ឆេះមិនសល់អ្វី! ពេជ្រ ចរណៃ បានត្រឹមសំពះដឹងគុណក្រុមពន្លត់អគ្គិភ័យ និងសុំការយោគយល់ពីម្ចាស់ផ្ទះ ក្នុងកាតព្វកិច្ចសង

បន្ទាប់ពីហេតុការណ៍អគ្គិភ័យឆាបឆេះហាងទាំងស្រុងខាតបង់អស់លុយខ្ទង់ម៉ឺនដុល្លារ តារាសម្តែងនិងជាគ្រូបង្ហាត់ក្បាច់គុនល្បុក្កតោ កញ្ញា ពេជ្រ ចរណៃ ជាថ្មីម្តងទៀតនៅរសៀលថ្ងៃទី១៩ ខែមិថុនា ឆ្នាំ២០២៥នេះ បានលើកដៃសំពះសុំការយោគយល់ពីម្ចាស់ផ្ទះទុកឱកាសឱ្យខ្លួនបានសម្រួលលើរឿងនេះ។

កញ្ញា ពេជ្រ ចរណៃ បានបញ្ជាក់ឲ្យដឹងថា មូលហេតុដែលបណ្តាលឲ្យអគ្គីសភ័យលេបត្របាក់ហាងនាងស្ទើរអស់ទាំងស្រុងនេះបណ្តាលមកពីផ្ទុះសេខ្សែភ្លើងដែលដំបូងឡើយឆេះរាលដាលចេញពីពីដានខាងលើទើបធ្វើឲ្យអណ្តាតភ្លើងឆេះយ៉ាងសន្ទោសន្ធៅនៅត្រឹមតែរយ:ពេលប្រមាណជាង១០នាទី។

តារាស្រី ពេជ្រ ចរណៃបានឲ្យដឹងនារសៀលថ្ងៃនេះថា “នាងខ្ញុំសូមអរគុណដល់ថ្នាក់ដឹកនាំ បងៗកងកម្លាំង ដែលជួយអន្តរាគមន៍ក្នុងករណីអគ្គីភ័យកាលពីយប់មិញនៅក្នុងហាងរបស់នាងខ្ញុំ ហើយក៏សូមអភ័យទោសចំពោះម្ចាស់ផ្ទះជួល សង្ឃឹមថាម្ចាស់ផ្ទះនឹងមានការយោគយល់ និងទុកឱកាសឲ្យនាងខ្ញុំបានសម្រួលលើរឿងនេះដោយទឹកចិត្តស្រឡាញ់រាប់អាន”។

កញ្ញា ពេជ្រ ចរណៃ បានបន្តទៀតថា នាងក៏សូមអរគុណដល់បងប្អូនជនរួមជាតិទាំងអស់ដែលបានចូលរួមជួយគាំទ្រលើកទឹកចិត្តនិងមានការបារម្ភចំពោះនាងក៏ដូចជាគ្រួសារ។ គួរបញ្ជាក់ថា ហេតុការណ៍អគ្គិភ័យដ៏ភ្ញាក់ផ្អើលនេះ បានកើតឡើងនៅវេលាម៉ោងប្រមាណ ៨:៣០នាទី យប់ថ្ងៃទី១៨ ខែមិថុនា ស្ថិតនៅទីតាំងហាងតារាសម្តែងល្បីឈ្មោះកញ្ញា ពេជ្រ ចរណៃ ក្នុងសង្កាត់បឹងកក់២ ខណ្ឌទួលគោករាជធានីភ្នំពេញ។ អគ្គិសភ័យនេះបានលេបត្របាក់ហាងទាំងស្រុងប៉ុន្តែសំណាងល្អពុំមានមនុស្សគ្រោះថ្នាក់៕ ចាន់រ៉ា