តើសមាជិកណាតូណាខ្លះ ផ្អាក និងកាត់បន្ថយជំនួយយោធា ឲ្យទៅ អ៊ុយក្រែន?

សង្គ្រាមរុស្ស៊ី-អ៊ុយក្រែន បានក្លាយជាសង្គ្រាមដ៏រ៉ាំរ៉ៃ ដោយអូសបន្លាយពេលជាង ៤ឆ្នាំហើយ ទាំងដែលមិនទាន់លេចឡើងនូវពន្លឺ នៃទីបញ្ចប់សោះ។

ដោយសារសង្គ្រាម ចេះតែរួមរឹតទៅៗ ប្រទេសជាច្រើនដែលជាម្ចាស់ជំនួយ របស់ទីក្រុងកៀវ ក្នុងនោះមានទាំងរដ្ឋជាសមាជិក អង្គការណាតូ ផងដែរ ហាក់នឿយណាយ និងធុញទ្រាន់ ដល់ថ្នាក់ មានប្រទេសខ្លះ ប្រកាសផ្អាកជំនួយយោធា រួចទៅហើយ។

ក្នុងនោះគេឃើញថា មានសមាជិកណាតូ ២ប្រទេស ដែលប្រកាសផ្អាកជួយអ៊ុយក្រែន នោះគឺ ប៊ុលហ្គារី និងប៉ូឡូញ ខណៈសហរដ្ឋអាមេរិក ក្រោមការដឹកនាំរបស់លោក ដូណាល់ ត្រាំ នៅជួយដែរ ប៉ុន្តែមិនជួយច្រើនដូចកាលជំនាន់លោក ចូ បៃដិន។

តាមការផ្សាយរបស់ RT កាលពីថ្ងៃអង្គារ ទី៩ ខែមិថុនា ឆ្នាំ២០២៦ រដ្ឋាភិបាលថ្មីរបស់ប៊ុលហ្គារី បានប្រកាស ឈប់ជួយអាវុធដល់អ៊ុយក្រែន ក្នុងសង្គ្រាមជាមួយរុស្ស៊ី ដោយលើកហេតុផលច្បាស់ៗថា សង្គ្រាម មិនអាចដោះស្រាយនៅលើសមរភូមិ បានឡើយ។

ទីក្រុង សូហ្វីយ៉ា បានបញ្ជាក់ពីជំហយ៉ាងច្បាស់ ហើយនេះគឺជាគោលនយោបាយមួយ ដែលគណបក្ស Progressive Bulgaria ដាក់ចេញ អំឡុងយុទ្ធនាការឃោសនាបោះឆ្នោតខែមេសា ជួយឲ្យបក្សឈ្នះឆ្នោត យ៉ាងភ្លូកទឹកភ្លូកដី។

ជុំវិញរឿងនេះ រដ្ឋមន្ត្រីក្រសួងការពារជាតិប៊ុលហ្គារី លោក Dimitar Stoyanov គូសបញ្ជាក់ថា សង្គ្រាម មិនអាចដោះស្រាយគ្នា នៅលើសមរភូមិបានឡើយ។ ដល់ពេលដែលត្រូវអង្គុយនៅតុចរចាដើម្បីស្វែងរក សន្តិភាពហើយ។ 

លោកលើកឡើងថា៖ «អ្វីដែលយើងកំពុងឃើញនេះ គឺជាសង្គ្រាមស៊ីសាច់ហុតឈាម ហើយមិនថាមានការផ្គត់ផ្គង់អាវុធយុទ្ធភណ្ឌ ច្រើនប៉ុនណានោះទេ លទ្ធផលតែមួយគត់របស់វា គឺការបាត់បង់អាយុជីវិត»។

ទន្ទឹមនោះ ប្រទេសប៉ូឡូញ ក៏បានបង្ហាញជំហរយ៉ាងម៉ឺងម៉ាត់ផងដែរ ដោយបដិសេធបញ្ជូនអាវុធបន្ថែម ទៅឲ្យអ៊ុយក្រែន ក្រោមកម្មវិធីកម្ចី SAFE របស់សហភាពអឺរ៉ុប (EU) ឡើយ។

រដ្ឋមន្ត្រីការពារជាតិប៉ូឡូញ Władysław Kosiniak-Kamysz បញ្ជាក់ថា គ្រឿងយុទ្ធោបករណ៍ទាំងនោះ ត្រូវរក្សាទុកដើម្បីពង្រឹងកងទ័ពផ្ទាល់ខ្លួន។

ងាកទៅសហរដ្ឋអាមេរិក! ក្រោមការដឹកនាំ របស់លោកប្រធានាធិបតី ដូណាល់ ត្រាំ, ទីក្រុងវ៉ាស៊ីនតោន បានបង្កក និងផ្អាកជំនួយយោធាផ្ទាល់ខ្លួនមួយចំនួនធំ ហើយជំរុញឲ្យបណ្ដាប្រទេសអឺរ៉ុប ទទួលបន្ទុកចំណាយជំនួយទាំងនោះ ជំនួសវិញ។

យ៉ាងណា ជំនួយយោធារបស់អង្គការណាតូ នៅតែបន្តហូរចូលអ៊ុយក្រែន តាមរយៈយន្តការរួម PURL (Prioritised Ukraine Requirements List) ដដែល។

សូមជម្រាបជាថ្មី សង្គ្រាមរុស្ស៊ី-អ៊ុយក្រែន ផ្ទុះឡើងជាទ្រង់ទ្រាយធំនៅថ្ងៃទី២៤ ខែកុម្ភៈ ឆ្នាំ២០២២ ពេលរុស្ស៊ី បើកការវាយលុកចូលអ៊ុយក្រែន ក្នុងអ្វីដែលរុស្ស៊ីហៅថា «ប្រតិបត្តិការយោធាពិសេស»។

ហេតុផលចម្បង នៃការសម្រេចចិត្តបើកប្រតិបត្តិការរបស់រុស្ស៊ី គឺដោយសារតែ ការពង្រីកខ្លួនរបស់អង្គការណាតូ និងបញ្ហាតំបន់ Donbas ដែលលោកពូទីន អះអាងថា ប្រជាជននៅទីនោះ រងការធ្វើទុក្ខបុកម្នេញខ្លាំងណាស់ ពីសំណាក់អ៊ុយក្រែន៕

អត្ថបទ៖ សុខ សុវណ្ណ

រដ្ឋាភិបាលថ្មី ប៊ុលហ្គារី ឈប់ជួយអាវុធអ៊ុយក្រែន ដោយអះអាងថា សង្គ្រាម មិនអាចដោះស្រាយនៅលើសមរភូមិ បានឡើយ