ស៊ីរី ប្រាប់ UN ថា អ៊ីស្រាអែលកំពុងប្រើទឹកដីខ្លួន​ធ្វើជាឈ្នាន់ វាយលីបង់

ស្ថានការណ៍នៅតំបន់មជ្ឈិមបូព៌ាកាន់តែមានភាពតានតឹងខ្លាំងឡើង បន្ទាប់ពីឯកអគ្គរដ្ឋទូតស៊ីរីប្រចាំអង្គការសហប្រជាជាតិ លោក Ibrahim Olabi បានឡើងថ្លែងការណ៍កាលពីថ្ងៃពុធ​ទី​២២​ខែមេសា​ឆ្នាំ​២០២៦​ ដោយចោទប្រកាន់ចំៗថា ប្រទេសអ៊ីស្រាអែលកំពុងប្រើប្រាស់ទឹកដីស៊ីរីធ្វើជាទីតាំងសម្រាប់បាញ់បោះ និងវាយប្រហារយោធាទៅលើប្រទេសលីបង់។

តាម​ការ​ផ្សាយ​របស់​ Anadolu លោក Olabi បានព្រមានដល់ក្រុមប្រឹក្សាសន្តិសុខថា សកម្មភាពរបស់ទីក្រុងទែលអាវីវ កំពុងតែរុញច្រានតំបន់ទាំងមូល​ឲ្យ​ធ្លាក់ចូលក្នុងសង្រ្គាមដ៏ធំមួយ ដែលពិបាកនឹងគ្រប់គ្រង។

នៅក្នុងអង្គប្រជុំនោះ លោក Olabi បានរៀបរាប់ថា អ៊ីស្រាអែលនៅតែបន្តគោលនយោបាយឈ្លានពាន និងពង្រីកទឹកដីរបស់ខ្លួនតាមរយៈគម្រោងពង្រីកលំនៅដ្ឋានក្នុងតំបន់ Golan ដែលជាដីរបស់ស៊ីរីកំពុងត្រូវបានទន្ទ្រានកាន់កាប់។ លោកបានសង្កត់ធ្ងន់ថា អ៊ីស្រាអែលមិនត្រឹមតែចូលមកលុកលុយផ្នែកខាងត្បូងនៃប្រទេសស៊ីរីប៉ុណ្ណោះទេ ប៉ុន្តែថែមទាំងបានប្រើប្រាស់តំបន់ដែលខ្លួនជ្រៀតចូលបាននោះ ធ្វើជាឈ្នាន់សម្រាប់វាយប្រហារទៅលើ​លីបង់​ទៀតផង។ លើសពីនេះ លោកបានទម្លាយរឿងរ៉ាវដ៏គួរ​ឲ្យ​រន្ធត់ថា កងទ័ពអ៊ីស្រាអែលបានកំណត់គោលដៅលើជនស៊ីវិល មានការចាប់ពង្រត់កុមារ និងបានបាញ់ថ្នាំគីមីមិនស្គាល់អត្តសញ្ញាណទៅលើដីកសិកម្ម ដែលទង្វើទាំងនេះសុទ្ធតែត្រូវបានកត់ត្រាទុកដោយភ្នាក់ងារអង្គការសហប្រជាជាតិ។

ក្រៅពីបញ្ហាយោធា តំណាងប្រទេសស៊ីរីរូបនេះក៏បានបង្ហាញក្ដីបារម្ភថា មេដឹកនាំអ៊ីស្រាអែលកំពុងព្យាយាមរៀបចំផែនទីនយោបាយក្នុងតំបន់ឡើងវិញ ក្នុងបំណងបង្ខូចអនាគតរបស់ប្រទេសស៊ីរី និងចង់រុញស៊ីរី​ឲ្យ​ចូលទៅក្នុងជម្លោះតំបន់ ដើម្បីបំផ្លាញរាល់សមិទ្ធផលទាំងឡាយដែលស៊ីរីខំសម្រេចបានកន្លងមក។ ដោយសារហេតុផលនេះ លោក Olabi បានជំរុញឲ្យ​ក្រុមប្រឹក្សាសន្តិសុខចាត់វិធានការជាបន្ទាន់ ដើម្បីទប់ស្កាត់អ៊ីស្រាអែល និងបញ្ឈប់គោលនយោបាយឈ្លានពានទាំងនេះ ដើម្បីរក្សានិរន្តរភាពសម្រាប់ស៊ីរី និងតំបន់ទាំងមូល៕

ប្រែសម្រួល៖ ឈាង