ព័ត៌មានអន្ដរជាតិ

បារាំង ទាមទារឱ្យសហភាពអឺរ៉ុបដាក់ទណ្ឌកម្មខ្លាំងបំផុតលើអ៊ីស្រាអែល

បានផុស

២ ខែ មុន

នៅ

ថ្ងៃពុធ ២៧ ឧសភា ២០២៦

ដោយ

សកម្មជនដែលអះអាងថាជាក្រុមមនុស្សធម៌មានគ្នាជាង៤០០នាក់ មកពីជុំវិញពីភពលោក ដែលត្រូវបានយោធាអ៊ីស្រាអែលចាប់ និងធ្វើបាប ក្រោយពីព្យាយាមបំបែកការបិទខ្ទប់ផ្លូវសមុទ្ររបស់អ៊ីស្រាអែល ដើម្បីដឹកជំនួយឆ្ពោះទៅតំបន់ហ្គាហ្សា ពេលមានសេចក្តីរាយការណ៍អំពីការខ្វះខាតស្បៀងអាហារយ៉ាងខ្លាំងក្នុងតំបន់នោះ។

ក្រោយការស្ទាក់ចាប់ដោយកងកម្លាំងអ៊ីស្រាអែល នៅក្នុងសមុទ្រមេឌីទែរ៉ាណេកាលពីថ្ងៃចន្ទ ទី១៨ ខែឧសភា ឆ្នាំ២០២៦ វីដេអូឃ្លីបដែលបង្ហាញពីការធ្វើទុក្ខបុកម្នេញ លើសកម្មជនទាំងនោះ ត្រូវបានចែកលើបណ្តាញសង្គម និង មានប្រតិកម្មយ៉ាងខ្លាំងពីបណ្តាប្រទេសនានាជាពិសេសរដ្ឋាភិបាលតំបន់អឺរ៉ុប។

រដ្ឋាភិបាល ប្រទេសបារាំង កាលពីថ្ងៃអង្គារ បានទាមទារឱ្យសហភាពអឺរ៉ុបដាក់ទណ្ឌកម្មឱ្យខ្លាំងបំផុតលើរដ្ឋាភិបាលអ៊ីស្រាអែល តាមដែលអាចធ្វើទៅបាន បន្ទាប់ពីរដ្ឋមន្រ្តីអ៊ីស្រាអែលប្រើអំពើហិង្សាប្រឆាំងនឹងសកម្មជននៃកងនាវាមនុស្សធម៌ Global Sumud មានគោលបំណងយកជំនួយទៅកាន់តំបន់ហ្គាហ្សា។

នាយករដ្ឋមន្ត្រីបារាំង លោក Sebastien Lecornu ។ រូបភាព៖ AFP

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារសារព័ត៌មាន Anadolu ផ្សាយថ្ងៃទី២៦ ខែឧសភា ឆ្នាំ២០២៦ នាយករដ្ឋមន្ត្រីបារាំង លោក Sebastien Lecornu ប្រាប់រដ្ឋសភាថា៖ « វាមានសារៈសំខាន់ណាស់ក្នុងការបន្តដាក់ទណ្ឌកម្មបន្ថែមទៀត នៅក្នុងក្របខ័ណ្ឌសហភាពអឺរ៉ុប។ វាជារឿងដែលមិនគួរឱ្យជឿថា ប្រទេសដូចជាបារាំងមិនឆ្លើយតប ដោយប្រើឧបករណ៍នីតិរដ្ឋនិងការគោរពច្បាប់អន្តរជាតិយ៉ាងពេញលេញ។ ជាការពិត! មានអ្នកខ្លះមិនគោរពវា[ច្បាប់អន្តរជាតិ] តែមិនមានន័យថាយើងត្រូវតែបរាជ័យក្នុងការគោរពនោះទេ»។

គួរបញ្ជាក់ថា កងទ័ពអ៊ីស្រាអែលបានវាយប្រហារកងនាវាមនុស្សធម៌ Global Sumud ធ្វើដំណើរទៅកាន់តំបន់ហ្គាហ្សា កាលពីថ្ងៃចន្ទសប្តាហ៍មុន ក្នុងដែនទឹកអន្តរជាតិ។ ការផ្សាយផ្ទាល់ពីកងនាវាបង្ហាញថា កងកម្លាំងកងទ័ពជើងទឹកអ៊ីស្រាអែលកំពុងស្ទាក់ចាប់នាវាទាំងនោះ។

ការទាមទារឱ្យមានទណ្ឌកម្មនេះកើតឡើង បន្ទាប់ពីការចែកចាយវីដេអូមួយបង្ហោះដោយ លោក Itamar Ben-Gvir ជាដៃគូកាន់អំណាចដ៏សំខាន់របស់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ដោយបង្ហាញសកម្មភាពរបស់សកម្មជនកំពុងលុតជង្គង់ជាជួរយ៉ាងណែន ដោយចងដៃពួកគេទៅក្រោយខ្នង។

កងនាវាដែលមានទូកអមជាង ៥០គ្រឿង បានចេញដំណើរកាលពីថ្ងៃព្រហស្បតិ៍សប្តាហ៍មុនពីស្រុក Marmaris ប្រទេសតួកគីនៃសមុទ្រមេឌីទែរ៉ាណេ មានបំណងជាថ្មី ដើម្បីបំបែកការបិទផ្លូវរបស់អ៊ីស្រាអែលលើតំបន់ហ្គាហ្សា ដែលធ្វើឡើងចាប់តាំងពីរដូវក្តៅ ឆ្នាំ២០០៧ ។
បេសកកម្មនោះមានសកម្មជនចូលរួមចំនួន ៤២៦នាក់ រួមទាំងសកម្មជនតួកគីចំនួន ៩៦នាក់ និងមកពី ៣៩ប្រទេសផ្សេងទៀត៕

សម្រួល៖ ណឺ មិនា