មីយ៉ាន់ម៉ាឃាត់ខ្លួនជនបរទេសជាង ១០ ០០០​នាក់ ពាក់ព័ន្ធ​បណ្តាញបោកប្រាស់តាមអ៊ីនធឺណិត

រដ្ឋាភិបាលយោធាមីយ៉ាន់ម៉ា បានឃុំខ្លួនជនបរទេសជាង ១០ ០០០​នាក់ក្នុងរយៈពេល​៩​ខែចុងក្រោយនេះ ពីបទចូលប្រទេសដោយខុសច្បាប់ ដើម្បីធ្វើការក្នុងប្រតិបត្តិការបោកប្រាស់តាមប្រព័ន្ធអ៊ីនធឺណិត។ នេះ​បើ​យោង​តាម​ការ​ចុះផ្សាយ​របស់​សារព័ត៍មាន Bloomberg ដោយ​ដកស្រង់​ទិន្នន័យ​ពី​រដ្ឋាភិបាល​របប​សឹក​​យោធា​មីយ៉ាន់ម៉ា កាល​ពី​ថ្ងៃ​ទី​២៨​ខែ​តុលា។

យោងតាមក្រសួងព័ត៌មាន​មីយ៉ាន់ម៉ា មនុស្សសរុបចំនួន ១០ ១១៩​នាក់ត្រូវបានចាប់ខ្លួន​គិត​ត្រឹម​ថ្ងៃទី​២៧​ខែតុលា ក្នុងការបង្រ្កាបរួមគ្នាជាមួយប្រទេសចិន និងប្រទេសថៃ។ ក្នុងចំណោមនោះ ប្រហែល ៩ ៣៤០នាក់ត្រូវបានធ្វើមាតុភូមិនិវត្តន៍រួចហើយ ខណៈកំពុងរៀបចំដើម្បីបញ្ជូនអ្នកដែលនៅសល់។

ចំណាត់ការនេះ ធ្វើឡើងបន្ទាប់ពីមានការកើនឡើងសម្ពាធអន្តរជាតិលើយោធាមីយ៉ាន់ម៉ា ដើម្បីរុះរើឧស្សាហកម្មបោកប្រាស់តាមអ៊ីនធឺណិតដែលមានតម្លៃរាប់ពាន់លានដុល្លាររបស់ខ្លួន ដែលបានរីកដុះដាលនៅក្នុងតំបន់ព្រំដែនក្រោមការគ្រប់គ្រង​​មិន​ដិត​ដល់​របស់​រដ្ឋ។

កាលពីខែកញ្ញា សហរដ្ឋអាមេរិកបានដាក់ទណ្ឌកម្មលើក្រុមហ៊ុនជាច្រើនដែលប្រតិបត្តិការនៅ Shwe Kokko ដែលជាមជ្ឈមណ្ឌលបោកប្រាស់ដ៏សំខាន់មួយដែលត្រូវគេនិយាយថាត្រូវបានគ្រប់គ្រងដោយក្រុមប្រដាប់អាវុធជនជាតិភាគតិចសម្ព័ន្ធមិត្តជាមួយរបបយោធា។

លោក​ Zaw Min Tun អ្នកនាំពាក្យរបស់រដ្ឋាភិបាល​របប​សឹក​ បានចោទប្រកាន់សហភាពជាតិ Karen (KNU) ដែលជាកងទ័ពជនជាតិភាគតិចប្រយុទ្ធនឹងយោធាថា បានជ្រកកោនប្រតិបត្តិការឆបោកនៅក្នុង​​ឧទ្យាន KK Park ក្បែរព្រំដែនថៃ-មីយ៉ាន់ម៉ា ដោយអះអាងថា ក្រុមនេះទទួលបានផលចំណេញពីការជួលដី និងផ្តល់សន្តិសុខសម្រាប់តំបន់នោះ។

ប្រធានកិច្ចការបរទេស KNU លោក Saw Taw Nee បានបដិសេធការចោទប្រកាន់ ដោយអះអាង​ថា របបយោធាកំពុងទម្លាក់​កំហុស ដើម្បីឆ្លើយតបទៅនឹងសម្ពាធរបស់ចិន។ លោកបានមានប្រសាសន៍ថា «ពួកគេបានធ្វើវាអស់ជាច្រើនឆ្នាំ ដើម្បីផលប្រយោជន៍ផ្ទាល់ខ្លួនរបស់ពួកគេ ប៉ុន្តែនៅពេលដែលសហគមន៍អន្តរជាតិដាក់សម្ពាធពួកគេ ពួកគេព្យាយាមស្វែងរកពិរុទ្ធជន ហើយដាក់បន្ទុកលើយើង»។

ប្រព័ន្ធផ្សព្វផ្សាយក្នុងស្រុកបានរាយការណ៍ថា ប្រតិបត្តិករជាច្រើនបានបោះបង់ចោល KK Park បន្ទាប់ពីការវាយឆ្មក់របស់រដ្ឋាភិបាលកាលពីសប្តាហ៍មុន។ យោងតាមអាជ្ញាធរថៃ មនុស្សជាង ១ ០០០​នាក់ ដែលភាគច្រើនជាជនជាតិចិន បានភៀសខ្លួនចូលទៅក្នុងប្រទេសថៃ ចំពេលមានរបាយការណ៍អំពីការផ្ទុះនៅក្នុងតំបន់នេះ។

លោក Saw Taw Ne បានពណ៌នាកន្លែងកើតហេតុថាមានភាពវឹកវរ ដោយ​និយាយថា «មនុស្សភាគច្រើនបានភៀសខ្លួន។ វាដូចជាទីបញ្ចប់នៃពិភពលោក»។

បណ្តាញបោកប្រាស់នៅក្នុងប្រទេសមីយ៉ាន់ម៉ាត្រូវបានគេរាយការណ៍ថាពឹងផ្អែកយ៉ាងខ្លាំងលើសេវាអ៊ីនធឺណិត Starlink របស់​ក្រុមហ៊ុន SpaceX ទោះបីជាមានការរឹតបន្តឹងក៏ដោយ។ ក្រុមហ៊ុន SpaceX បាន​បញ្ជាក់​កាលពីសប្តាហ៍មុនថា ខ្លួនបានបិទឧបករណ៍​ Starlink ជាង ២ ៥០០​គ្រឿង​ ដែលសង្ស័យថាត្រូវបានប្រើប្រាស់ដោយក្រុមឧក្រិដ្ឋជននៅក្នុងតំបន់។

KNU បាន​អះអាង​ថា ការ​បង្ក្រាប​ជា​ថ្មី​របស់​របប​យោធា​គឺ​មាន​គោល​បំណង​បន្ធូរ​បន្ថយ​ការ​ព្រួយ​បារម្ភ​របស់​ចិន និង​ទទួល​បាន​ការ​គាំទ្រ​ពី​ទីក្រុង​ប៉េកាំង​ឡើង​វិញ​នៅ​មុន​ការ​បោះឆ្នោត​ដែល​បាន​គ្រោង​ទុក។

លោក Min Aung Hlaing មេ​ដឹកនាំ​របប​សឹក បានសន្យាថានឹងរៀបចំការបោះឆ្នោតជាដំណាក់កាល និងផ្ទេរអំណាច ទោះបីជារដ្ឋាភិបាលលោកខាងលិចបានច្រានចោលដំណើរការនេះថាមិនស្របច្បាប់ក៏ដោយ៕

ដោយ៖ ឈាង