ប្រយ័ត្ន! អង់គ្លេស មានអ្នកស្លាប់ទី១ ដោយសារជំងឺធ្លាក់ឈាមដ៏សាហាវ ឆ្លងពីសត្វកណ្តុរ

មនុស្សដំបូងគេនៅចក្រភពអង់គ្លេស បានស្លាប់ដោយសារមេរោគដ៏កម្រ ដែលឆ្លងពីសត្វកណ្ដុរ ខណៈករណីពីរផ្សេងទៀត កំពុងស្ថិតក្រោមការតាមដាន។

ទីភ្នាក់ងារសន្តិសុខសុខភាពចក្រភពអង់គ្លេស បានប្រកាសករណីទី៣នៃជំងឺគ្រុន Lassa កាលពីថ្ងៃសុក្រទី១១ខែកុម្ភៈ ហើយនិយាយថា ជំងឺនេះកាចសាហាវណាស់។

ករណីទាំងអស់ គឺមកពីគ្រួសារតែមួយនៅភាគខាងកើតប្រទេសអង់គ្លេស បន្ទាប់ពីពួកគេទើបតែត្រឡប់មកផ្ទះវិញ ពីដំណើរកម្សាន្តទៅកាន់តំបន់អាហ្វ្រិកខាងលិច ជាកន្លែងដែលមេរោគនេះ កំពុងវាយប្រហារ។

ជំងឺគ្រុន Lassa គឺជាជំងឺធ្លាក់ឈាមស្រួចស្រាវ ដែលបង្កឡើងដោយមេរោគ Lassa ហើយស្រដៀងទៅនឹង Ebola ដែរ។

វាឆ្លងដោយសារតែការប៉ះពាល់ទៅនឹងអាហារ ឬរបស់របរប្រើប្រាស់ក្នុងផ្ទះដែលកខ្វក់ជាមួយនឹងទឹកនោម ឬលាមកសត្វកណ្តុរ។ អ្នកក៏អាចឆ្លងតាមរយៈការប៉ះពាល់ជាមួយសារធាតុរាវនៃរាងកាយ ដែលមានមេរោគផងដែរ។

រោគសញ្ញាចាប់ផ្តើមដោយការឈឺក្បាល ឈឺបំពង់ក និងក្អួត ប៉ុន្តែវាក៏អាចបង្កឲ្យមានការហូរឈាមតាមមាត់ ច្រមុះ ឬទ្វាមាសផងដែរ។

បើគ្មានការព្យាបាលទាន់ពេលវេលាទេ ជំងឺអាចវិវត្តទៅអស់កម្លាំង ប្រកាច់ សន្លប់ និងថ្លង់បណ្តោះអាសន្ន ហើយឈានដល់ស្លាប់៕

ប្រែសម្រួល៖ Vann Vann

ប្រភព៖ Mirror

ចុចអាន៖ អង់គ្លេស រកឃើញអ្នកឆ្លងមេរោគបណ្តាលឲ្យហូរឈាមតាមប្រដាប់ភេទស្រដៀង អេបូឡា