ព័ត៌មានអន្ដរជាតិ

កូរ៉េខាងជើងបាញ់សាកល្បងប្រព័ន្ធមីស៊ីលនិងកាំភ្លើងធំ បញ្ជាក់ពីសក្តានុពលវិស័យយោធា

បានផុស

៣៣ វិនាទី មុន

នៅ

ថ្ងៃសុក្រ ២៦ មិថុនា ២០២៦

ដោយ

កូរ៉េខាងជើង បានបាញ់សាកល្បងប្រព័ន្ធកាំភ្លើងធំនិងមីស៊ីលបច្ចេកវិទ្យាទំនើប ខណៈមេដឹកនាំ គឺ លោក គីម ជុងអ៊ុន បានបញ្ជាក់ជាថ្មីនូវការប្តេជ្ញាចិត្តរបស់រដ្ឋាភិបាលរបស់លោក ក្នុងការពង្រឹងសមត្ថភាពយោធា។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានរដ្ឋ KCNA នៅថ្ងៃសុក្រ។

លោក ជុងអ៊ុន បានត្រួតពិនិត្យការបាញ់សាកល្បងនៅថ្ងៃព្រហស្បតិ៍ បញ្ជាក់ពីផ្នែកមួយនៃផែនការនៃការធ្វើទំនើបកម្មក្នុងវិស័យការពារជាតិរយៈពេល ៥ឆ្នាំ។

ការបាញ់សាលល្បងរបស់កូរ៉េខាងជើង។ រូបភាព៖ AA

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសាកល្បងនេះ ត្រូវបានវាយតម្លៃលើការអនុវត្តប្រយុទ្ធរបស់ឧបករណ៍បាញ់រ៉ុក្កែតច្រើនបំពង់ទំហំ ២៤០មីលីម៉ែត្រ ធ្វើយ៉ាងណាឱ្យមីស៊ីលបាលីស្ទិកយុទ្ធសាស្ត្រប្រសើរឡើង ដោយការបំពាក់ក្បាលគ្រាប់បេសកកម្មពិសេស និងគ្រាប់កាំភ្លើងធំស្វ័យប្រវត្តិ ១៥៥មីលីម៉ែត្រដែលមានចម្ងាយបាញ់បន្ថែម។

ឥឡូវនេះ កូរ៉េខាងជើងមានឧបករណ៍បាញ់រ៉ុក្កែតច្រើនគ្រាប់ ធ្វើឱ្យការសាកល្បងប្រសើរឡើងដែលអាចបាញ់បានចម្ងាយ ៩០គីឡូម៉ែត្រ និងមានប្រព័ន្ធគ្រប់គ្រងការបាញ់ដោយស្វ័យប្រវត្តិជាមួយនឹងបច្ចេកវិទ្យាជាក់លាក់ដោយឯកឯង។

គួរបញ្ជាក់ថា ក្បាលគ្រាប់ពិសេសរបស់មីស៊ីលយុទ្ធសាស្ត្រត្រូវបានរចនាឡើង ដើម្បីវាយប្រហារគោលដៅយុទ្ធសាស្ត្រ រួមទាំងអាកាសយានដ្ឋាន កំពង់ផែ និងរោងចក្រថាមពល ខណៈគ្រាប់កាំភ្លើងធំថ្មីអាចបាញ់ប្រកបដោយប្រសិទ្ធភាពលើចម្ងាយ ៦៥គីឡូម៉ែត្រ។

លោក គីម និយាយថា ការធ្វើតេស្តទាំងនេះបានបង្ហាញពីវឌ្ឍនភាពបច្ចេកវិទ្យាដ៏អស្ចារ្យ សម្រេចបានក្រោមគោលនយោបាយទំនើបកម្មយោធារបស់គណបក្សពលករកំពុងកាន់អំណាច។

លោក គីម បន្ថែមថា៖ « ស្ថានភាពអន្តរជាតិបច្ចុប្បន្ន អធិបតេយ្យភាពអាចត្រូវបានការពារ និងធានាបានដោយកម្លាំងដ៏ខ្លាំងក្លាប៉ុណ្ណោះ! យើងមិនចាំបាច់បន្ថែមវោហាសាស្ត្រណាមួយ ដើម្បីពន្យល់ពីមូលហេតុនៃការពង្រឹងសមត្ថភាពការពារជាតិទេ តែវាគឺជាការងារយុទ្ធសាស្ត្រជាតិដំបូងដែលមិនអាចខ្វះបាន»។

លោកក៏បានបញ្ជាក់ម្តងទៀតថា គោលនយោបាយរបស់ទីក្រុងព្យុងយ៉ាងមានគោលបំណងមិនត្រឹមតែពង្រឹងសមត្ថភាពការពារប៉ុណ្ណោះទេ ប៉ុន្តែថែមទាំងកសាងឥរិយាបថវាយលុកដ៏សាហាវ និងបំផ្លិចបំផ្លាញដ៏មានសក្តានុពលរបស់សត្រូវ។

លោក គីម ថា៖ « យើងនឹងធ្វើឱ្យសត្រូវទទួលស្គាល់ថា មធ្យោបាយវាយប្រហារចម្ងាយឆ្ងាយរបស់កងកម្លាំងប្រដាប់អាវុធរបស់យើង ត្រូវបានជំនួសដោយមធ្យោបាយដែលបានធ្វើឱ្យប្រសើរឡើងក្នុងរយៈពេលដ៏ខ្លីបំផុត»៕

សម្រួល៖ ណឺ មិនា