ព័ត៌មានអន្ដរជាតិ

អ៊ីរ៉ង់ ព្រមានអាមេរិកថា «គ្មានដំណោះស្រាយយោធា ចំពោះវិបត្តិនយោបាយទេ»

បានផុស

២ ខែ មុន

នៅ

ថ្ងៃអង្គារ ៥ ឧសភា ២០២៦

ដោយ

ស្របពេលដែលប្រធានាធិបតីអាមេរិក បានចេញបញ្ជាឲ្យយោធាជើងទឹកអមនាវាដឹកទំនិញចេញពីច្រក ហូរមូស (Hormuz) រដ្ឋមន្ត្រីការបរទេសអ៊ីរ៉ង់ លោក Abbas Araghchi បានព្រមានតបវិញថា «គ្មានដំណោះស្រាយយោធា ចំពោះវិបត្តិនយោបាយទេ» ដោយព្រមានសហរដ្ឋអាមេរិកនិងអារ៉ាប់រួម(UAE) ថា កុំធ្វើឱ្យស្ថានការណ៍កាន់តែតានតឹងឡើង នៅច្រកសមុទ្រ Hormuz ។ នេះបើយោងតាមសារព័ត៌មាន TRT World ផ្សាយថ្ងៃទី៥ ខែឧសភា ឆ្នាំ២០២៦ ។

ដោយស្រង់ចេញពីប្រព័ន្ធផ្សព្វផ្សាយសង្គម X លោក Araghchi បានសរសេរថា៖« សកម្មភាពនៅច្រក Hormuz បង្ហាញយ៉ាងច្បាស់ថា គ្មានដំណោះស្រាយយោធា ចំពោះវិបត្តិនយោបាយទេ ខណៈការចរចាកំពុងដំណើរការទៅមុខជាមួយនឹងកិច្ចខិតខំប្រឹងប្រែងដ៏សប្បុរសរបស់ប៉ាគីស្ថាន។ សហរដ្ឋអាមេរិកគួរតែប្រុងប្រយ័ត្ន ចំពោះការអូសទាញត្រឡប់ទៅក្នុងភាពច្របូកច្របល់ដោយអ្នកដែលមានចេតនាអាក្រក់។ អារ៉ាប់រួមក៏គួរតែធ្វើដូច្នេះដែរ»។

រដ្ឋមន្ត្រីការបរទេសអ៊ីរ៉ង់ លោក Abbas Araghchi . រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Araghchi ក៏បានបដិសេធផែនការ «Project Freedom» របស់ទីក្រុងវ៉ាស៊ីនតោន ដើម្បីអមដំណើរកប៉ាល់ពាណិជ្ជកម្មចេញពីច្រកសមុទ្រ។

រដ្ឋមន្រ្តីរូបនេះបន្ថែមថា៖ « ផែនការ Project Freedom គឺជាការជាប់គាំងនៃ Project»។

សេចក្តីថ្លែងការណ៍កើតឡើង ចំពេលក្រុមហ៊ុន Maersk ដែលជាក្រុមហ៊ុនដឹកជញ្ជូនយក្សរបស់ប្រទេសដាណឺម៉ាក អះអាងថា នាវាមួយគ្រឿងរបស់ខ្លួន ជានាវាដឹកយានយន្ត បំពាក់ទង់ជាតិសហរដ្ឋអាមេរិក បានឆ្លងកាត់ច្រកសមុទ្រ Hormuz។

ឆ្លើយតបចំពោះភាពតានតឹងចុងក្រោយនេះ អ៊ីរ៉ង់បានបើកការវាយប្រហារសងសឹកនៅថ្ងៃចន្ទ ដោយផ្តោតលើប្រទេសអារ៉ាប់រួម (UAE)។ ការវាយប្រហារទាំងនោះមានទាំងមីស៊ីល និងដ្រូន វាគឺជាឧប្បត្តិហេតុលើកដំបូងចាប់តាំងពីបទឈប់បាញ់រវាងអ៊ីរ៉ង់ និងសហរដ្ឋអាមេរិកចូលជាធរមានកាលពីខែមុន។

ទោះបីជាយ៉ាងណា ប្រទេសអារ៉ាប់រួមរាយការណ៍ថា ប្រព័ន្ធការពារដែនអាកាសរបស់ខ្លួន បានស្ទាក់ចាប់មីស៊ីលចំនួន ១៥គ្រាប់ និងដ្រូនចំនួន ៤គ្រឿង។ បន្ទាប់មកអគ្គិភ័យក៏បានផ្ទុះឡើងនៅតំបន់ឧស្សាហកម្មប្រេង Fujairah ជាមជ្ឈមណ្ឌលថាមពលដ៏សំខាន់មួយ នៅលើឆ្នេរសមុទ្រភាគខាងកើតរបស់អារ៉ាប់រួម៕

ប្រែសម្រួល៖ ណឺ មិនា