Connect with us

ព័ត៌មានអន្ដរជាតិ

ព្យុះខែប្រាំងបញ្ចេញឥទ្ធិពលនៅថៃ, វាយប្រហារខេត្ត Nakhon Ratchasima បង្កការបំផ្លិចបំផ្លាញ

បានផុស

នៅ

ព្យុះខែប្រាំងនៅប្រទេសថៃ​ បានបញ្ចេញឥទ្ធិពលហើយ ដោយបង្កឲ្យមានភ្លៀងធ្លាក់ខ្លាំងនិងខ្យល់កន្ត្រាក់ វាយប្រហារខេត្ត Nakhon Ratchasima បង្កការបំផ្លិចបំផ្លាញ។

(រូប៖ Amarin)

តាមការផ្សាយរបស់ Amarin កាលពីថ្ងៃចន្ទទី២៣ខែកុម្ភៈ, ព្យុះនេះបានវាយប្រហារពេញទំហឹង ខណៈបើតាមរូបភាពនិងវីដេអូបង្ហោះលើបណ្តាញសង្គម Facebook, គេបានឃើញឥទ្ធិពលព្យុះបោកបក់អំឡុងពិធីបុណ្យសពមួយនៅស្រុក Khon Buri។

ក្នុងការបង្ហោះនោះ, ខ្យល់ព្យុះបានបោកផ្តួលរោងបុណ្យ កួចកៅអី មានទាំងផ្លេកបន្ទោរនិងរន្ទះបាញ់ រួមជាមួយភ្លៀងធ្លាក់ដូចហែកមេឃ បោកបំបាក់ដើមឈើថែមទៀតផង។ យ៉ាងណា មកទល់ពេលនេះ មិនទាន់មានសេចក្តីរាយការណ៍អំពីមនុស្សស្លាប់ឬរងរបួសនោះទេ។  

(រូប៖ Amarin)

ព្យុះនេះកើតឡើងបន្ទាប់ពីនាយកដ្ឋានឧតុនិយមថៃ បានចេញការព្រមានថា ខេត្តចំនួន៦០ពោលគឺសឹងតែទូទាំងប្រទេសទៅហើយ ដែលនឹងត្រូវវាយប្រហារដោយព្យុះខែប្រាំងយ៉ាងធ្ងន់ធ្ងរ ចាប់ពីដើមសប្តាហ៍នេះទៅ។

តាមការផ្សាយរបស់ The Nation ដែលដកស្រង់សេចក្តីប្រកាសរបស់នាយកដ្ឋានកាលពីថ្ងៃអាទិត្យទី២២ខែកុម្ភៈ, តំបន់ដែលនឹងរងគ្រោះធ្ងន់ធ្ងរជាងគេគឺភាគឦសាន កណ្តាល និងទីក្រុងបាងកក។

(រូប៖ Amarin)

នៅភាគឦសាន ខេត្តទាំងអស់នឹងត្រូវរងគ្រោះ ចំណែកភាគកណ្តាល ព្យុះក៏នឹងវាយប្រហារគ្រប់ខេត្តផងដែរ លើកលែងតែ Phetchaburi និង Prachuap Khiri Khan ប៉ុណ្ណោះ។

តំបន់ខាងលើនឹងជួបប្រទះភ្លៀងធ្លាក់យ៉ាងគំហុក ខ្យល់បក់ខ្លាំងលាយឡំខ្យល់កន្ត្រាក់ ព្រមទាំងបាតុភូតធម្មជាតិដ៏គ្រោះថ្នាក់ផ្សេងៗ ចាប់ពីថ្ងៃចន្ទទៅ៕

អត្ថបទ៖ សុខ សុវណ្ណ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត
Helistar Cambodia - Helicopter Charter Services
Sokimex Investment Group
Sokha Hotels

ព័ត៌មានពេញនិយម