Jungkook សារភាពថា ធ្លាប់អន្ទងវិញ្ញាណខ្មោច តែត្រូវបរាជ័យ

តារាចម្រៀង Jungkook សមាជិកក្រុម BTS បានសារភាពតាមរយៈការ Live របស់ខ្លួនថា លោកធ្លាប់ព្យាយាមអន្ទងហៅវិញ្ញាណខ្មោច ប៉ុន្តែលទ្ធផលមិនទទួលបានដូចប៉ងទេ។

នៅក្នុងវីដេអូ Live នាពេលថ្មីៗនេះ Jungkook បានរៀបរាប់រឿងរ៉ាវព្រឺក្បាលមួយថា ​ខ្លួនធ្លាប់ជួបខ្មោច ពេលកំពុងងូតទឹកតែម្នាក់ឯង។ ដំបូងឡើយ មុនពេលចូលងូតទឹក លោកបានឃើញស្នាមឈាមមូសប្រឡាក់នៅលើជញ្ជាំងបន្ទប់ រួចលោកក៏ចូលទៅងូតទឹក កក់សក់។ ពេលកំពុងកក់សក់ លោកស្រាប់តែសង្កេតឃើញជើងនរណាម្នាក់ស្លេកៗ ឈរនៅក្នុងរបន្ទប់ទឹកដែរ។

“ខ្ញុំនៅម្នាក់ឯង ហើយពេលកំពុងងូតទឹក ខ្ញុំឃើញកជើងស្លេក នៅចន្លោះជើងរបស់ខ្ញុំ។ កជើងនោះបានបាត់ទៅ ដោយការដើរចូលទៅក្នុងបន្ទប់។ ខ្ញុំ​ឃើញ​វាដើរតម្រង់​ទៅ​ទ្វារ​មុខ​ ក្បែរ​ទូ​ស្បែកជើង។ ប៉ុន្តែ​ក្រោយ​មក ខ្ញុំ​មិន​បាន​ឮ​នរណា​ម្នាក់​ឡើយ” ។

ភ្លាមៗនោះ Jungkook គិតស្មានថាជាជើងរបស់ Suga ព្រោះសម្បុរដូចគ្នា។ ប៉ុន្តែពេលចេញពីងូតទឹក លោកមិនបានឃើញវត្តមាននរណាឡើយ ក្រៅពីលោកផ្ទាល់។

បន្ទាប់ហេតុការណ៍នេះ Jungkook បានដឹងខ្លួនថាត្រូវបានខ្មោចលង។ ដូច្នេះនៅយប់មួយ សមាជិក BTS រូបនេះបានព្យាយាមហៅវិញ្ញាណខ្មោច ដោយនៅម៉ោង២យប់ លោកបាន​បិទ​ភ្លើងបន្ទប់ទាំងអស់ ហើយ​សង្ឃឹម​ថា​នឹង​បាន​ជួបវិញ្ញាណខ្មោច ជាពិសេសម្ចាស់ជើងកាលពីលើកមុននោះ ប៉ុន្តែគ្មានអ្វីបង្ហាញខ្លួនទេ។

ក្រោយស្ដាប់ Jungkook រ៉ាយរ៉ាប់ ARMYs មួយចំនួនបានសម្ដែងក្ដីរន្ធត់ ខណៈមួយចំនួនទៀតបានលើកឡើងបែបកំប្លែងថា តារាប្រុសរូបនេះទំនងចង់បង្កើតមិត្តជាខ្មោចហើយមើលទៅ៕

ប្រែសម្រួល៖ សន្យា

ចុចអាន៖ Jungkook ប្រកាសចេញអាល់ប៊ុមទោល នៅពាក់កណ្ដាលខែក្រោយ

ចុចអាន៖ បញ្ចាំងភាគដំបូង ខ្សែភាពយន្តរបស់ Jennie ទទួលមតិមិនពេញចិត្តលើឈុតអាសអាភាស