ប្រកួតឆ្នាំដំបូង បវរកញ្ញាកម្ពុជា ឈ្នះមកុដ Miss Culture Global នៅឥណ្ឌូនេស៊ី

ប្រកួតឆ្នាំដំបូង បវរកញ្ញាឯកកម្ពុជា តុង កណ្ណិកា តំណាងកម្ពុជា ទទួលបានជ័យលាភីឈ្នះមកុដ Miss Culture Global 2023 លើឆាកអន្តរជាតិ នៅឥណ្ឌូនេស៊ី ធ្វើឱ្យអ្នកនិយមតាមដានវិស័យបវរកញ្ញានៅកម្ពុជា ព្រមទាំងអ្នកគាំទ្រសម្តែងក្តីរំភើប ចូលរួមអបអរសាទរ។

នៅក្នុងវគ្គផ្ដាច់ព្រ័ត្រ នៃការប្រកួចសម្រស់កញ្ញាឯក Miss Culture Global 2023 នារាត្រីថ្ងៃទី២ ខែមីថុនា ឆ្នាំ២០២៣ បានបញ្ចប់ទៅយ៉ាងរលូន ដោយបានរកឃើញម្ចាស់ជ័យលាភីគ្រង់មកុដប្រចាំឆ្នាំបានទៅលើបវរកញ្ញាឯកកម្ពុជា គឺ កញ្ញា តុង កណ្ណិកា។

សម្រាប់ឆ្នាំដំបូងនេះ ការប្រកួតបានធ្វើឡើងក្នុងប្រទេសឥណ្ឌូនេស៊ី ក្នុងនោះបេក្ខភាពបវរកញ្ញាដែលទទួលបានជ័យលាភីលំដាប់រង១ បានទៅលើ Miss Culture Global Philippines និងជ័យលាភីលំដាប់រង២ បានទៅលើ Miss Culture Global Indonesia។

ជាមួយដំណឹងល្អនេះដែរ នៅក្នុងវគ្គផ្ដាច់ព្រ័ត្រដដែល បេក្ខភាពបុរសឯក ឆន ឈីត ដែលតំណាងឱ្យប្រទេសកម្ពុជាក៏បានទទួលជយលាភីលំដាប់រងទី៣ នៃកម្មវិធី Mister Global Culture 2023 ខណៈដែលម្ចាស់ពានជយលាភីលេខ១ បានទៅលើបុរសឯក Tuan A bu មកពីប្រទេសម៉ាឡេស៊ី។

គួរបញ្ជាក់ថា កញ្ញា តុង កណ្ណិកា បានធ្វើឱ្យទស្សនិកជនមានមោទនភាព ដែលសាងបានភាពលេចធ្លោជាថ្មីនៅលើឆាកអន្តរជាតិ ដែលអាចឈ្នះម្កុដសម្រាប់ការចេញទៅប្រកួតឆ្នាំដំបូង៕

អត្ថបទ៖ ចាន់រ៉ា