G-Devith ថាធ្លាប់បានឆ្លងកាត់ពិធីក្រុងពាលីច្រើនដង តែថ្ងៃនេះ ជាបំណងប្រាថ្នានិងការសន្យា ៨ឆ្នាំមុន

តារាចម្រៀងរ៉េបលោក ងួន ចាន់ដាវិត ហៅ G-Devith បានបញ្ជាក់ថា លោកធ្លាប់បានឆ្លងកាត់ពិធីក្រុងពាលីច្រើនលើសពីរយដង ប៉ុន្តែពិធីក្រុងពាលីថ្ងៃនេះ គឺជាបំណងប្រាថ្នាក៏ដូចជាការសន្យាកាលពី ៨ឆ្នាំមុន ពីបុរសម្នាក់ទៅកាន់នារីជាគូស្នេហ៍។ 

ការលើកឡើងរបស់តារាចម្រៀងរ៉េបល្បីឈ្មោះលោក G-Devith ស្របពេលដែលលោក និងភរិយា អ្នកនាង ទេព បូព្រឹក្ស បាននិងកំពុងចូលរោងជ័យតាមប្រពៃណីនាថ្ងៃទី០៦ ខែមិថុនានេះ ខណ:មានមហាជននិងអ្នកសិល្ប:ជាច្រើន បានសម្តែងការចូលរួមអបអរហើយជូនពរគួរស្វាមីភរិយាអ្នកទាំងពីរ។

ទន្ទឹមនឹងក្តីរីករាយនេះ លោក G-Devith បានរំលឹកអតីតកាលធ្លាប់ហែលឆ្លងជាមួយគ្នា ដោយរៀបរាប់ថា “ឆ្លងកាត់រឿងរ៉ាវជាច្រើនក្នុងជីវិតជាគូ ព្យុះភ្លៀងទឹកភ្នែកភាពសប្បាយរីករាយ និងភាពជោគជ័យប្រៀបដូចជាខ្សែភាពយន្តជីវិត”។

លោកបន្តថា “នារីម្នាក់ដែលផ្ដល់ភាពជឿជាក់លើដៃគូដោយហ៊ានដាក់ជីវិតជាដើមទុនរវាងគ្នានិងគ្នា ស្ម័គ្រចិត្តតស៊ូររងទុក្ខឆ្លងកាត់ពាក្យសម្ដីស្ដីថា តែទោះជាក្នុងកាល:ទេស:ណាក៏សច្ចាថា និងដើររួមគ្នារហូតទោះជាឆ្លងមហាសមុទ្រភ្លើងសមុទ្រផ្សែងឆ្លងដែនភ្នំមាសក្ដីក៏មិនរាថយ”។ 

តារាចម្រៀងរ៉េបលោក G-Devith បានបន្ថែមថា ពួកយើងពុះពាថែរក្សានូវចំណងដៃនៃដំណក់ឈាមដែលប្រទានដោយទេវតា ថ្ងៃនេះបងសូមគោរពនូវពាក្យសន្យា ជូននូវផ្កាស្លាបំពេញមុខលោកមេបាគ្រូបាអាចារ្យ ញាតិមិត្ត សង្គម និងអ្នកគាំទ្រទាំងអស់ដែលជាសក្ខី ដោយថ្ងៃនេះជាថ្ងៃជ័យក្នុងនាមជាប្រពន្ធប្ដីស្របច្បាប់ស្របប្រពៃណីសច្ចាភក្ដីជានិរន្តរ៍៕ ចាន់រ៉ា