អ៉ីវ៉ា ចាត់ទុកការផ្តល់តម្លៃលើការងារ ជាជោគជ័យ និងផ្លែផ្កាមិនអាចខ្វះបាន

តារាចម្រៀងស្រីរូបស្រស់ កញ្ញា ឃីន ស្រីនាថ ឈ្មោះសិល្បៈ អ៉ីវ៉ា បច្ចុប្បន្នក្រៅពីការមមារញឹកលើអាជីពសិល្ប: តាមរយ:ការចេញច្រៀងតាមបណ្តាខេត្តនានាហើយនោះ តារាស្រីរូបនេះ ក៏មានមុខរបរផ្ទាល់ខ្លួនដោយលក់ផលិតផលតាមអនឡាញដូចអ្នកសិល្ប:ដទៃដែរ។

ទន្ទឹមគ្នានៃដំណើរជោគជ័យស្របគ្នាទាំងអាជីពសិល្ប: និងជំនួញផ្ទាល់ខ្លួន តារាចម្រៀងមានដើមកំណើតមកពីដឹកដីខេត្តកំពង់ស្ពឺរូបនេះ បានបញ្ចេញទស្សន:ពាក់ព័ន្ធការងារ ដោយនាងចាត់ទុកថា ការផ្តល់តម្លៃលើការងារ គឺជាជោគជ័យនិងផ្លែផ្កាមិនអាចខ្វះបាន បើសិនយើងគិតដល់រឿងនេះ។

ស្រីស្អាត អ៉ីវ៉ា បានលើកឡើងថា ការផ្តល់តម្លៃឱ្យការងារ ស្រលាញ់ការងារ គោរពពេលវាលាការងារ និង មានវិន័យចំពោះការងារ នោះយើងក៏ទទួលបានផ្លែផ្កាពីការងារវិញដែរ។ តាមរយ:ន័យនេះ អ៉ីវ៉ា បានភ្ជាប់ខ្លឹមសារមួយដែរថា “កុំយកការងារជាសម្ពាធ ការងារជាផ្នែកមួយនៃជីវិត សកម្មភាពការងារគួរតែជាសកម្មភាពរីករាយ ព្រោះយើងប្រកួតប្រជែងជាមួយខ្លួនយើង ដុសខាត់ខ្លួនយើងឱ្យរីកចម្រើនរាល់ថ្ងៃ”។

តារាចម្រៀងរូបនេះ ក្រើនរំលឹកទៀតថា “ត្រូវចាំថា យើងមិនអាចធ្វើការងារនេះរហូតទេ ហេតុនេះទាន់មានឱកាសធ្វើ ធ្វើឲ្យអស់ពីចិត្តធ្វើឲ្យបានល្អបំផុត និងធ្វើដោយភាពរីករាយ ថ្ងៃក្រោយបើយើងឈប់ធ្វើប្តូរការងារ ឬចូលនិវត្តន៍ យើងនៅសល់ការចងចាំល្អៗ។ ស្អប់ការងារខ្លួនឯង ធ្វើឲ្យយើងធុញហើយ យើងនឹងរស់នៅជាមួយជីវិតដែលខ្វះអត្ថន័យ រង់ចាំ តែមួយថ្ងៃឲ្យកន្លងផុតទៅការធ្វើបែបនេះពិតជាខ្ជះខ្ជាយជីវិតណាស់”។

សូមរំលឹកថា តារាចម្រៀងវ័យក្មេងកញ្ញា ឃីន ស្រីនាថ ហៅ អ៉ីវ៉ា គឺជាតារាកូនកាត់ចិនត្រូវបានកត់សម្គាល់ថា នាងមិនដែលឆ្លងកាត់ការកែ​សម្រស់​នោះទេ។ ចំណែកអាជីពសិល្ប:បច្ចុប្បន្ន អ៉ីវ៉ា នៅតែមានទីផ្សារមិនចាញ់រៀមច្បងនោះឡើយ។ ឯការរក្សាបានប្រជាប្រិយភាពនិងការគាំទ្រនេះ ក៏ព្រោះតែស្រីស្រស់ អ៉ីវ៉ា ជាអ្នកចម្រៀងខ្មែរមួយរូប ដែលមានសមត្ថភាពច្រៀងបានល្អ បូករួមនឹងទេពកោសល្យសិល្ប:ខ្ពស់ផងដែរ៕ អត្ថបទ៖ ចាន់រ៉ា