អ៊ីរ៉ង់ ប្រាប់ប៉ាគីស្ថាន ថា លីបង់ត្រូវតែរួមបញ្ចូលក្នុងកិច្ចព្រមព្រៀងសន្តិភាព​ខ្វះមិនបាន​

ទីភ្នាក់ងារសារព័ត៌មានអ៊ីរ៉ង់ ISNA បានរាយការណ៍​ថា រដ្ឋមន្ត្រីការបរទេសអ៊ីរ៉ង់ លោក Abbas Araghchi បានបញ្ជាក់ជាថ្មីនូវជំហរគាំទ្រដ៏រឹងមាំ និងមិនងាករេរបស់សាធារណរដ្ឋឥស្លាមអ៊ីរ៉ង់ចំពោះ​​ក្រុមតស៊ូហេសបូឡា​មាន​មូលដ្ឋាន​​​នៅ​ប្រទេស​លីបង់ ដោយលោកបានសង្កត់ធ្ងន់ថា នេះជាការប្តេជ្ញាចិត្តរបស់ទីក្រុងតេហេ​រ៉ង់ក្នុងការជ្រោមជ្រែងដល់ចលនាស្វែងរកយុត្តិធម៌នៅទូទាំងពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសារមួយផ្ញើជូនអគ្គលេខាធិការក្រុមហេសបូឡា លោក Sheikh Naim Qassem កាលពីថ្ងៃសៅរ៍ទី២៣ ខែឧសភា លោក Araghchi បានសង្កត់ធ្ងន់ថា ប្រទេសអ៊ីរ៉ង់នឹងបន្តគាំទ្រយ៉ាងពេញទំហឹង និងឥតងាករេចំពោះចលនាស្វែងរកសេរីភាព និងយុត្តិធម៌ទាំងឡាយ ជាពិសេសគឺក្រុមហេសបូឡា។

ប្រមុខការទូតអ៊ីរ៉ង់រូបនេះ ថ្លែងថា៖ «នេះគឺជាការប្តេជ្ញាចិត្តរបស់យើងចំពោះមេដឹកនាំកំពូលនៃបដិវត្តន៍ឥស្លាម Ayatollah Seyyed Ali Khamenei ដែលបានពលីជីវិត»។

លោក Araghchi បានបន្ថែមថា៖ «ចាប់តាំងពីនាទីដំបូងដែលបណ្តាប្រទេសក្នុងតំបន់មួយចំនួនបានចេញមុខធ្វើជាអ្នកសម្របសម្រួល ដើម្បីបន្ធូរបន្ថយភាពតានតឹងរវាងសាធារណរដ្ឋឥស្លាមអ៊ីរ៉ង់ និងសហរដ្ឋអាមេរិក អ៊ីរ៉ង់តែងតែគូសបញ្ជាក់យ៉ាងច្បាស់ថា រាល់កិច្ចព្រមព្រៀងណាមួយនៅពេលអនាគត គឺត្រូវតែភ្ជាប់មកជាមួយ​នូវ​បទ​ឈប់បាញ់នៅក្នុងប្រទេសលីបង់»។

រដ្ឋមន្ត្រីការបរទេសអ៊ីរ៉ង់រូបនេះ បានកត់សម្គាល់ថា បញ្ហាដ៏សំខាន់មួយនេះគឺមិនអាចយកមកចរចា ឬដោះដូរបានឡើយ ហើយវាស្ថិតក្នុងចំណោមការទាមទារដ៏ស្របច្បាប់របស់សាធារណរដ្ឋឥស្លាម និងប្រជាជាតិដ៏ក្លាហានរបស់ខ្លួន។

លោក បាន​បន្ថែម​ទៀត​​ថា​ នៅក្នុងសំណើចុងក្រោយបង្អស់របស់ខ្លួន ដែលបានបញ្ជូនទៅកាន់អ្នកសម្របសម្រួលប៉ាគីស្ថាន ក្នុងគោលបំណងបញ្ចប់សង្គ្រាមជាអចិន្ត្រៃយ៍និងយូរអង្វែង អ៊ីរ៉ង់បានសង្កត់ធ្ងន់ថា​ បញ្ហា​នៅ​ប្រទេសលីបង់ ត្រូវតែត្រូវបានរួមបញ្ចូលទៅក្នុងកិច្ចព្រមព្រៀងឈប់បាញ់ណាមួយនាពេលអនាគត។

អ៊ីរ៉ង់តែងតែប្រកាន់ខ្ជាប់នូវជំហរជាគោលការណ៍របស់ខ្លួនថា ការបញ្ឈប់ការឈ្លានពានរបស់អ៊ីស្រាអែលលើប្រទេសលីបង់ គឺជាលក្ខខណ្ឌចម្បង និងដាច់ខាតសម្រាប់វឌ្ឍនភាពណាមួយនៅក្នុងការចរចាជាមួយភាគីអាមេរិក ក៏ដូចជាសម្រាប់កិច្ចព្រមព្រៀងនាពេលអនាគតផងដែរ៕

អត្ថបទ៖ សាង ស្រីល័ក្ខ