទាក់សុនករាល់ថ្ងៃ ព្រោះនេះប្រៀបដូចជាអំពេីចោរកម្មដែលលួចរបស់គេដូចគ្នា”។

ពូ ឃ្លាំង បានបន្ថែមថា សុនកប្រៀបដូចជាសមាជិកគ្រួសារ និងទ្រព្យសម្បត្តិកឯកជនរបស់អ្នកដែលស្រឡាញ់ តែត្រូវគេលួចទាក់ទៅបាត់ ដែលមិនគួរបន្តទ្រាំទទួលយកភាពអយុត្តិធម៌នេះទៀត។ លោករីករាយនឹងធ្វេីការជាមួយក្រុមអ្នកស្រឡាញ់សត្វ ក៏ដូចជាអង្គការដែលពាក់ព័ន្ធរឿងសត្វសុនកនេះ ជួយក្នុងការបំផុសគំនិតព្រមទាំងការផ្សព្វផ្សាយឱ្យរឿងនេះមានអ្នកយល់ គាំទ្រកាន់តែច្រើន៕

អត្ថបទ៖ ចាន់រ៉ា