ឥណ្ឌូណេស៊ី ​គ្រោងទិញ​យន្តហោះ​យោធា Airbus A400M ចំនួន​៤​គ្រឿង​បន្ថែម​ទៀត

ប្រធានាធិបតីឥណ្ឌូណេស៊ីលោក Prabowo Subianto បានប្រាប់កងកម្លាំងប្រដាប់អាវុធជាតិឥណ្ឌូណេស៊ី (TNI) ឲ្យបញ្ជាទិញ​យន្តហោះ​យោធា Airbus A400M ចំនួន​បួន​គ្រឿង​បន្ថែម​ទៀត ដើម្បីជួយក្នុងការសង្គ្រោះគ្រោះមហន្តរាយ និងកិច្ចខិតខំប្រឹងប្រែងមនុស្សធម៌អន្តរជាតិ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី០៣ខែវិច្ឆិកា។

បទបញ្ជានេះបានកើតឡើងអំឡុងពេលដែលលោក Prabowo បានប្រគល់យន្តហោះដឹកជញ្ជូន Airbus A400M ថ្មីមួយគ្រឿងជាផ្លូវការទៅឱ្យ TNI នៅមូលដ្ឋានទ័ពអាកាស Halim Perdanakusuma ក្នុងទីក្រុងហ្សាកាតា ។ ចំពោះយន្តហោះថ្មីនេះមានលេខ A-4001 ដឹករយៈពេល៣ថ្ងៃពីទីក្រុង Seville ប្រទេសអេស្ប៉ាញទម្រាំមកដល់ប្រទេសឥណ្ឌូណេស៊ី។

លោក Prabowo បាននិយាយថា យន្តហោះនេះនឹងត្រូវបានប្រើប្រាស់សម្រាប់ការឆ្លើយតបនឹងគ្រោះមហន្តរាយ ដូចជាការជម្លៀសនាក់របួស និងផ្តល់ជំនួយផ្នែកវេជ្ជសាស្រ្ត។ លោកក៏បាននិយាយផងដែរថា ប្រទេសឥណ្ឌូណេស៊ីគួរតែជួយប្រទេសដទៃទៀតក្នុងអំឡុងពេលមានអាសន្ន ដូចដែលប្រទេសដទៃទៀតបានជួយប្រទេសឥណ្ឌូណេស៊ីក្នុងអំឡុងពេលរលកយក្សស៊ូណាមិនៅខេត្ត Aceh ឆ្នាំ ២០០៤ និងការរញ្ជួយដីដ៏ខ្លាំងកាលពីឆ្នាំ ២០១៨។ ថ្មីៗនេះ ប្រទេសឥណ្ឌូណេស៊ីក៏បានបញ្ជូនយន្តហោះ Hercules ទៅកាន់ប្រទេសតួកគីបន្ទាប់ពីមានរញ្ជួយដីដ៏ធំមួយ ហើយបច្ចុប្បន្នក៏នៅតែមានក្រុមគ្រូពេទ្យដែលធ្វើការនៅហ្គាហ្សាជាមួយ អារ៉ាប់រួម(UAE)។

គួរបញ្ជាក់ថាយន្តហោះ A400M ផលិតដោយក្រុមហ៊ុន Airbus អាចផ្ទុកទំនិញធ្ងន់ៗដូចជារថពាសដែក និងឧទ្ធម្ភាគចក្រ។ វាក៏អាចចុះចតលើផ្លូវរត់ខ្លី ឬមិនទាន់ក្រាលកៅស៊ូផងដែរ ដែលធ្វើឱ្យវាងាយស្រួលសម្រាប់ទាំងបេសកកម្មយោធា និងមនុស្សធម៌។

គួររម្លឹកថាក្រសួងការពារជាតិឥណ្ឌូណេស៊ីបានចុះហត្ថលេខាលើកិច្ចព្រមព្រៀងមួយក្នុងឆ្នាំ ២០២១ដើម្បីទិញយន្តហោះ A400M ចំនួនពីរគ្រឿង និងមានគម្រោងទិញបន្ថែមចំនួន ៤ គ្រឿងទៀតនាពេលអនាគត។ ការបន្ថែមថ្មីនេះនឹងជួយពង្រឹងសមត្ថភាពរបស់ប្រទេសឥណ្ឌូណេស៊ីក្នុងការឆ្លើយតបយ៉ាងឆាប់រហ័សចំពោះគ្រោះមហន្តរាយទាំងក្នុងស្រុក និងក្រៅប្រទេស៕

អត្ថបទ៖ ប៊ុន សុភាព