បទមួយរបស់ ខេមរៈ សិរីមន្ត្ត ផ្ទុះប្រជាប្រិយជាង ២ទសវត្សរ៍មុន ជាចម្រៀងដំបូងនាំឱ្យមហាជនទូទាំងប្រទេសស្គាល់លោក

តាមរយៈចម្រៀងមួយបទដែលស្នាដៃទំនុកច្រៀងដោយ កវីនិពន្ធ និងអ្នកនិពន្ធល្បីឈ្មោះ ២រូប គឺកវីនិពន្ធ ប៉ុល ពិសី និងអ្នកនិពន្ធ ពាន់ ភួងបុប្ជា ភ្ជាប់នឹងភាពយន្តភាគទូរទស្សន៍ចំណងជើងតែមួយនឹងបទចម្រៀង «បេះដូងអ្នកប្រដាល់» ឧកញ៉ា ខេមរៈ សិរីមន្ត ដែលកាលណោះ ជ្រកក្រោមផលិតកម្ម U2 បានទាញយកប្រជាប្រិយភាពមិនធម្មតា ខណៈនេះក៏ជាបទដំបូងដែលផ្ទុះប្រជាប្រិយភាពខ្លាំងបំផុតរបស់លោកផងដែរ។

បើរំលឹកដល់វេលានៃការបោះជំហានប្រឡូកវិថីសិល្បៈដំបូងៗរបស់កំពូលតារាចម្រៀងរូបនេះ ជាពេលវេលាប្រលងប្រជែងនឹងតារាចម្រៀងដែលមានសមត្ថភាពជាច្រើនរូប ខណៈបច្ចុប្បន្ន សុទ្ធសឹងតែបានរះខ្ពស់ ក្លាយជាតារាចម្រៀងល្បីឈ្មោះលំដាប់ប្រទេសសឹងគ្រប់រូបទៅហើយ។

ដោយមានទេពកោសល្យច្រៀង និងសំនៀងដែលមានសម្រែកខ្ពស់ មិនចាញ់តារាប្រុសល្បីឈ្មោះលំដាប់ប្រទេស ខេមរៈ សិរីមន្ត បានសន្សឹមៗលូតលាស់ក្នុងដំណើរលើវិថីសិល្បៈ និងមានចម្រៀងពីរោះៗជាច្រើនបទ ដែលទទួលបានប្រជាប្រិយភាពរហូតដល់សព្វថ្ងៃ។ ប៉ុន្តែអ្វីមិនអាចបំភ្លេចបាន គឺបទចម្រៀងផ្ទុះការចាប់អារម្មណ៍ខ្លាំងបំផុតដំបូងបង្អស់ ដែលអាចចាត់ទុកជាកែប្រែវាសនាអ្នកចម្រៀងរូបនេះ និងក្លាយជាតារាចម្រៀងប្រុសដ៏លេចធ្លោម្នាក់។

ដ្បិតទទួលបានការចាប់អារម្មណ៍ជាមួយការបង្ហើរសំនៀងលើបទ “អន្ទងស្នេហ៍” និង “ព្រលឹតបាតបឹង” ក្នុងគ្រាបង្ហាញវត្តមានជាតារាចម្រៀងដំបូងៗ តែបទដែលធ្វើឱ្យមហាជនបានស្គាល់តារាចម្រៀងរូបនេះទូទាំងប្រទេស គឺបទ «បេះដូងអ្នកប្រដាល់» ដែលទំនងជាបទចម្រៀងទី៣ ឬ ទី៤ ដែលលោកច្រៀងក្នុងផលិតកម្ម U2 (Vol.6) ។

មួយបទនេះ ជាបទចម្រៀងដែលមនុស្សគ្រប់វ័យចងចាំ និងធ្លាប់ស្តាប់ច្រើន សូម្បីតែយុវវ័យធំធាត់ក្រោយបទនេះ ផ្ទះប្រជាប្រិយភាពក៏ដោយ ដែលអាចចាត់ទុកជាបទចម្រៀងដ៏ជោគជ័យបំផុតរបស់កំពូលតារាចម្រៀងរូបនេះ។

ក្រោយមក ខេមរៈ សិរីមន្ត្ត ក៏មានទទួលភាពល្បីល្បាញជាមួយនឹងបទចម្រៀងជាច្រើនផ្សេងទៀត ខណៈភាគច្រើន សុទ្ធសឹងជាបទដែលផ្ទះប្រជាប្រិយ ហេតុនេះហើយ ធ្វើឱ្យពីមួយជំហានទៅជំហានក្នុងនាមអាជីពរបស់លោក បានឡើងដល់ចំណុចកំពូល ល្បីឈ្មោះបោះសំឡេងរហូតដល់សព្វថ្ងៃ ក្រោមផលិតកម្មធំៗនៅកម្ពុជាដូចជា ផលិតកម្ម សាន់ដេ; ផលិតកម្ម រស្មីហង្សមាស និង ផលិតកម្ម Galaxy ជាដើម។

គួររំលឹកដែរថា ពេលវេលានៃការបោះជំហានសាងកេរ្តិ៍ឈ្មោះរបស់តារាច្រៀងប្រុស ខេមរៈ សេរីមន្ត ជិត៣ទសវត្សរ៍មុន លោកត្រឹមជាពន្លកថ្មីនៃអ្នកសិល្បៈ ហើយផ្ញើវាសនាក្រោមទ្រនំផលិតកម្មថ្មី « U2 Entertainment » ជាមួយនឹងតារាចម្រៀងប្រុសស្រីឆ្នើមៗជាច្រើនរូបទៀត ដូចជា សាន ផានិត, ទិត្យ វិច្ឆិកា, ឱក សុគន្ធកញ្ញា; មាស សុខសោភា; តាតា និង លី អ៉ីវ៉ាធីណា ជាដើម។ល។ បច្ចុប្បន្ន បើទោះបីជាលោកល្បីល្បាញ និងមានមុខជំនួញច្រើនក្នុងដៃទៅហើយក្តី ក៏លោកនៅតែបន្តអាជីពមួយនេះបម្រើអារម្មណ៍អ្នកគាំទ្ររបស់ខ្លួនដែរ៕