ឆេះក្លឹបនៅថៃ! មនុស្សស្លាប់កើនដល់ ៣០នាក់ ខណៈ ច្រើននាក់ទៀត របួសធ្ងន់ កំពុងមានហានិភ័យដល់ជីវិត

មនុស្សម្នាក់ទៀត ត្រូវប្រកាសថា ស្លាប់ក្នុងមន្ទីរពេទ្យ ក្រោយហេតុការណ៍ភ្លើងឆេះក្លឹបកម្សាន្ត Rong Beer Na Ladphrao នៅទីក្រុងបាងកក ប្រទេសថៃ ធ្វើឲ្យតួលេខមនុស្សបាត់បង់ជីវិត ដោយសារគ្រោះអគ្គិភ័យយ៉ាងសាហាវនេះ កើនដល់ ៣០នាក់ គិតត្រឹមវេលាថ្ងៃត្រង់ ថ្ងៃអង្គារ ទី១៤ ខែកក្កដា ឆ្នាំ២០២៦។

តាមការផ្សាយរបស់ Bangkok Post, ក្រៅពីករណីស្លាប់, ចំនួនមនុស្សរងរបួស ក៏កើនដល់ ៧៥នាក់ផងដែរ ប៉ុន្តែក្នុងនោះ អ្នករបួសធ្ងន់ធ្ងរបំផុតដែលសង្ឃឹមរស់តិច មានចំនួន ២៤នាក់។

អ្នកទាំង ២៤នាក់នេះ ត្រូវបានគេចាត់បញ្ចូលទៅក្នុងក្រុមអ្នករបួស ករណីពណ៌ក្រហម ដែលមានន័យថា ពួកគេស្ថិតក្នុងស្ថានភាពធ្ងន់ធ្ងរបំផុត សឹងតែមានឱកាសរស់ ស្តួចស្តើងបំផុត។

សូមជម្រាបជាថ្មី គ្រោះអគ្គិភ័យ បានឆាបឆេះក្លឹបក្បែរផ្លូវ Soi Lat Phrao លេង 1 ក្នុងខ័ណ្ឌចតុចក្រ នាវេលាម៉ោង ១២:០២ រំលងអធ្រាត្រ ឈានចូលថ្ងៃចន្ទ ទី១៣ ខែកក្កដា ឆ្នាំ២០២៦។

ក្រុមពន្លត់អគ្គិភ័យ បានឲ្យដឹងថា មានមនុស្សប្រហែល ៣០០នាក់ នៅក្នុងក្លឹប ពេលភ្លើងចាប់ផ្តើមឆាបឆេះ ខណៈមនុស្សស្លាប់ភាគច្រើន គឺបណ្តាលមកពីថប់ដង្ហើមព្រោះផ្សែង។

ក្រុមមន្ត្រីសន្និដ្ឋានថា អគ្គិភ័យនេះ អាចបណ្តាលមកពីការទុស្សេ ព្រោះគេឃើញមានភ្លើងឆេះចេញពីប្រអប់ឌីសង់ទ័រ កន្លែងឆាកតន្ត្រី រួចក៏ដាច់ចរន្តអគ្គិភ័យ ហើយលាន់ស្នូរផ្ទុះទៀត៕

អត្ថបទ៖ សុវណ្ណ