ជំនួប​ផ្ទាល់​និង​លើក​ដំបូង​តាំង​ពី​ឆ្នាំ​២០១៩​​រវាង​លោកត្រាំ និង​លោកស៊ី សម្រេច​បាន​អ្វី​ខ្លះ?

ផ្អែកលើកិច្ចប្រជុំនៅប្រទេសកូរ៉េខាងត្បូងនៅថ្ងៃទី៣០ខែតុលាឆ្នាំ២០២៥ ប្រធានាធិបតីសហរដ្ឋអាមេរិកលោក ដូណាល់ ត្រាំ និង​ប្រធានាធិបតី​ចិន​លោក ស៊ី ជីនពីង បាន​ព្រមព្រៀង​គ្នា​ ក្នុង​ការ​បន្ថយ​ភាព​តានតឹង​ផ្នែក​ពាណិជ្ជកម្ម។ លោកត្រាំ បានប្រកាសសម្បទានជាច្រើន បន្ទាប់ពីកិច្ចចរចាដែលបានធ្វើឡើងនៅខាងក្រៅកិច្ចប្រជុំកំពូល APEC នៅទីក្រុងប៊ូសាន។

យោង​តាម​ការ​ចុះផ្សាយ​របស់ CNN និង BBC, លទ្ធផលសំខាន់ៗនៃកិច្ចប្រជុំរួមមាន៖

• ពន្ធគយ៖ សហរដ្ឋអាមេរិកបានយល់ព្រមកាត់បន្ថយពន្ធរួមលើទំនិញចិនពី ៥៧% មកត្រឹម ៤៧​%។ ពន្ធ ២០% លើទំនិញចិនដែលទាក់ទងនឹងសារធាតុ​ fentanyl ត្រូវបានកាត់បន្ថយមកត្រឹម ១០%។
• ការបង្រ្កាប Fentanyl៖ ជាថ្នូរនឹងការកាត់បន្ថយពន្ធ ប្រទេសចិនបានយល់ព្រមចាត់វិធានការកាន់តែខ្លាំង ដើម្បីបញ្ឈប់លំហូរនៃសារធាតុ fentanyl ចូលទៅក្នុងទឹកដីសហរដ្ឋអាមេរិក។
• សណ្តែកសៀង៖ ប្រទេសចិនបានយល់ព្រមបន្តទិញសណ្តែកសៀងអាមេរិក និងផលិតផលកសិកម្មផ្សេងទៀត ដោយមានប្រសិទ្ធភាពភ្លាមៗ។
• រ៉ែកម្រ៖ មេដឹកនាំទាំងពីរបានឈានដល់កិច្ចព្រមព្រៀងរយៈពេលមួយឆ្នាំ ទាក់ទងនឹងការផ្គត់ផ្គង់រ៉ែកម្ររបស់ប្រទេសចិន ដែលជាចំណុចសំខាន់​នៅក្នុងជម្លោះពាណិជ្ជកម្មនាពេលថ្មីៗនេះ។
• អ៊ុយក្រែន៖ មេដឹកនាំ​បាន​ពិភាក្សា​អំពី​សង្រ្គាម​នៅ​អ៊ុយក្រែន ហើយ​បាន​យល់​ព្រម«ធ្វើការ​ជាមួយ​គ្នា»លើ​ដំណោះស្រាយ​មួយ។
• តៃវ៉ាន់៖ លោកត្រាំ បាននិយាយថា បញ្ហារសើបរបស់តៃវ៉ាន់ មិនត្រូវបានពិភាក្សានោះទេ។
• កិច្ចប្រជុំនាពេលខាងមុខ៖ លោកត្រាំ បានប្រកាសថា លោកនឹងទៅបំពេញទស្សនកិច្ចនៅប្រទេសចិនក្នុងខែមេសា​ឆ្នាំ​២០២៦ ដោយលោកស៊ី នឹងធ្វើទស្សនកិច្ចទៅកាន់សហរដ្ឋអាមេរិកវិញនៅចុងឆ្នាំដដែល​នោះ។

ដោយពណ៌នាកិច្ចប្រជុំថា«អស្ចារ្យ»និង«ជោគជ័យដ៏ធំ» លោកត្រាំ​ បានផ្តល់ការវាយតម្លៃជាវិជ្ជមានដល់ក្រុមអ្នកសារព័ត៌មាន នៅពេលគាត់ចាកចេញពី​ប្រទេស​កូរ៉េខាងត្បូង។ ប្រព័ន្ធ​ផ្សព្វផ្សាយ​រដ្ឋ​ចិន​ក៏​បាន​រាយការណ៍​ដែរ​ថា «ការ​ឯកភាព​គ្នា» ត្រូវ​បាន​សម្រេច​លើ​បញ្ហា​ពាណិជ្ជកម្ម​រវាង​ប្រជាជាតិ​ទាំង​ពីរ៕

ដោយ៖ ឈាង