អតីតសង្សានាយ ចឺម អ្នកនាង សេង សុឃីម បញ្ជាក់ច្បាស់ៗក្រោយមានគេសួរនាំរឿងត្រឡប់រកអ្នកចាស់

អ្នកមេម៉ាយចាយសម្រស់ សេង សុខឃីម ដែលជាអតីតសង្សាតារាចម្រៀង នាយ ចឺម បានចេញមុខបញ្ជាក់ច្បាស់ៗក្រោយពីមានអ្នកសួរនាំរឿងរ៉ាវរកគូស្នេហ៍ថ្មី បន្ទាប់បែកគ្នាជាមួយសង្សាចាស់ ថាតើនៅចង់ត្រឡប់ជួបជុំគ្នាវិញមែនទេ?

គេនៅចាំបានថា កាលពីអំឡុងចុងឆ្នាំ២០២២ កន្លងទៅ អ្នកមេម៉ាយរូបស្រស់អ្នកនាងសេងសុខឃីម បានទម្លាយជុំវិញការបែកបាក់ស្នេហាជាមួយអតីតសង្សារ តារាចម្រៀងវ័យក្មេង នាយ ចឺម បង្កការភ្ញាក់ផ្អើលដល់អ្នកគាំទ្រ និងសាធារណជន។ ក្រោយដំណឹងនៃការបែកបាក់នេះ គេឃើញអ្នកនាង សេង សុខឃីម តែងទម្លាយសារចេញពីចិត្តជាបន្តបន្ទាប់។

យ៉ាងណាក្តីស្រីស្អាតកូន១ អ្នកនាង សេង សុឃីម អំឡុងពេលបែកបាក់ នាយ ចឺម ជិត៣ឆ្នាំមកនេះ នាងពុំធ្លាប់បង្ហាញឬបង្ហើបពីទំនាក់ទំនងស្នេហាជាមួយបុរសណាម្នាក់ទេ។ ដោយឡែកស្រាប់តែមុននេះ អ្នកនាង សេង សុឃីម បានទម្លាយថាមានគេសួរខ្ញុំថា “បែកគ្នាជាមួយគេយូរហើយ ហេតុអី្វអត់ផ្ដើមជាមួយអ្នកថ្មី? តើនៅចង់ត្រឡប់ជួបជុំគ្នាវិញមែនទេ?”។

អ្នកនាង សេង សុឃីម បានបន្តទៀតថា “ឮហើយក៏មិនដឹងតបថាម៉េច ព្រោះគ្មានចម្លើយឲ្យគេតែម្ដង។ គ្រាន់តែអាចប្រាប់ថា មកពីគ្មានអារម្មណ៍ជាមួយអ្នកណា មានអារម្មណ៍ថា នៅពេលនេះជីវិតនៅម្នាក់ឯងស្រួលជាងមានគ្នា គ្រប់យ៉ាងហាក់ស្ងប់ស្ងាត់បន្តិចមែន តែវាអត់មានការឈឺចាប់ទេ”។

អតីតសង្សានាយ ចឺម រូបនេះបានបន្ថែមថា បើពេលណាបានជួបមនុស្សត្រូវចិត្តជាគូរពិត ក៏គង់តែទទួលទេ ព្រោះមនុស្សយើងមិនអាចឃុំខ្លួនឯងជាមួយអតីតកាលទេ គ្រាន់តែមនុស្សដែលអាចរួមដំណើជីវិតនៅពេលខាងមុខនោះ មិនទាន់បង្ហាញខ្លួន។ នៅម្នាក់ឯងសប្បាយចិត្តហើយ ក៏នៅសិនទៅ គ្មានអី្វត្រូវគិតច្រើនទេ”៕ អត្ថបទ៖ ចាន់រ៉ា