ជនជាតិថៃ រាំដោះអាវលើដំបូលរថយន្តនៅជប៉ុន កំពុងរងការរិះគន់ពេញពិភពលោក

ប្រទេសថៃត្រូវស្អុយឈ្មោះពេញពិភពលោកទៀតហើយ បន្ទាប់ពីមាន influencer ម្នាក់រាំដោះអាវនៅលើដំបូលរថយន្តលើទឹកដីជប៉ុន ដែលបង្កការរិះគន់មិនសំចៃមាត់ពីសំណាក់ជនជាតិរបស់ខ្លួននិងបរទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Amarin នៅថ្ងៃអង្គារទី១៨ខែវិច្ឆិកាឆ្នាំ២០២៥, Influencer ម្នាក់នោះមានឈ្មោះ Jackpapho ដែលបានបង្ហោះវីដេអូរាំដោះអាវនៅលើដំបូងរថយន្ត ​ដោយសរសេរ Caption ថា៖ «ទោះអ្នកណាមើលងាយខ្ញុំក៏ដោយ ក៏ខ្ញុំមិនខ្វល់ពាក្យសម្តីពួកគេដែរ»។

យ៉ាងណា សកម្មភាពនេះត្រូវគេរិះគន់ដូចទឹកបាក់ទំនប់ព្រោះវាស្ថិតនៅទីសាធារណៈដោយមានអ្នកទេសចរទាំងថៃនិងបរទេស ដើរកាត់ទៅមក ហើយអ្វីដែលសំខាន់គឺ មានទេសភាពភ្នំ Fuji ដែលជានិមិត្តសញ្ញាតំណាងឲ្យប្រទេសជប៉ុននៅខាងក្រោយទៀត។

មិនមែនតែថៃនិងជប៉ុនទេ វីដេអូនេះ ត្រូវបានអ្នកលេងបណ្តាញសង្គមទូទាំងពិភពលោក យកទៅចែកចាយនិងជជែកវែកញែកគ្នា និងចំអកដល់ទង្វើរបស់ influencer ម្នាក់នេះ ដែលរាំដោះអាវនៅមុខភ្នំ Fuji។

ទង្វើនេះ ធ្វើឲ្យទាំងជនជាតិថៃគ្នាឯងនិងបរទេស នាំគ្នាសម្រុកចូល Comment ជេរនិងស្តីបន្ទោស Jackpapho ហើយដល់ថ្នាក់ឈានដល់ការអំពាវនាវឲ្យហាមបុរសម្នាក់នេះ មិនឲ្យចូលប្រទេសជប៉ុនមួយជីវិតទៀតផង។

យ៉ាងណា មានពលរដ្ឋថៃមួយចំនួន បានធ្វើការសុំទោសដល់ជនជាតិជប៉ុនដែលប៉ះពាល់ដោយសារ អាកប្បកិរិយាដ៏អាម៉ាស់នេះ ហើយជំរុញឲ្យអាជ្ញាធរថៃនិងជប៉ុន ចាត់វិធានការផ្លូវច្បាប់លើបុគ្គលពាក់ព័ន្ធ៕

អត្ថបទ៖ សុខ សុវណ្ណ