ទាហានអ៊ុយក្រែន កំពុងហ្វឹកហាត់នៅ ចក្រភពអង់គ្លេស

លោកនាយករដ្ឋមន្ត្រី Boris Johnson បានបង្ហើបថា ទាហានអ៊ុយក្រែនដែលស្ថិតនៅក្នុងចក្រភពអង់គ្លេស កំពុងត្រូវបានបណ្តុះបណ្តាលអំពីរបៀបប្រើប្រាស់រថពាសដែក ដែលចក្រភពអង់គ្លេសផ្គត់ផ្គង់ដើម្បីវាយតបតកងកម្លាំងរុស្ស៊ី។

គាត់បានប្រាប់អ្នកកាសែតដែលធ្វើដំណើរជាមួយគាត់ ក្នុងដំណើរទស្សនកិច្ចទៅកាន់ប្រទេសឥណ្ឌាថា “ខ្ញុំអាចនិយាយបានថា បច្ចុប្បន្នយើងកំពុងបណ្តុះបណ្តាលជនជាតិអ៊ុយក្រែននៅក្នុងប្រទេសប៉ូឡូញ អំពីការប្រើប្រាស់ការការពារប្រឆាំងយន្តហោះ ហើយជាការពិត យើងកំពុងបណ្តុះបណ្តាលពួកគេនៅក្នុងចក្រភពអង់គ្លេស អំពីការប្រើប្រាស់រថពាសដែក”។

ស្របពេលជាមួយគ្នានោះដែរ អ្នកនាំពាក្យរបស់លោក Johnson បានបញ្ជាក់ថា “ទាហានអ៊ុយក្រែនរាប់សិបនាក់ បច្ចុប្បន្នកំពុងស្ថិតនៅក្នុងចក្រភពអង់គ្លេសសម្រាប់ការហ្វឹកហ្វឺន”។

អ្នកនាំពាក្យនិយាយថា កងទ័ពអ៊ុយក្រែន បានចាប់ផ្តើមហ្វឹកហាត់ជាមួយនឹងយានជំនិះ ដែលផ្តល់ដោយចក្រភពអង់គ្លេសក្នុងខែនេះ។

គួរបញ្ជាក់ថា ចក្រភព​អង់គ្លេស​បាន​ផ្តល់​ឲ្យ​អ៊ុយក្រែន​​ នូវ​រថពាសដែក​ល្បាត​ចំនួន ១២០ គ្រឿង រួមទាំង​រថយន្ត Mastiff ដែល​អាច​ប្រើ​ជា​រថយន្ត​ឈ្លបយកការណ៍ ឬ​យាន្ត​ល្បាតផងដែរ។

ទាហាន​ក៏​នឹង​ត្រូវ​បានបង្ហាត់​ពី​របៀប​ប្រើប្រាស់​រថយន្ត​សង្គ្រោះ​ Samaritan និង​រថយន្ត​ឈ្លបយកការណ៍​ពាសដែក​ Sultan និង Samson ផងដែរ។

យោងតាមអ្នកនាំពាក្យរូបនេះ, ចក្រភពអង់គ្លេស និងសម្ព័ន្ធមិត្តកំពុងផ្តល់ឲ្យទាហានអ៊ុយក្រែននូវឧបករណ៍ប្រភេទថ្មីៗ ដែលពួកគេប្រហែលជាមិនធ្លាប់ប្រើពីមុនមកសោះ៕

ប្រែសម្រួល៖ Vann Vann

ប្រភព៖ BBC

ចុចអាន៖ តើមានអ្វីខ្លះនៅក្នុងកញ្ចប់ជំនួយយោធាចុងក្រោយ ដែលអាមេរិកផ្តល់ឲ្យ អ៊ុយក្រែន?