ប៉ាគីស្ថាន និងអាហ្វហ្គានីស្ថាន យល់​ព្រមបន្តបទ​ឈប់​បាញ់មួយសប្តាហ៍ទៀត

ក្រសួងការបរទេសតួកគីបានឲ្យដឹងថា ប៉ាគីស្ថាន និងអាហ្វហ្គានីស្ថានបានព្រមព្រៀងគ្នារក្សាបទឈប់បាញ់របស់ពួកគេរយៈពេលមួយសប្តាហ៍ទៀត បន្ទាប់ពីការចរចាសន្តិភាព។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី៣១ខែតុលា។

ប៉ាគីស្ថាននិងអាហ្គាហ្វនីស្ថាននឹងជួបគ្នាម្តងទៀតនៅទីក្រុងអ៊ីស្តង់ប៊ុលនៅថ្ងៃទី ៦ ខែវិច្ឆិកា ដើម្បីពិភាក្សាអំពីរបៀបអនុវត្តបទឈប់បាញ់។ កិច្ចព្រមព្រៀងនេះក៏រួមបញ្ចូលទាំងផែនការមួយដើម្បីតាមដានស្ថានការណ៍ និងដាក់ទណ្ឌកម្មអ្នកណាដែលបំពានបទឈប់បាញ់ផងដែរ។

គួររម្លឹកថាកាលពីដើមខែនេះ ការប្រយុទ្ធគ្នាតាមបណ្តោយព្រំដែនរវាងប្រទេសទាំងពីរបានសម្លាប់មនុស្សរាប់រយនាក់ ដែលជាអំពើហិង្សាដ៏អាក្រក់បំផុតចាប់តាំងពីពួកតាលីបង់ឡើងកាន់អំណាចក្នុងឆ្នាំ ២០២១។ ប៉ាគីស្ថានបានស្តីបន្ទោសអាហ្វហ្គានីស្ថានចំពោះការផ្ទុះអាវុធថ្មីៗនេះ ខណៈដែលទីក្រុងកាប៊ុលបានបដិសេធ។

ការចរចានៅទីក្រុងអ៊ីស្តង់ប៊ុលបានបញ្ឈប់មួយរយៈខ្លី ដោយសារតែប៉ាគីស្ថានចង់ឱ្យអាហ្វហ្គានីស្ថានចាត់វិធានការខ្លាំងក្លាជាងមុនប្រឆាំងនឹងពួកតាលីបង់ប៉ាគីស្ថាន (TTP) ដែលជាក្រុមមួយដែលត្រូវបានចោទប្រកាន់ពីបទវាយប្រហារនៅក្នុងប្រទេសប៉ាគីស្ថាន។ តែយ៉ាងណាអាហ្វហ្គានីស្ថាននិយាយថា ខ្លួនមិនគាំទ្រ TTP នោះទេ។

ទោះបីជាបទឈប់បាញ់នៅតែបន្តក៏ដោយ ក៏ព្រំដែនបានបិទអស់រយៈពេលជាងពីរសប្តាហ៍មកហើយ ដែលប៉ះពាល់យ៉ាងធ្ងន់ធ្ងរដល់ពាណិជ្ជកម្ម។ ពាណិជ្ជករមកពីភាគីទាំងពីរក៏បាននិយាយដែរថា ពួកគេកំពុងខាតបង់ប្រាក់ ហើយសង្ឃឹមថាសន្តិភាពនឹងវិលត្រឡប់មកវិញឆាប់ៗនេះ៕

អត្ថបទ៖ ប៊ុន សុភាព