ព័ត៌មានអន្ដរជាតិ

ប្រធានាធិបតីអ៊ីរ៉ង់៖ សង្រ្គាមនៅអ៊ីរ៉ង់ចាំបាច់ត្រូវតែបញ្ឈប់ជាបន្ទាន់

បានផុស

៣ ខែ មុន

នៅ

ថ្ងៃអាទិត្យ ២២ មីនា ២០២៦

ដោយ

ប្រធានាធិបតីអ៊ីរ៉ង់ លោក Masoud Pezeshkian លើកឡើងកាលពីថ្ងៃសៅរ៍ ថា សង្រ្គាមនៅអ៊ីរ៉ង់ដែលបានបើកការវាយប្រហារដោយសហរដ្ឋអាមេរិកនិងអ៊ីស្រាអែលចាំបាច់ត្រូវតែបញ្ឈប់ជាបន្ទាន់ ដើម្បីបញ្ចប់សង្គ្រាមនិងជម្លោះក្នុងតំបន់។ នេះបើតាមស្ថានទូតអ៊ីរ៉ង់ប្រចាំប្រទេសឥណ្ឌា បង្ហោះលើបណ្តាញសង្គម X កាលពីថ្ងៃទី២១ ខែមីនា ឆ្នាំ២០២៦ ។

យោងតាមភ្នាក់ងាររ៉យទ័រផ្សាយថ្ងៃទី២២ ខែមីនា ការលើកឡើងនេះធ្វើឡើង បន្ទាប់ពី លោក Pezeshkian បានឆ្លើយឆ្លងជាមួយនាយករដ្ឋមន្ត្រីឥណ្ឌា លោក Narendra Modi តាមរយៈទូរស័ព្ទកាលពីម្សិលមិញ។

លោក Pezeshkian ប្រាប់ លោក Modi ថា៖ « គួរតែមានការធានា ដើម្បីទប់ស្កាត់ការកើតឡើងវិញនៃការឈ្លានពានបែបនេះនាពេលអនាគត»។

លោក Narendra Modi និង លោក Masoud Pezeshkian ។ រូបភាព៖ Iran in India

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកក៏បានអំពាវនាវដល់ប្លុក BRICS នៃសេដ្ឋកិច្ចកំពុងរីកចម្រើនសំខាន់ៗ នឹងដើរតួនាទីឯករាជ្យក្នុងការបញ្ឈប់ការឈ្លានពានប្រឆាំងនឹងអ៊ីរ៉ង់។

យោងតាមស្ថានទូតអ៊ីរ៉ង់ប្រចាំប្រទេសឥណ្ឌា ប្រធានាធិបតីអ៊ីរ៉ង់បានស្នើឡើងនូវក្របខណ្ឌសន្តិសុខក្នុងតំបន់ រួមមានប្រទេសអាស៊ីខាងលិច ដើម្បីធានាសន្តិភាពដោយគ្មានការជ្រៀតជ្រែកពីបរទេស។

ចំណែកនៅក្នុងការបង្ហោះដាច់ដោយឡែកមួយលើបណ្តាញសង្គម X កាលពីព្រឹកថ្ងៃសៅរ៍ លោក Modi លើកឡើងថា៖ « ប្រទេសឥណ្ឌាបានថ្កោលទោសអ៊ីរ៉ង់លើការវាយប្រហារ ចំពោះហេដ្ឋារចនាសម្ព័ន្ធសំខាន់ៗនៅមជ្ឈិមបូព៌ា។ យើងក៏នឹងការពិភាក្សាជាមួយ លោក Pezeshkian ផងដែរ»។

នាយករដ្ឋមន្ត្រីឥណ្ឌាបានបញ្ជាក់ជាថ្មីពីសារៈសំខាន់នៃការការពារសេរីភាពនៃការធ្វើនាវាចរណ៍ និងធានាថាផ្លូវដឹកជញ្ជូននៅតែបើកចំហ ហើយមានសុវត្ថិភាព។

នៅក្នុងសង្រ្គាមអ៊ីរ៉ង់ ដោយផ្អែកលើការពិគ្រោះយោបល់ និងពិភាក្សារបស់លោកជាមួយមេដឹកនាំពិភពលោកជាច្រើន លោក Modi បានសង្កត់ធ្ងន់ថា៖ « ការជ្រើសរើសផ្លូវនៃការបង្កសង្គ្រាមមិនមែនជាផលប្រយោជន៍ឡើយ ដូច្នេះគ្រប់ភាគីទាំងអស់គួរតែឈានទៅរកសន្តិភាពឱ្យបានឆាប់តាមដែលអាចធ្វើទៅបាន»៕

ប្រែសម្រួល៖ ណឺ មិនា