ពិធីការិនីជប៉ុន ហូរទឹកភ្នែក ពេលអានប៉ះចំព័ត៌មាន រុស្ស៊ី​ មួយ (មានវីដេអូ)

អ្នកអានព័ត៌មានជប៉ុនម្នាក់ បានសម្រក់ទឹកភ្នែកក្នុងកម្មវិធីផ្សាយព័ត៌មាន ខណៈដែលនាងបង្ហាញពីការខកចិត្តចំពោះរបាយការណ៍ដែលថា ប្រទេសរុស្ស៊ីបានផ្តល់កិត្តិយសដល់កងទ័ពដែលបានមើលការខុសត្រូវការសម្លាប់រង្គាលនៅទីក្រុង Bucha ប្រទេសអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីការិនីរូបនេះ បានបង្ហាញអារម្មណ៍ក្តុកក្តួលជាពន់ពេក នៅពេលនាង​ប្រាប់ទស្សនិកជនថា លោក Vladimir Putin បាន​ផ្តល់​រង្វាន់​ដល់​ទាហាន​សម្រាប់​ការ​ធ្វើ​ជា​គំរូ ក្នុង​ប្រតិបត្តិការ​យោធា​ពិសេស​នៅ​អ៊ុយក្រែន។

នាងបានបញ្ឈប់ការអានមួយភ្លែតដើម្បីទប់ទឹកភ្នែក និងសម្រួលអារម្មណ៍ មុនពេលអានបញ្ចប់ព័ត៌មាន។

នាង​​និយាយ​ថា “​នៅ​មាន​ជន​ស៊ីវិល​ជា​ច្រើននាក់ ​ជាប់​គាំង​ក្នុង​លេណដ្ឋាន”។ បន្ទាប់ពីនោះ នាងបានស្រក់ទឹកភ្នែករួចប្រាប់ថា នាងខកចិត្តខ្លាំងណាស់ក្នុងការអានព័ត៌មាននេះ។ នាងក៏បានដកដង្ហើមធំ រួចបន្តការអានព័ត៌មានរបស់នាង។

គួរបញ្ជាក់ថា ប្រទេសអ៊ុយក្រែន និងបណ្តាប្រទេសលោកខាងលិចធំៗ បានចោទប្រកាន់រុស្ស៊ីពីបទឧក្រិដ្ឋកម្មសង្រ្គាមក្នុងទីក្រុង Bucha នៅពេលដែលទីក្រុងភាគខាងជើងមួយនេះ ស្ថិតនៅក្រោមការកាន់កាប់របស់រុស្ស៊ីរយៈពេលប៉ុន្មានសប្តាហ៍។

រូបភាពជនស៊ីវិលស្លាប់ដែលត្រូវបានគេចែកចាយពាសពេញបណ្តាញសង្គម បន្ទាប់ពីកងកម្លាំងរុស្ស៊ីដកចេញ បានបង្កឲ្យមានចលាចលអន្តរជាតិ និងនាំឲ្យមានការដាក់ទណ្ឌកម្មបន្ថែមទៀតលើប្រទេសរុស្ស៊ីដោយសហរដ្ឋអាមេរិក អង់គ្លេស និងសហភាពអឺរ៉ុប។

ទោះបីជាយ៉ាងណាក៏ដោយ​ ប្រទេសរុស្ស៊ីបានបដិសេធការចោទប្រកាន់ថា ខ្លួនបានសម្លាប់ជនស៊ីវិលនៅក្នុងទីក្រុង Bucha ដោយហៅវីដេអូ និងរូបថតសាកសពថាជា ការសម្តែងឆាកល្ខោន ដោយទីក្រុង កៀវ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ទីបំផុត រុស្ស៊ី ដាច់ចិត្តទម្លាយតួលេខអ្នកស្លាប់និងរបួស ក្នុងនាវាចម្បាំង Moskva