អានុទីន បញ្ជាឲ្យគេ យករូបថតខ្លួន ទៅតាំងក្នុងអគារ Thai Khu Fah ដោយយកលេស ដើម្បីរំដោះគ្រោះ

ជារឿងដ៏ហួសចិត្ត ដែល អានុទីន ឆាន់វីរៈគុល បញ្ជាឲ្យគេយករូបថតរបស់ខ្លួន ទៅតាំងក្នុងសាលនៃវិមានរដ្ឋាភិបាលថៃ ដែលទង្វើនេះ គឺជាការធ្វើខុសទំនៀមទម្លាប់ យ៉ាងធ្ងន់ធ្ងរ។ 

តាមទំនៀម មានតែនាយករដ្ឋមន្ត្រីចប់អាណត្តិ ឬចុះចេញពីតំណែងប៉ុណ្ណោះ ដែលត្រូវគេយករូបថត ទៅតាំងនៅ «សាលវិចិត្រសាល រូបភាពនាយករដ្ឋមន្ត្រី» (Hall of Prime Ministers) ក្នុងអគារ Thai Khu Fah ហើយទម្លាប់នេះ ត្រូវបានប្រទេសថៃ អនុវត្តជាច្រើនទសវត្សរ៍មកហើយ។

យ៉ាងណា អានុទីន មិនខ្វល់ឡើយ ដោយកាលពីថ្ងៃចន្ទ ទី១៨ ខែឧសភា នាយករដ្ឋមន្ត្រីថៃកំពុងកាន់តំណែងរូបនេះ បែរជាបញ្ជាឲ្យគេ យករូបថតខ្លួន ទៅតាំងនៅទីនោះដែរ ដោយយកលេសថា ការធ្វើបែបនេះ​ គឺដើម្បីរំដោះគ្រោះ។

ចាប់តាំងពីការចូលកាន់តំណែងរបស់អានុទីន, ប្រទេសថៃ តែងជួបរឿងចង្រៃៗមិនចេះចប់ ជាពិសេសគ្រោះធម្មជាតិតែម្តង ដូចជាព្យុះ ទឹកជំនន់ និងរញ្ជួយដីជាដើម។

មិនត្រឹមប៉ុណ្ណឹង ថៃ ក៏ត្រូវជួបហេតុការណ៍អាក្រក់ៗ ជាបន្តបន្ទាប់ផងដែរ ជាក់ស្តែងចុងក្រោយបំផុតនេះ មានសោកនាដកម្មរថភ្លើង បុករថយន្តក្រុង ដែលបណ្តាលឲ្យមនុស្ស៨នាក់ បាត់បង់ជីវិត និងជាង៣០នាក់ទៀត រងរបួស៕

អត្ថបទ៖ សុខ សុវណ្ណ