ព័ត៌មានអន្ដរជាតិ

សហភាពអឺរ៉ុប ថ្កោលទោសរុស្ស៊ីយ៉ាងខ្លាំង ដែលបើកការវាយប្រហារលើអ៊ុយក្រែនដ៏សាហាវ

បានផុស

១ ខែ មុន

នៅ

ថ្ងៃចន្ទ ២៥ ឧសភា ២០២៦

ដោយ

ប្រទេសរុស្ស៊ី បានបើកការវាយប្រហារទ្រង់ទ្រាយធំលើអ៊ុយក្រែនជាថ្មីកាលពីយប់ថ្ងៃអាទិត្យ ដោយបញ្ជូនដ្រូនរាប់រយគ្រឿងនិងបាញ់មីស៊ីលជិត ១០០គ្រាប់ បណ្តាលឱ្យមនុស្ស ៤នាក់បាត់បង់ជីវិត ខណៈជាង ១០០នាក់រងរបួស។

មេដឹកនាំនិងមន្ត្រីអឺរ៉ុប បានថ្កោលទោសយ៉ាងខ្លាំង ចំពោះរលកថ្មីនៃការវាយប្រហារដោយមីស៊ីលនិងដ្រូនរបស់រុស្ស៊ីនៅទូទាំងប្រទេសអ៊ុយក្រែន ដោយពណ៌នាថា ជាការកំណត់គោលដៅដោយចេតនាលើជនស៊ីវិល នាំឱ្យមានការកើនឡើងសង្គ្រាមបន្ថែមទៀត ខណៈអឺរ៉ុបបញ្ជាក់ជាថ្មីនូវការគាំទ្រផ្នែកយោធា និងកាទូតបន្តបន្ទាប់សម្រាប់ទីក្រុងកៀវ។ នេះបើយោងតាមភ្នាក់ងារសារព័ត៌មាន Anadolu ផ្សាយថ្ងៃទី២៤ ខែកុម្ភៈ ឆ្នាំ២០២៦ ។

លោកស្រី Ursula von der Leyen ប្រធានគណៈកម្មការសហភាពអឺរ៉ុប លើកឡើងតាមបណ្តាញសង្គម X កាលពីថ្ងៃអាទិត្យថា៖ « ការវាយប្រហារទាំងនោះឆ្លុះបញ្ចាំងពីភាពឃោរឃៅ និងការមិនអើពើទាំងជីវិតមនុស្ស និងការចរចាសន្តិភាព។ ការគាំទ្របន្ថែមទៀតរបស់អឺរ៉ុបសម្រាប់ប្រព័ន្ធការពារដែនអាកាសរបស់អ៊ុយក្រែនកំពុងត្រូវបានរៀបចំ។ ភេរវកម្មប្រឆាំងនឹងជនស៊ីវិលមិនមែនបញ្ជាក់ពីអំណាចទេ»។

លោកស្រី Ursula von der Leyen ប្រធានគណៈកម្មការសហភាពអឺរ៉ុប។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនខុសគ្នាប៉ុន្មាន លោកស្រី Kaja Kallas ប្រធានគោលនយោបាយការបរទេសសហភាពអឺរ៉ុបថា ការវាយប្រហារទាំងនោះឆ្លុះបញ្ចាំងពីការផ្លាស់ប្តូររបស់រុស្ស៊ីឆ្ពោះទៅរកយុទ្ធសាស្ត្រភេរវកម្មប្រឆាំងនឹងអ៊ុយក្រែន។

លោកស្រីសរសេរលើបណ្តាញសង្គម X ថា៖ « ទាំងនោះគឺជាទង្វើភេរវកម្មដ៏គួរឱ្យស្អប់ខ្ពើម ក្នុងគោលបំណងសម្លាប់ជនស៊ីវិលឱ្យបានច្រើនតាមដែលអាចធ្វើទៅបាន [… ] សប្តាហ៍ក្រោយ រដ្ឋមន្ត្រីការបរទេសសហភាពអឺរ៉ុបនឹងពិភាក្សា ដើម្បីបង្កើនសម្ពាធអន្តរជាតិលើរុស្ស៊ី»។

ដោយឡែក ប្រធានាធិបតីបារាំង លោក Emmanuel Macron សរសេរលើបណ្តាញសង្គម X ថា៖ « បារាំងថ្កោលទោសការវាយប្រហារនោះ ជាពិសេសការប្រើប្រាស់មីស៊ីលផ្លោង Oreshnik មកលើទឹកដីអ៊ុយក្រែន»។

អធិការបតីអាល្លឺម៉ង់ លោក Friedrich Merz និយាយថា៖ « ទីក្រុងប៊ែរឡាំងថ្កោលទោសយ៉ាងខ្លាំង ចំពោះការកើនឡើងនៃសង្រ្គមដោយមិនប្រុងប្រយ័ត្ន។ អាល្លឺម៉ង់នៅតែប្តេជ្ញាចិត្តយ៉ាងមុតមាំ ចំពោះអធិបតេយ្យភាពអ៊ុយក្រែន»។

មិនតែប៉ុណ្ណោះក៏មានបណ្តាប្រទេសអឺរ៉ុបមួយចំនួនទៀតថ្កោលទោសស្រដៀងគ្នា ចំពោះរុស្ស៊ីប្រើមីស៊ីលនិងវាយប្រហារទ្រង់ទ្រាយធំនេះ៕

សម្រួល៖ ណឺ មិនា