ប្រេសិត​អាមេរិក​ប្រចាំកោះ Greenland ជំរុញឲ្យ​ពង្រីកឥទ្ធិពល និងបង្កើន​វត្តមានយោធាឡើងវិញ

លោក Jeff Landry ប្រេសិតពិសេសរបស់សហរដ្ឋអាមេរិក​សម្រាប់ កោះ Greenland បានថ្លែងកាលពីថ្ងៃទី២០ ខែឧសភា នៅក្នុងឱកាសបំពេញទស្សនកិច្ចលើកដំបូងនៅលើកោះនោះថា ទីក្រុងវ៉ាស៊ីនតោនចាំបាច់ត្រូវកសាងវត្តមានរបស់ខ្លួនឡើងវិញនៅលើកោះតំបន់អាកទិកមួយនេះ ដែលជាទីកន្លែងអាមេរិកធ្លាប់គ្រប់គ្រងមូលដ្ឋានយោធាចំនួន ១៧កន្លែង អំឡុងសម័យសង្រ្គាមត្រជាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់ទីភ្នាក់ងារសារព័ត៌មាន AFP លោក Landry បាននិយាយថា «ខ្ញុំគិតថា វាដល់ពេលហើយសម្រាប់អាមេរិក ​ឈាន​ជើង​ទៅ​លើ​កោះមួយនេះ ហើយដូចដែលបានឃើញ ប្រធានាធិបតីក៏បានជជែកអំពីការបង្កើនប្រតិបត្តិការសន្តិសុខជាតិ និងការដាក់កងទ័ពឡើងវិញនៅតាមមូលដ្ឋានមួយចំនួនក្នុងកោះ Greenland ដែរ។ លោកបានបន្ថែមថា «Greenland ត្រូវការអាមេរិក»។

យោងតាមរបាយការណ៍ប្រព័ន្ធផ្សព្វផ្សាយនាពេលថ្មីៗនេះ អាមេរិកចង់បើកមូលដ្ឋានទ័ពថ្មីចំនួនបី​កន្លែង​បន្ថែមទៀត នៅភាគខាងត្បូងនៃដែនដី​កោះ​នេះ។ សន្ធិសញ្ញាការពារជាតិឆ្នាំ១៩៥១ ដែលត្រូវបានធ្វើបច្ចុប្បន្នភាពក្នុងឆ្នាំ២០០៤ បានអនុញ្ញាតឲ្យទីក្រុងវ៉ាស៊ីនតោនបង្កើនការដាក់ពង្រាយកងទ័ព និងការដំឡើងយោធានៅលើកោះ Greenland ឲ្យតែមានការជូនដំណឹងជាមុនដល់ដាណឺម៉ាក និងរដ្ឋាភិបាលកោះនេះ។

នៅក្នុងបទសម្ភាសន៍មួយផ្សេងទៀតជាមួយកាសែត Sermitsiaq លោក Landry ក៏បានលើកឡើងផងដែរអំពីឱកាសទទួលបានឯករាជ្យភាពផ្នែកសេដ្ឋកិច្ចរបស់កោះ Greenland ដោយលោកបានថ្លែងថា មានឱកាសជាច្រើនដែលអាចជួយឲ្យប្រជាជននៅលើកោះនេះ រំដោះខ្លួនចេញពីការពឹងផ្អែកលើប្រទេសដាណឺម៉ាក។

ទោះជាយ៉ាងណាក៏ដោយ វត្តមានរបស់លោក Landry នៅក្នុងរដ្ឋធានី Nuuk បានបង្កឲ្យមានការជជែកដេញដោលយ៉ាងខ្លាំង ដោយសារតែលោកបានមកបំពេញទស្សនកិច្ចដោយគ្មានការអញ្ជើញជាផ្លូវការពីមន្ត្រីមូលដ្ឋានឡើយ។ ក្រុមប្រតិភូរបស់លោក ក៏មានការរួមដំណើរដោយគ្រូពេទ្យអាមេរិកម្នាក់ ដើម្បី «វាយតម្លៃតម្រូវការផ្នែកវេជ្ជសាស្ត្រ» នៅទីនោះ ដែលទង្វើនេះបានធ្វើឲ្យប្រធានអាជ្ញាធរសុខាភិបាលកោះ Greenland លោកស្រី Anna Wangenheim មានការខឹងសម្បារយ៉ាងខ្លាំង និងបានតបតវិញថា ប្រជាជននៅលើកោះ «មិនមែនជាសត្វកណ្តុរសម្រាប់ពិសោធន៍ក្នុងគម្រោងភូមិសាស្ត្រនយោបាយនោះទេ»។

ដោយឡែក នាយករដ្ឋមន្ត្រីកោះ Greenland លោក Jens-Frederik Nielsen បាននិយាយថា ទោះបីជាសាររបស់ទីក្រុងវ៉ាស៊ីនតោនអំពីការគ្រប់គ្រងកោះ Greenland ជារឿងដែលមិនផ្តល់តម្លៃទាល់តែសោះក៏ដោយ ក៏មន្ត្រីមូលដ្ឋាននៅតែចង់ស្វែងរកដំណោះស្រាយតាមរយៈការចរចា។ បន្ទាប់ពីបានជួបពិភាក្សាជាមួយលោក Landry កាលពីថ្ងៃទី១៨ ខែឧសភា លោក Nielsen បានពណ៌នាថា ការពិភាក្សានោះមានលក្ខណៈ «ស្ថាបនា» ប៉ុន្តែលោកបានកត់សម្គាល់ថា គ្មានសញ្ញាណាមួយបង្ហាញថាជំហររបស់អាមេរិកមានការផ្លាស់ប្តូរនោះឡើយ។

សូមជម្រាបជូនថា លោក ត្រាំ កាលពីខែមករា បានដកថយពីការគំរាមកំហែងរឹបអូសយកកោះ Greenland។ បន្ទាប់មក អាមេរិក ដាណឺម៉ាក និងកោះ Greenland បានបង្កើតក្រុមការងារមួយដើម្បីដោះស្រាយកង្វល់សន្តិសុខរបស់ទីក្រុងវ៉ាស៊ីនតោន។ ប៉ុន្តែ មន្ត្រីកោះ Greenland និងដាណឺម៉ាក បានសង្កត់ធ្ងន់ម្តងហើយម្តងទៀតថា មានតែប្រជាជនកោះ Greenland ប៉ុណ្ណោះ ដែលមានសិទ្ធិសម្រេចពីអនាគតរបស់ខ្លួន៕

អត្ថបទ៖ សាង ស្រីល័ក្ខ