អ៊ីរ៉ង់ ចាប់ផ្ដើមទទួលចុះឈ្មោះបេក្ខភាពប្រធានាធិបតី ក្រោយសោកនាដកម្ម​ធ្លាក់ឧទ្ធម្ភាគចក្រស្លាប់លោក Raisi

ប្រទេសអ៊ីរ៉ង់កាលពីថ្ងៃព្រហស្បតិ៍បានចាប់ផ្ដើមបើកការចុះឈ្មោះរយៈពេល ៥ ថ្ងៃសម្រាប់បេក្ខភាពដែលចង់ឈរឈ្មោះបោះឆ្នោតជ្រើសរើសប្រធានាធិបតីនាថ្ងៃទី២៨ ខែមិថុនាខាងមុខ ដើម្បីមកជំនួសតំណេងលោក Ebrahim Raisi ដែលបានស្លាប់បាត់បង់ជីវិតក្នុងហេតុការណ៍ធ្លាក់ឧទ្ធម្ភាគចក្រកាលពីចុងសប្ដាហ៍មុន ។ នេះបើតាមការចេញផ្សាយដោយទីភ្នាក់ងារព័ត៌មាន AP កាលពីថ្ងៃទី៣០ ខែឧសភាកន្លងទៅ ។

យោងតាមច្បាប់របស់អ៊ីរ៉ង់ពាក់ព័ន្ធនឹងការចុះឈ្មោះជាបេក្ខភាពប្រធានាធិបតី តម្រូវឲ្យពលរដ្ឋទាំងនោះមានសញ្ជាតិអ៊ីរ៉ង់តែមួយគត់ ហើយមានអាយុចន្លោះពី ៤០ ទៅ ៧៥ ឆ្នាំ និងយ៉ាងហោចណាស់បញ្ចប់ថ្នាក់អនុបណ្ឌិត ខណៈក្នុងចំណោមអ្នកដែលបានចុះឈ្មោះកាលពីថ្ងៃព្រហស្បតិ៍ ក៏មានលោក Saeed Jalili អតីតអ្នកចរចានុយក្លេអ៊ែរអ៊ីរ៉ង់ ដែលលោកក៏ធ្លាប់ឈរឈ្មោះបោះឆ្នោតចំនួន ២ លើកផងដែរកាលពីឆ្នាំ ២០១៣ និងឆ្នាំ ២០២១ ។

ទោះយ៉ាងណា បច្ចុប្បន្នគេមើលឃើញថា លោក Mohammad Mokhber ដែលកំពុងកាន់ការជាប្រធានាធិបតីស្តីទីរបស់អ៊ីរ៉ង់ជាបេក្ខភាពលេចធ្លោមួយរូបដែលអាចនឹងឡើងអង្គុយកៅអីជាប្រធានាធិបតីផ្លូវការតែម្ដង ដោយសារតែលោកក៏ជាមនុស្សជំនិតរបស់មេដឹកនាំជាន់ខ្ពស់គឺលោក Ayatollah Ali Khamenei ផងដែរ ។

ទន្ទឹមនោះ ក្រោយបិទបញ្ចប់ការចុះឈ្មោះរយៈពេល ៥ ថ្ងៃ ពោលនៅថ្ងៃទី៤ ខែមិថុនាហើយនោះ ក្រុមប្រឹក្សាគណៈរដ្ឋមន្ត្រីអ៊ីរ៉ង់រំពឹងនឹងចេញបញ្ជីឈ្មោះបេក្ខភាពចុងក្រោយក្នុងរយៈពេល ១០ ថ្ងៃ ហើយនឹងអនុញ្ញាតឲ្យបេក្ខភាពឈ្មោះឈរបោះឆ្នោតចាប់ផ្ដើមធ្វើយុទ្ធនាការឃោសនាគោលនយោបាយរៀងៗខ្លួនរយៈពេល ២ សប្ដាហ៍ មុនការបោះឆ្នោតសកលនៅថ្ងៃទី២៨ ខែមិថុនា ។

ការបោះឆ្នោតនេះកើតឡើង នៅពេលដែលប្រទេសអ៊ីរ៉ង់កំពុងជួបបញ្ហាផ្ទៃក្នុង បន្ទាប់ពីហេតុការណ៍ដ៏គួរឲ្យសោកសង្រេងធ្លាក់ឧទ្ធម្ភាគចក្រស្លាប់លោកប្រធានាធិបតី Ebrahim Raisi កាលពីថ្ងៃទី១៩ ខែឧសភា ក៏ដូចជាភាពតានតឹងកាន់តែខ្លាំងឡើងរវាងទីក្រុងតេហេរ៉ង់ និងសហរដ្ឋអាមេរិក រួមទាំងការតវ៉ាជុំវិញមរណភាពរបស់នាង Mahsa Amini ក្នុងមន្ទីរឃុំឃាំងរបស់ប៉ូលិសកាលពីឆ្នាំ ២០២២ កន្លងទៅ ។

គួរបញ្ជាក់ថា លោក Ebrahim Raisi គឺជាប្រធានាធិបតីអ៊ីរ៉ង់ទី ២ ហើយដែលទទួលមរណភាពក្នុងអំឡុងពេលកំពុងកាន់តំណែង ក្រោយហេតុការណ៍ធ្លាក់ឧទ្ធម្ភាគចក្រ ខណៈប្រធានាធិបតីអ៊ីរ៉ង់ដំបូងគេដែលស្លាប់បាត់បង់ជីវិតដូចគ្នាទាំងដែលកំពុងកាន់អំណាចគឺលោក Mohammad Ali Rajai ។ មេដឹកនាំរូបបានឃ្លាតរូបកាយកាលពីឆ្នាំ ១៩៨១ ក្នុងសោកនាដកម្មបំផ្ទុះគ្រាប់បែកក្នុងភាពវឹកវរមួយ បន្ទាប់ពីបដិវត្តឥស្លាម ៕

ដោយ ៖ សុខ ជីវ័ន្ត

ចុចអាន ៖ អ៊ីរ៉ង់ មិនទាន់ចេញលទ្ធផលស៊ើបអង្កេតករណីធ្លាក់ឧទ្ធម្ភាគចក្រប្រធានាធិបតី ព្រោះនៅសង្ស័យ