បាតុកម្មនៅ កាហ្សាក់ស្ថាន ប្រែក្លាយទៅជាការបង្ហូរឈាម (មានវីដេអូ)

យោងតាមរបាយការណ៍របស់ប្រព័ន្ធផ្សព្វផ្សាយបានឲ្យដឹងថា ប៉ូលិសក្នុងប្រទេសកាហ្សាក់ស្ថាន បានសម្លាប់បាតុកររាប់សិបនាក់ ដែលព្យាយាមសម្រុកចូលអគាររដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Saltanet Azirbek អ្នកនាំពាក្យប៉ូលិសកាហ្សាក់ស្ថាន បានប្រាប់ទូរទស្សន៍ Khabar-24 នៅថ្ងៃព្រហស្បតិ៍ទី៦ខែមករានេះថា “កងកម្លាំងជ្រុលនិយម” បានព្យាយាមពេញមួយយប់ ដើម្បីវាយលុកអគាររដ្ឋបាលក៏ដូចជានាយកដ្ឋានប៉ូលិស នៅក្នុងទីក្រុងធំបំផុតរបស់ប្រទេសគឺ Almaty ផងដែរ។

លោកស្រីនិយាយថា “អ្នកវាយប្រហាររាប់សិបនាក់ ត្រូវបានសម្លាប់ ហើយអត្តសញ្ញាណរបស់ពួកគេកំពុងត្រូវបានពិនិត្យ”។

ការស្លាប់និងរបួសបានកើតឡើង ចំពេលមានចលាចលជាបន្តនៅក្នុងប្រទេសកាហ្សាក់ស្ថាន ដោយក្រុមបាតុកររាប់រយនាក់ បានប្រមូលផ្តុំគ្នានៅទីលានសំខាន់ក្នុងទីក្រុង Almaty ថ្វីបើមានវត្តមានទាហានរាប់សិបនាក់ និងរថពាសដែកជាច្រើនគ្រឿងក៏ដោយ។

អ្នកកាសែត Reuters ម្នាក់នៅកន្លែងកើតហេតុ បានរាយការណ៍ថា បានឮសំឡេងគ្រាប់កាំភ្លើងនៅពេលទាហានចូលទៅជិតហ្វូងមនុស្ស។

ការ​តវ៉ា​ថ្មី​ៗបានកើត​ឡើង​មួយ​ថ្ងៃ ​បន្ទាប់​ពី​បាតុករ​បាន​សម្រុក​ចូល​វិមាន​ប្រធានាធិបតី និង​ការិយាល័យ​អភិបាលក្រុង​ក្នុង​ទីក្រុង Almaty ហើយ​បាន​ដុត​កម្ទេច។ ហ្វូងមនុស្សក៏បានលុកលុយអាកាសយានដ្ឋាន Almaty មួយរយៈពេលខ្លីផងដែរកាលពីថ្ងៃពុធ ដោយជំរុញឲ្យមានការលុបចោលជើងហោះហើរជាច្រើន។

ក្រសួងមហាផ្ទៃកាហ្សាក់ស្ថាននិយាយថា ប៉ូលិសនិងទាហានឆ្មាំជាតិ៨នាក់ ត្រូវបានសម្លាប់នៅក្នុងភាពចលាចលនេះ ខណៈ ៣០០នាក់រងរបួស៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Al Jazeera

ចុចអាន៖ សម្ព័ន្ធភាពដឹកនាំដោយរុស្ស៊ី បញ្ជូនកងកម្លាំងទៅ កាហ្សាក់ស្ថាន ដែលកំពុងវឹកវរ