ព័ត៌មានអន្ដរជាតិ

ជនស៊ីវិលអ៊ុយក្រែនជាង២៥០០នាក់ស្លាប់ក្នុងការវាយប្រហារពីរុស្ស៊ី ក្នុងឆ្នាំ២០២៥

បានផុស

៥ ខែ មុន

នៅ

ថ្ងៃពុធ ១៤ មករា ២០២៦

ដោយ

របាយការណ៍របស់អង្គការសហប្រជាជាជតិ បានបង្ហាញឲ្យឃើញថា ប្រជាជនអ៊ុយក្រែនរស់នៅក្នុងការភ័យខ្លាចដោយសារតែការវាយប្រហាររបស់រុស្ស៊ីគ្មានរើស និងការបែងចែកទីតាំងរវាងយោធានិងស៊ីវិលឡើយ។ ប្រជាជនស៊ីវិលអ៊ុយក្រែនបានស៊ូទ្រាំខ្លាំងណាស់ក្នុងជីវិតរបស់ពួកគេ និងអ្នកខ្លះទៀតក៏បានស្លាប់ ចាប់តាំងពីរុស្ស៊ីចាប់ផ្តើមវាយលុកពេញប្រទេសរបស់ខ្លួនក្នុងឆ្នាំ២០២២។

សម្រាប់ឆ្នាំ២០២៥ដែលទើបកន្លងទៅនេះ តាមរបាយការណ៍របស់អង្គការសហប្រជាជាតិ ប្រជាជនស៊ីវិលអ៊ុយក្រែនប្រហែល ២៥០០នាក់ បានបាត់បង់ជីវិត។ នេះបើតាមរបាយការណ៍ដែលចេញផ្សាយដោយអង្គការសហប្រជាជាតិកាលពីថ្ងៃចន្ទ។

លោក Antonio Guterres អគ្គលេខាធិការអង្គការសហប្រជាជាតិ។ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្សាយរបស់ CNN បានឱ្យដឹងថា ក្រុមបេសកកម្មឃ្លាំមើលសិទ្ធិមនុស្សរបស់អង្គការសហប្រជាជាតិនៅអ៊ុយក្រែនលើកឡើងថា ខ្លួនបានផ្ទៀងផ្ទាត់តួលេខ មានជនស៊ីវិលចំនួន ២ ៥១៤នាក់ ត្រូវបានសម្លាប់ និង ១២ ១៤២នាក់ បានរងរបួស នៅក្នុងអំពើហិង្សា ជម្លោះប្រទេសអ៊ុយក្រែនក្នុងឆ្នាំ២០២៥ ស្ទើរតែទាំងអស់នៃជនស៊ីវិល ស្ថិតនៅក្នុងការវាយប្រហាររបស់រុស្ស៊ីទៅនឹងតំបន់ដែលជាជម្រករបស់ពួកគេ។

របាយការណ៍របស់អង្គការសហប្រជាជាតិបង្ហាញយ៉ាងច្បាស់ថា គ្មានកន្លែងណាក្នុងប្រទេសអ៊ុយក្រែនមានសុវត្ថិភាពនោះទេ ជាងមួយភាគបីនៃជនស៊ីវិលដែលត្រូវបានសម្លាប់ និងរងរបួស ស្ថិតនៅក្នុងតំបន់ពីជួរមុខ ពេលដែលរុស្ស៊ីវាយប្រហារប្រទេសអ៊ុយក្រែន។

គួរឱ្យដឹងផងដែរថា ប្រទេសរុស្ស៊ីបានបង្កើនយុទ្ធសាស្រ្តវាយប្រហារតាមអាកាសរបស់ខ្លួនយ៉ាងខ្លាំង ប្រឆាំងនឹងទីក្រុងនានារបស់អ៊ុយក្រែនក្នុងឆ្នាំ២០២៥ ដោយបានធ្វើភេរវកម្មជាប្រចាំដល់ប្រជាជនស៊ីវិលជាមួយនឹងការវាយប្រហារដោយដ្រូន(យន្តហោះគ្មានមនុស្សបើក) និងមីស៊ីល។

លើសពីនេះទៅទៀត អង្គការសហប្រជាជាតិលើកឡើងថា ចំនួននៃការស្លាប់ជនស៊ីវិលដែលបានចងក្រងជាឯកសារនៅអ៊ុយក្រែន កាលពីឆ្នាំមុនគឺ ៣១ភាគរយ ខ្ពស់ជាងឆ្នាំ២០២៤ និង ៧០ភាគរយ ខ្ពស់ជាងឆ្នាំ២០២៣ ។

តែយ៉ាងណា នាពេលកន្លងមកអង្គការសហប្រជាជាតិលើកឡើងថា៖ «តួលេខជាក់ស្តែងទំនងជាខ្ពស់ជាងនេះ ចំពោះការស្លាប់ជនស៊ីវិលនៅអ៊ុយក្រែន ដោយសាររបាយការណ៍ជាច្រើនកំពុងស្ថិតក្នុងការរង់ចាំ ដើម្បីបញ្ជាក់»៕

ប្រែសម្រួល៖ ណឺ មិនា