មនុស្សស្លាប់ កើនឡើងថែមទៀត ក្នុងហេតុការណ៍ភ្លើងឆេះក្លឹប នៅ ថៃ

ប្រទេសថៃ បានបញ្ជាក់ពីការស្លាប់មនុស្សថែមទៀត ក្នុងហេតុការណ៍ភ្លើងឆេះក្លឹប នៅទីក្រុងបាងកក ធ្វើឲ្យតួលេខមនុស្សបាត់បង់ជីវិត ក្នុងគ្រោះអគ្គិភ័យដ៏សាហាវមួយនេះ កើនដល់ ២៩នាក់ គិតត្រឹមព្រឹកថ្ងៃអង្គារ ទី១៤ ខែកក្កដា ឆ្នាំ២០២៦។

តាមការផ្សាយរបស់ Amarin TV, អ្នកបាត់បង់ជីវិតចុងក្រោយ គឺជាបុរសអាយុ ២០ឆ្នាំ ដែលដាច់ខ្យល់ស្លាប់ក្នុងមន្ទីរពេទ្យ ព្រោះតែរបួសធ្ងន់ពេក។

ក្រៅពីអ្នកស្លាប់ នៅមានមនុស្ស ៦៩នាក់ទៀត រងរបួស ក្នុងនោះ ២២នាក់របួសធ្ងន់ខ្លាំង (សង្ឃឹមតិចថានៅរស់), ១៣នាក់ របួសធ្ងន់ និង ៣២នាក់របួសស្រាល។

សូមជម្រាបជាថ្មី គ្រោះអគ្គិភ័យ បានឆាបឆេះក្លឹប Na Ladprao ក្បែរផ្លូវ Soi Lat Phrao លេង 1 ក្នុងខ័ណ្ឌចតុចក្រ នាវេលាម៉ោង ១២:០២ រំលងអធ្រាត្រ ឈានចូលថ្ងៃចន្ទ ទី១៣ ខែកក្កដា ឆ្នាំ២០២៦។

ក្រុមពន្លត់អគ្គិភ័យ បានឲ្យដឹងថា មានមនុស្សយ៉ាងច្រើនកកកុញ នៅក្នុងក្លឹប ពេលភ្លើងចាប់ផ្តើមឆាបឆេះ ខណៈមនុស្សស្លាប់ភាគច្រើន គឺបណ្តាលមកពីថប់ដង្ហើមព្រោះផ្សែង។

ចំពោះមូលហេតុ! ជាបឋម ក្រុមមន្ត្រីសន្និដ្ឋានថា អគ្គិភ័យនេះ គឺបណ្តាលមកពីការទុស្សេ ព្រោះគេឃើញមានភ្លើងឆេះចេញពីប្រអប់ឌីសង់ទ័រ កន្លែងឆាកតន្ត្រី រួចក៏ដាច់ចរន្តអគ្គិភ័យ ហើយលាន់ស្នូរផ្ទុះទៀត។

ជុំវិញរឿងនេះ ប៉ូលិសថៃ កំពុងពិនិត្យមើលថាតើ ច្រកចេញអាសន្នទាំងអស់នៅក្នុងក្លឹប មានការដាក់ស្លាកសញ្ញាសម្គាល់ និងមានការថែទាំបានត្រឹមត្រូវដែរឬទេ ព្រោះថា អតិថិជនបានវង្វេងទិសដៅ និងជាប់គាំងនៅខាងក្នុង ពេលអគ្គិភ័យកើតឡើង ធ្វើឲ្យពួកគេជាប់ស្លាប់នៅក្នុងនោះ៕

អត្ថបទ៖ សុវណ្ណ