ត្រាំ ព្រមាន ណេតាន់យ៉ាហ៊ូ៖ ប្រយ័ត្ន​អាមេរិក​លែងជួយ​ បើនៅរឹងទទឹង​​បន្ត​វាយ​អ៊ីរ៉ង់

ប្រធានាធិបតីអាមេរិក លោក ដូណាល់ ត្រាំ បានព្រមាននាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ យ៉ាងធ្ងន់ៗថា អ៊ីស្រាអែលអាចនឹងត្រូវគេបោះបង់ចោលឱ្យនៅឯកោ បើសិនជាហ៊ានបន្តបើកការវាយប្រហារយោធាខ្នាតធំលើអ៊ីរ៉ង់។

ផ្អែកតាម​របាយការណ៍ពី Axios ដែលត្រូវយក​​ចុះផ្សាយ​បន្ត​ដោយ India Today នា​ថ្ងៃទី​៩ ខែ​មិថុនា ឆ្នាំ​២០២៦ នេះ លោក ត្រាំ បានប្រាប់លោក ណេតាន់យ៉ាហ៊ូ ចំៗថា «អ្នកគួរតែប្រយ័ត្នខ្លួន បើមិនដូច្នោះទេ អ្នកនឹងត្រូវនៅម្នាក់ឯង ក្នុងពេលឆាប់ៗនេះហើយ»។ ការព្រមាននេះ ធ្វើឡើងក្រោយពេលដែលអ៊ីស្រាអែល បានវាយប្រហារលើក្រុមហេសបូឡានៅរដ្ឋធានី​បេរូត នៃ​ប្រទេសលីបង់ រហូតធ្វើឱ្យអ៊ីរ៉ង់បាញ់មីស៊ីលតបតវិញយ៉ាងសាហាវ ដែលធ្វើឱ្យលោក ត្រាំ បារម្ភថានឹងបង្កជាសង្គ្រាមក្នុង​តំបន់ទ្រង់ទ្រាយធំ និងបំផ្លាញឱកាសចរចាការទូតជាមួយអ៊ីរ៉ង់។

លោក ត្រាំ បានបង្ហើប​ទៀត​ថា មានប្រទេសចំនួនប្រាំនៅក្នុងតំបន់ បានទាក់ទងមកលោកទាំងក្ដីបារម្ភ ដើម្បីសុំឱ្យអាមេរិកជួយឃាត់អ៊ីស្រាអែល និងជួយការពារកិច្ចព្រមព្រៀងសន្តិភាព ដែលកំពុងចរចាគ្នា។

លោក ត្រាំ បានអះអាងទៀត​ថា ការនិយាយគ្នាផ្ទាល់តាមទូរស័ព្ទរវាងលោក និងលោក ណេតាន់យ៉ាហ៊ូ គឺជាគន្លឹះសំខាន់បំផុត ដែលបានជួយទប់ស្កាត់គម្រោងការបាញ់ប្រហារខ្នាតធំរបស់អ៊ីស្រាអែលទៅលើអ៊ីរ៉ង់ទាន់ពេលវេលា។ លោកបានរំឮកពីហេតុការណ៍កាលពីថ្ងៃអាទិត្យថា ខាងកងទ័ពអ៊ីស្រាអែល បានចេញដំណើរទៅហើយ និងទើបតែប្រាប់អាមេរិកនៅនាទីចុងក្រោយប៉ុណ្ណោះ ប៉ុន្តែចុងក្រោយលោកបានដេញដោល រហូតទាល់តែអ៊ីស្រាអែលព្រមបន្ថយកម្រិតវាយប្រហារមកវិញ។ លោក ត្រាំ នៅតែមានជំនឿចិត្តខ្ពស់ថា អាមេរិកជិតសម្រេចបានកិច្ចព្រមព្រៀងដ៏អស្ចារ្យមួយជាមួយអ៊ីរ៉ង់ ដើម្បីរារាំងមិនឱ្យប្រទេសនេះផលិតអាវុធនុយក្លេអ៊ែរ ឬចម្រាញ់សារធាតុអ៊ុយរ៉ាញ៉ូមបានឡើយ ទោះបីជាប្រធានសភា និងជាប្រធានអ្នកចរចារបស់អ៊ីរ៉ង់ លោក Mohammad Bagher Ghalibaf បានចេញមុខទាត់ចោលសម្ដីលោក ត្រាំ ដោយ​លើក​ឡើង​ថា អាមេរិកនិយាយគ្មាន​ការ​ពិត និងមិនអាចទុកចិត្តបានក៏ដោយ។

ដើមចមដែលនាំឱ្យកើតរឿងរ៉ាវផ្អើលពិភពលោកនេះ គឺផ្ដើមចេញពីការប៉ះទង្គិចគ្នាផ្នែកយោធាយ៉ាងខ្លាំងក្លារយៈពេលពីរថ្ងៃ ដែលបានបំផ្លាញបទឈប់បាញ់ដ៏ផុយស្រួយនៅក្នុងតំបន់។ វាបានចាប់ផ្ដើមឡើង បន្ទាប់ពីអ៊ីស្រាអែលបានបើកការវាយប្រហារតាមអាកាសនៅទីក្រុងបេរូត សម្លាប់ក្រុមសកម្មប្រយុទ្ធហេសបូឡា ហើយត្រូវបានអ៊ីរ៉ង់សងសឹកវិញ ដោយការបាញ់មីស៊ីលរាប់សិបគ្រាប់សំដៅទៅអ៊ីស្រាអែល។ ទោះបីជាលោក ត្រាំ ខំឃាត់ក៏ដោយ ក៏អ៊ីស្រាអែលបានលួចវាយបកទៅលើទីតាំង​ខែល​អាកាស រោងចក្រផលិតមីស៊ីល និងរោងចក្រគីមីឥន្ធនៈនៅក្នុងប្រទេសអ៊ីរ៉ង់ កាលពីព្រឹកថ្ងៃចន្ទ។

ទោះជាយ៉ាងណា ជម្លោះដ៏ក្តៅគគុកនេះ ត្រូវបានបិទបញ្ចប់ទៅវិញជាបណ្ដោះអាសន្ន ក្រោយពេលមានការលូកដៃជួយសម្របសម្រួលយ៉ាងស្វិតស្វាញពីសំណាក់រដ្ឋាភិបាលអាមេរិក រហូតបង្កើតបានជាបទឈប់បាញ់មួយ។ ខាងភាគីអ៊ីរ៉ង់ បានយល់ព្រមផ្អាកការបាញ់ប្រហារ ដែលពួកគេហៅថាជា «ការព្រមាន» បន្ទាប់ពីទទួលបានសារតាមអ្នកសម្របសម្រួល​ថា អ៊ីស្រាអែលក៏ព្រមឈប់ដូចគ្នា។ ចំណែកឯលោក ណេតាន់យ៉ាហ៊ូ ក៏បានយល់ព្រមផ្អាកសកម្មភាពយោធាដែរ ប៉ុន្តែលោកនៅតែមិនចោលចរិតរឹងរូសឡើយ ដោយបានព្រមានទុកជាមុនថា បើអ៊ីរ៉ង់ហ៊ានតែឆ្កឹះឆ្កៀលរករឿងម្តងទៀត នោះនឹងត្រូវជួបនឹងការវាយបកវិញយ៉ាងចាស់ដៃជាមិនខាន៕

ប្រែសម្រួល៖ ឈាង