ព័ត៌មានអន្ដរជាតិ

ជប៉ុននិងអ៊ីតាលី សហការជាមួយអង់គ្លេសអភិវឌ្ឍលើយន្តហោះចម្បាំងជំនាន់ចុងក្រោយ

បានផុស

២៨ វិនាទី មុន

នៅ

ថ្ងៃពុធ ១៧ មិថុនា ២០២៦

ដោយ

ក្រោយសង្រ្គាមនៅមជ្ឈិមបូព៌ាបានធូរស្បើយបន្តិចក្នុងប៉ុន្មានថ្ងៃចុងក្រោយនេះ មេដឹកសេដ្ឋកិច្ចពិភពលោកមិនបាននៅស្ងៀមឡើយ ពួកគេនៅតែស្វែងរកកិច្ចសហការក្នុងវិស័យការពារជាតិជាមួយសម្ព័ន្ធមិត្ត ដើម្បីធានាថា ប្រទេសរបស់ពួកគេមានសុវត្ថិភាព។

នាយករដ្ឋមន្ត្រីជប៉ុន លោកស្រី Sanae Takaichi និងសមភាគីអ៊ីតាលី គឺ លោកស្រី Giorgia Meloni បានព្រមព្រៀងក្នុងពេលថ្មីៗនេះ ក្នុងពេលមេដឹកនាំស្ត្រីទាំងពីររូប បានទៅចូលរួមប្រជុំជាមួយមេដឹកនាំនៃប្រទេសឧស្សាហកម្ម G7 នៅទីក្រុងប៉ារីស ដោយការសហការលើកកម្ពស់ការអភិវឌ្ឍយន្តហោះចម្បាំងជំនាន់ចុងក្រោយរួមគ្នា ដោយសហការជាមួយចក្រភពអង់គ្លេស។

លោកស្រី Sanae Takaichi និង លោកស្រី Giorgia Meloni ។ រូបភាព៖ JIJI

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន The Japan Times ផ្សាយថ្ងៃទី១៦ ខែមិថុនា ឆ្នាំ២០២៦ ក្នុងកិច្ចប្រជុំមួយនៅទីក្រុងរ៉ូម មេដឹកនាំទាំងពីរក៏បានព្រមព្រៀងគ្នាជំរុញកិច្ចសហប្រតិបត្តិការលើសន្តិសុខសេដ្ឋកិច្ច រួមទាំងការពង្រីកខ្សែសង្វាក់ផ្គត់ផ្គង់សម្រាប់រ៉ែកម្រ និងរ៉ែសំខាន់ៗផ្សេងទៀត។

លោកស្រី Takaichi ថ្លែងក្នុងសន្និសីទសារព័ត៌មានរួមគ្នាមួយ បន្ទាប់ពីកិច្ចពិភាក្សាថា៖ « ប្រទេសជប៉ុននឹងធ្វើការជាមួយអ៊ីតាលី ដើម្បីពន្លឿនកម្មវិធីអាកាសចរណ៍ប្រយុទ្ធសកលត្រីភាគី ដើម្បីអភិវឌ្ឍយន្តហោះចម្បាំងជំនាន់ចុងក្រោយ»។

លោកស្រីស្វាគមន៍ ចំពោះការចុះហត្ថលេខាលើអនុស្សរណៈស្តីពីការពង្រឹងខ្សែសង្វាក់ផ្គត់ផ្គង់។

ដោយឡែក លោកស្រី Meloni និយាយថា៖ « ប្រទេសអ៊ីតាលី និងជប៉ុន គឺជាដៃគូយុទ្ធសាស្ត្រ ហើយអាចផ្លាស់ប្តូរទស្សនៈជាមួយសមភាគីជប៉ុនលើរឿងច្រើនប្រភេទ»។

អ្នកទាំងពីរក៏បានបញ្ជាក់ពីកិច្ចសហប្រតិបត្តិការទ្វេភាគីក្នុងការស្រាវជ្រាវវិទ្យាសាស្ត្រ និងបច្ចេកវិទ្យាទំនើបៗ រួមទាំងការអភិវឌ្ឍអវកាសផងដែរ។

មិនតែប៉ុណ្ណោះមេដឹកនាំទាំងពីរបានពិភាក្សាអំពីកិច្ចការតំបន់ និងយល់ព្រមធ្វើការរួមគ្នា ដើម្បីធានាសេរីភាពនៃការធ្វើនាវាចរណ៍ក្នុងច្រកសមុទ្រ Hormuz បន្ទាប់ពីកិច្ចព្រមព្រៀងរវាងសហរដ្ឋអាមេរិក និងអ៊ីរ៉ង់ ដើម្បីបញ្ចប់ការប្រយុទ្ធគ្នា។

គួរបញ្ជាក់ថា នេះជាកិច្ចប្រជុំលើកដំបូង ចាប់តាំងពីពួកគេបានធ្វើកិច្ចចរចានៅទីក្រុងតូក្យូកាលពីខែមករា ពេល លោកស្រី Meloni បានអញ្ជើញលោកស្រី Takaichi ឱ្យទៅទស្សនកិច្ចប្រទេសអ៊ីតាលី៕

សម្រួល៖ ណឺ មិនា