ប្រមុខការទូតអ៊ីរ៉ង់ ចេញដំណើរទៅរុស្ស៊ី ដើម្បីជួប លោកពូទីន

បន្ទាប់ពីចំណាយពេលនៅប្រទេសប៉ាគីស្ថាន ពេលនេះ រដ្ឋមន្ត្រីការបរទេសអ៊ីរ៉ង់ Abbas Araghchi បានចាកចេញពីទីក្រុង អ៊ីស្លាម៉ាបាដ ហើយ ដើម្បីធ្វើដំណើរទៅកាន់ប្រទេសរុស្ស៊ី ជួបជាមួយប្រមុខរដ្ឋាភិបាលទីក្រុងមូស្គូ វ្ល៉ាឌីមៀរ ពូទីន។

តាមគម្រោង ប្រមុខការទូតអ៊ីរ៉ង់ នឹងត្រូវជួបពិភាក្សាជាមួយមន្ត្រីជាន់ខ្ពស់រុស្ស៊ី ជាច្រើនរូប ហើយក៏នឹងមានជំនួបពិសេសជាមួយលោក ពូទីន ផងដែរ ក្នុងទីក្រុង St Petersburg ស្របពេលប្រទេសរបស់ខ្លួន កំពុងមានសង្គ្រាម។

សារព័ត៌មានរដ្ឋអ៊ីរ៉ង់ IRNA ចុះផ្សាយនៅថ្ងៃចន្ទ ទី២៧ ខែមេសា ឆ្នាំ២០២៦ ថា ក្នុងដំណើរទស្សនកិច្ចនោះ លោក Araghchi ក៏នឹងជួបពិភាក្សាផងដែរជាមួយ សមភាគីរុស្ស៊ី Sergey Lavrov។

ទោះបីជាយ៉ាងណា របៀបវារៈទាំងមូល នៃកិច្ចពិភាក្សារវាងមន្ត្រីរុស្ស៊ីនិងអ៊ីរ៉ង់ មិនត្រូវបានទម្លាយឲ្យដឹង ជាសាធារណៈនោះទេ។

ដំណើរទស្សកិច្ចនេះ កើតឡើងបន្ទាប់ពីប្រមុខការទូតអ៊ីរ៉ង់ ទើបតែជួបជាមួយមន្ត្រីកំពូលៗរបស់ប៉ាគីស្ថា​ន ដូចជានាយករដ្ឋមន្ត្រី Shehbaz Sharif, រដ្ឋមន្ត្រីការបរទេស Ishaq Dar និងមេទ័ព Asim Munir។

ក្រោយមកទៀត លោក Araghchi បានបន្តដំណើរទៅកាន់ប្រទេសអូម៉ង់ រួចវិលមកប៉ាគីស្ថានវិញ មុននឹងចេញដំណើរម្តងទៀត ទៅកាន់ប្រទេសរុស្ស៊ី។

សកម្មភាពនេះ ត្រូវគេមើលឃើញថា ជាកិច្ចខិតខំប្រឹងប្រែងផ្នែកការទូត ដើម្បីប្រមូលការគាំទ្រ ក៏ដូចជារិះរកវិធីសាស្រ្ត ដើម្បីពន្លត់ភ្លើងសង្គ្រាម ដែលកំពុងឆាបឆេះយ៉ាងសន្ធោសន្ធៅ រាលដាលពេញតំបន់មជ្ឈិមបូព៌ា ដោយសារអាមេរិកនិងអ៊ីស្រាអែល ជាអ្នកបង្កាត់៕

អត្ថបទ៖ សុខ សុវណ្ណ