លីន សោម៉ា អ្នកគាំទ្រយល់ថា ដូចមនុស្សពីរផ្សេងគ្នា ក្រោយសារភាពវះកាត់កែខ្ទង់ច្រមុះ

តារា​ចម្រៀង​ស្រី​វ័យ​ក្មេង​កញ្ញា លីន សោម៉ា ថ្មីៗនេះ​ មាន​ការ​ទម្លាយ​ដំណឹង​ថា​ តារាស្រី​រូបនេះ​បានជ្រើសរើស​យក​ការ​វះកាត់​កែខ្ទង់​ច្រមុះ ​ដើម្បី​ឲ្យ​មានភាព​ស្រស់​ស្អាត​បន្ថែម​ពីលើ​សម្រស់​ធម្មជាតិ​មួយ​កម្រិត​ទៀត។

ប្រភព​បាន​​ឲ្យដឹង​ថា តារាចម្រៀង លីន សោម៉ា មុននេះ​គឺ​បាន​ជ្រើសរើស​យកគ្លីនិចកែសម្ផស្សមួយ​កន្លែង​ដោយនាង​សម្រេច​ចិត្ត​ធ្វើកាវះកាត់​កែ​ខ្ទង់ច្រមុះ​ឲ្យ​មាន​ភាព​ស្រស់​ស្អាត​ទាក់ទាញជាងមុន។ ក្នុងនោះ​មានការ​លើក​ឡើង​ថា តើ​បងប្អូន​ណាខ្លះ​កំពុងរងចាំ​មើល​លទ្ធផល​របស់ IDOL យើង លីន សោម៉ា-Lin Souma?

ប្រភព​និយាយទៀតថា «តោះ​មកមើលលទ្ធផល​របស់​អាយដល​យើងបន្ទាប់​ពីកែខ្ទង់​ច្រមុះ​ទាំងអស់គ្នា។ បន្ទាប់​ពីបានទស្សនា​វីដេអូ​នេះ​ហើយចង់ឲ្យ​ហ្វេនៗ​ជួយ​ដាក់ពិន្ទុមើល​ថា គាត់ស្អាតប៉ុន្មានភាគរយ​ដែរ ហើយខុសប្លែក​ពីមុនប៉ុន្មានដឺក្រេ?»

ទោះ​បី​យ៉ាង​ណា បន្ទាប់​ពីមាន​ការ​បញ្ចេញ​បែប​នេះ ភ្លាមៗនោះគេឃើញមានអ្នកគាំទ្រមួយចំនួន​បាននាំគ្នា​វែកញែក​ដោយ​មានអ្នកខ្លះ​សរសើរ​ថា លីន សោម៉ា ស្អាតប្លែង​ជាងមុនក្រោយ​កែច្រមុះ។ ដោយឡែក​ក៏មានខ្លះ​ទៀត​និយាយ​បែប​បង្អាប់​លេង​ដែរ​ថា នាងដូចមនុស្សពីរផ្សងគ្នា​ក្រោយ​វះកាត់​កែខ្ទង់​ច្រមុះរួច។

ចំណែក​ឯសាមីខ្លួនកញ្ញា លីន សោម៉ា បានលើកឡើងថា «នេះ​អត់ផាត់​មុខ​បង​ប្អូនប្លែក​បាន​ប៉ុន្មានភាគរយដែរ?ទើបបាន ១៦ថ្ងៃទេ បន្តិចទៀតបានស្រកហើមជាងនេះទៀត។ តើចង់មើលវីដេអូពី​មិនទាន់​ធ្វើ​រហូត​ដល់ធ្វើ​ហើយ​អត់បងប្អូនថា​មាន​សកម្មភាព​ម៉េចខ្លះ? នាងបាននិយាយបន្ថែមថា ខែ​ថ្មី ថ្ងៃថ្មី បើកទំព័រមុខថ្មី យ៉ាង​ម៉េចដែរបងប្អូន?»

ដូចដែល​ទស្សនិកជន​បាន​ដឹង​ហើយ​ថា បេក្ខភាព​ដ៏លេច​ធ្លោ​កញ្ញា លីន សោ​ម៉ា ដែល​មានអាយុទើបតែ ២១ឆ្នាំ ទទួល​បាន​ជ័យ​ជំនះ​ដោយ​បានក្លាយ​ជាម្ចាស់ពានកម្មវិធីប្រឡង Beat The Best រដូវកាលទី២ កាលពីរាត្រី​ថ្ងៃទី០១ ខែមិថុនា ឆ្នាំ២០២៤ កន្លងទៅ​នេះ ខណៈ​នាងទទួលប្រាក់រង្វាន់ចំនួន ២៤០០០ដុល្លារ។

អ្នកគាំទ្រចាំ​បាន​ថា មុនក្លាយ​ជាម្ចាស់ពាន​នៃ​ការ​ប្រឡង​កម្មវិធី​ Beat The Best លីន សោម៉ា ក៏ធ្លាប់​ប្រឡង​កម្មវិធី Cambodian Idol រដូវកាលទី៣ និងកម្មវិធី ”ផ្ការីកក្នុងសួន“ និង Master Singer Cambodia ជាដើម។លីន សោម៉ា ក៏ត្រូវបាន​ដឹងថា នាងជានិស្សិតឆ្នាំទី២ ផ្នែក​គណនេយ្យ និង​ពន្ធដា​នៅ​វិទ្យាស្ថានជាតិ​គ្រប់គ្រង​ទៀត​ផង៕

អត្ថបទ៖ ចាន់រ៉ា