តុលាការពិភពលោកឲ្យ រុស្ស៊ី ធ្វើរឿងមួយនេះជាបន្ទាន់

តុលាការ​យុត្តិធម៌​អន្តរជាតិ (ICJ) ​កាលពីថ្ងៃពុធបាន​បញ្ជា​ឲ្យ​រុស្ស៊ី​​ផ្អាក​ជា​បន្ទាន់​នូវ​សកម្មភាព​យោធា​នៅ​អ៊ុយក្រែន ។

អ៊ុយក្រែនបានដាក់ពាក្យប្តឹងទៅតុលាការកំពូលរបស់អង្គការសហប្រជាជាតិដែលមានមូលដ្ឋាននៅទីក្រុងឡាអេ ប្រទេសហូឡង់កាលពីថ្ងៃទី ២៦ ខែកុម្ភៈ ។ ក្រុង កៀវ បាននិយាយថា ប្រទេសរុស្ស៊ីមិនមានមូលដ្ឋានស្របច្បាប់ដើម្បីចាត់វិធានការយោធា ហើយបានស្នើសុំវិធានការបណ្តោះអាសន្នដើម្បីបញ្ឈប់អរិភាព ។

ជាការឆ្លើយតប សាលក្រមរបស់ ICJ បាននិយាយថា “តុលាការដឹងយ៉ាងច្បាស់អំពីវិសាលភាពនៃសោកនាដកម្មរបស់មនុស្សដែលកំពុងកើតឡើងនៅក្នុងប្រទេសអ៊ុយក្រែន ហើយមានការព្រួយបារម្ភយ៉ាងខ្លាំងអំពីការបាត់បង់ជីវិត និងការឈឺចាប់របស់មនុស្សជាបន្តបន្ទាប់” ។

ICJ ក៏បាននិយាយផងដែរថា “តុលាការមានការព្រួយបារម្ភយ៉ាងខ្លាំងអំពីការប្រើប្រាស់កម្លាំងរបស់សហព័ន្ធរុស្ស៊ីនៅអ៊ុយក្រែនដែលលើកឡើងនូវបញ្ហាធ្ងន់ធ្ងរនៃច្បាប់អន្តរជាតិ” ។

បណ្តឹងនៅតុលាការ ICJ ទាមទារការយល់ព្រមពីបណ្តាប្រទេសដែលពាក់ព័ន្ធក្នុងសំណុំរឿងមួយ ប៉ុន្តែតំណាងរុស្ស៊ីមិនបានចូលរួមសម័យប្រជុំតុលាការនោះទេ ។ ទោះបីជា ICJ មិនមានវិធីផ្ទាល់ក្នុងការអនុវត្តការអនុលោមតាមច្បាប់ក៏ដោយ ក៏តុលាការនិយាយថា បញ្ជារបស់ខ្លួនលើវិធានការបណ្តោះអាសន្នគឺមានកាតព្វកិច្ចស្របច្បាប់ ។

ទន្ទឹមមនោះ ចៅក្រម ១៣ នាក់ក្នុងចំណោមចៅក្រមទាំង ១៥ នាក់នៅលើតុលាការបានបោះឆ្នោតគាំទ្រចំពោះដីកានេះ ខណៈដែលចៅក្រមរុស្ស៊ី និងចិនបានបោះឆ្នោតប្រឆាំង ។

មុនពេលការសម្រេចនេះ អ្នកសង្កេតការណ៍បាននិយាយថា សេចក្តីសម្រេចដ៏តឹងរឹងផ្តល់ដោយ ICJ ដែលត្រូវបានគេស្គាល់ថាជាតុលាការពិភពលោក ជុំវិញការលុកលុយរបស់រុស្ស៊ី នឹងផ្តល់ភាពស្របច្បាប់បន្ថែមទៀតដល់ការគាំទ្ររបស់សហគមន៍អន្តរជាតិសម្រាប់អ៊ុយក្រែន ទោះបីជារុស្ស៊ីមិនអនុវត្តតាមក៏ដោយ ។

ពួកគេក៏បាននិយាយផងដែរថា សេចក្តីសម្រេចនេះអាចមានឥទ្ធិពលលើការស៊ើបអង្កេតរបស់តុលាការឧក្រិដ្ឋកម្មអន្តរជាតិចំពោះឧក្រិដ្ឋកម្មសង្រ្គាមដែលអាចកើតមាននៅក្នុងប្រទេសអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី ថា មន្ទីរពិសោធន៍ជីវសាស្ត្រ អ៊ុយក្រែន កំពុងគំរាមកំហែងដល់ អឺរ៉ុប ទាំងមូល