រួមភេទមុនរៀបការ ស្រ្តីឥណ្ឌូណេស៊ី ត្រូវវាយជាសាធារណៈ ១០០រំពាត់ដល់ សន្លប់ (មានវីដេអូ)

ស្រ្តីម្នាក់ឈឺចុកចាប់រហូតដល់សន្លប់ បន្ទាប់ពីត្រូវវាយចំនួន១០០រំពាត់ ដោយសាររួមភេទមុនរៀបការ ក្រោមការដាក់ទណ្ឌកម្មរបស់ច្បាប់ Sharia នៅប្រទេស ឥណ្ឌូណេស៊ី។

ឃ្លីបវីដេអូ បង្ហាញពីស្ត្រីជនជាតិឥណ្ឌូណេស៊ីម្នាក់ ដួលសន្លប់បន្ទាប់ពីត្រូវបានគេវាយជាសាធារណៈ។

ស្ត្រីដែលមិនត្រូវបានបញ្ចេញឈ្មោះរូបនេះ និងគូស្នេហ៍របស់នាង ត្រូវគេវាយម្នាក់១០០រំពាត់ នៅក្នុងទីក្រុង Lhokseumawe កាលពីថ្ងៃចន្ទ។

ទីក្រុងនេះ ស្ថិតនៅក្នុងខេត្ត Aceh ចុងភាគខាងលិចប្រទេសឥណ្ឌូណេស៊ី ដែលជាតំបន់តែមួយគត់របស់ប្រទេសដែលមានស្វ័យភាព ក្នុងការអនុវត្តច្បាប់ Sharia។

សាធារណៈជន បានប្រមូលផ្តុំគ្នាដើម្បីមើលស្ត្រីរូបនោះទទួលទណ្ឌកម្ម នៅពេលនាងត្រូវវាយដោយមន្រ្តីមកពីកងកម្លាំងប៉ូលិសឥស្លាមក្នុងតំបន់ Wilayatul Hisbah និងទីភ្នាក់ងារសណ្តាប់ធ្នាប់សាធារណៈ។

នៅក្នុងវីដេអូនេះ គេអាចឃើញស្ត្រីរូបនេះឈរនៅលើឆាក ពាក់រ៉ូបពណ៌ស និងកន្សែងរុំក្បាលហើយព័ទ្ធជុំវិញដោយមន្រ្តីនិងមនុស្សដែលយកទូរស័ព្ទថត។ បន្ទាប់ពីវាយជាច្រើនរំពាត់ នាងបានដួលលុតជង្គង់ ផ្កាប់មុខ៕

វីដេអូ៖

ប្រែសម្រួល៖ Vann Vann

ប្រភព៖ Daily Mail