ព័ត៌មានអន្ដរជាតិ

ប្រមុខណាតូ បញ្ជាក់ពីអ្វីដែលធ្វើឲ្យ លោក ត្រាំ អាក់អន់ស្រពន់ចិត្ត

បានផុស

២ ខែ មុន

នៅ

ថ្ងៃអង្គារ ៥ ឧសភា ២០២៦

ដោយ

អគ្គលេខាធិការអង្គការណាតូ (NATO) លោក ម៉ាក រូតតេ (Mark Rutte) កាលពីថ្ងៃចន្ទ ទី៤ ខែឧសភា បាននិយាយថា បណ្ដាប្រទេសនៅអឺរ៉ុបបានយល់ច្បាស់នូវសាររបស់របស់ប្រធានាធិបតី ដូណាល់ ត្រាំ អំពីជម្លោះជាមួយអ៊ីរ៉ង់ ហើយកំពុងបង្កើនកិច្ចខិតខំប្រឹងប្រែង ដើម្បីពង្រឹងតួនាទីរបស់ពួកគេនៅក្នុងសម្ព័ន្ធភាពយោធាមួយនេះ។

**អគ្គលេខាធិការអង្គការណាតូ លោក Mark (រូបភាព៖Reuters)**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មាន CNA របស់សិង្ហបុរី បានចុះផ្សាយថា ថ្នាក់ដឹកនាំនៃប្រទេសជាសមាជិកណាតូ បានថ្លែងនៅក្នុងកិច្ចប្រជុំសហគមន៍នយោបាយអឺរ៉ុប (EPC) នៅប្រទេសអាមេនី ថា មេដឹកនាំអឺរ៉ុបបានយល់ពីសារនោះហើយ។ ពួកគេបានឮសារនោះយ៉ាងច្បាស់បំផុត ដោយលោកបានទទួលស្គាល់នូវការខកចិត្តពីខាងភាគីសហរដ្ឋអាមេរិក ចំពោះការរារែករបស់សម្ព័ន្ធមិត្តអឺរ៉ុប ក្នុងការចូលរួមក្នុងសង្គ្រាមនៅអ៊ីរ៉ង់នោះ។

សេចក្តីថ្លែងការណ៍នេះ ត្រូវបានធ្វើឡើង បន្ទាប់ពីលោក ត្រាំ បានរិះគន់សមាជិកណាតូសំខាន់ៗ មួយចំនួនថា មិនបានគាំទ្រសហរដ្ឋអាមេរិកឲ្យបានពេញលេញ នៅក្នុងយុទ្ធនាការដែលពាក់ព័ន្ធនឹងសង្គ្រាមអ៊ីរ៉ង់ និងជម្លោះរឿងច្រកហូរមូស។ ផែនការដកទ័ពអាមេរិកចំនួន ៥,០០០ នាក់ ចេញពីប្រទេសអាល្លឺម៉ង់ ក៏ត្រូវបានគេមើលឃើញថា ជាសញ្ញានៃការមិនពេញចិត្តរបស់ទីក្រុងវ៉ាស៊ីនតោន ចំពោះបណ្តាសម្ព័ន្ធមិត្តរបស់ខ្លួនផងដែរ។

លោក រូតតេ បានបញ្ជាក់ថា ប្រទេសអឺរ៉ុបជាច្រើនកំពុងបង្កើនការចូលរួម រួមទាំងការអនុញ្ញាតឲ្យប្រើប្រាស់មូលដ្ឋានទ័ព និងការគាំទ្រផ្នែកភស្តុភារផងដែរ។ ប្រទេសនានាដូចជា Montenegro, Croatia, រូម៉ានី, ព័រទុយហ្គាល់, ក្រិក, អ៊ីតាលី, អង់គ្លេស, បារាំង និងអាល្លឺម៉ង់ ត្រូវបានគេនិយាយថា កំពុងអនុវត្តកិច្ចព្រមព្រៀងទ្វេភាគីជាមួយសហរដ្ឋអាមេរិក។

ជាពិសេសថែមទៀត ប្រទេសមួយចំនួនក៏បានដាក់ពង្រាយនាវាបោសសម្អាតមីន នៅជិតច្រកសមុទ្រ Hormuz និងកំពុងត្រៀមលក្ខណៈសម្រាប់ជំហានបន្តបន្ទាប់ទៀត រួមទាំងលទ្ធភាពនៃការចូលរួមក្នុងបេសកកម្ម ដើម្បីធានានូវសេរីភាពនៃការធ្វើនាវាចរណ៍ផងដែរ៕

អត្ថបទ៖ សាង ស្រីល័ក្ខ